Articles

Neste curso 2017-2018 o noso centro foi seleccionado para participar no Programa PITEAS, promovido pola Fundación Barrié coa colaboración da Consellería de Cultura, Educación e Ordenación Universitaria e a participación da Unidade de Altas Capacidades da Universidade de Santiago de Compostela. Este programa nace como un proxecto de mellora da formación do profesorado e de apoio e asesoramento aos centros educativos na detección e educación do talento de alumnas e alumnos. 

Todo o alumnado do centro está a participar deste proxecto e dentro das actividades organizadas para o alumnado da ESO temos prevista a creación dun produto televisivo,polo que o alumnado de 2º ESO asistiu á gravación do programa para público infantil "Pequenos Fenómenos", que tivo lugar o pasado martes 12 de Decembro e que se emitirá o vindeiro sábado día 23 en horario de noite na TVG.

Premede na imaxe e veredes algunhas das fotos da xornada, nas se pode apreciar moi ben o emocionado que estaba o alumnado durante a realización da actividade...

Na tarde do pasado martes 28 de Novembro o alumnado da ESO asistiu á derradeira sesión de actividades do Mes da Ciencia 2017. Rematamos este intenso mes de traballo cunha charla sobre os incendios a cargo do profesor Roque Rodríguez da Escola Politécnica Superior de Enxeñaría do Campus Terra da USC.

Premede nestas imaxes ou visitade a nosa galería de fotos e veredes algún dos momentos da xornada....

Dentro do programa de obradoiros e charlas que, en colaboración co concello, estase a realizar neste mes de novembro con motivo do Dia internacional contra a Violencia de Xénero, o alumnado de 3º e 4º da ESO asistiu este luns ao obradoiro “Contamos todas”, no que o grupo “Tropa de trapo” dramatizou dúas historias: o compromiso das mulleres maiores dunha aldea de Allariz para aprender a montar en bicicleta, e o remate da guerra civil de Liberia grazas á acción das mulleres.

A continuación debateuse entre o alumnado sobre o machismo na sociedade actual, centrándose na situación de desigualdade de oportunidades, salarios, ...

Foi unha actividade moi interesante, e que gustou moito ao alumnado. Podedes botarlle un ollo ás fotos premendo nestas imaxes ou visitando a nosa galería de imaxes...

O pasado martes 14 de Novembro o alumnado de 2º e 4º ESO realizou dúas actividades organizadas pola Asociación para a Defensa Ecolóxica de Galiza (ADEGA). O alumnado de 2º ESO, guiado pola profesora de Bioloxía e Xeoloxía do centro e Ramsés o monitor de ADEGA, despois de ver e traballar a exposición de especies invasoras no centro, realizou un percorrido por todo o paseo fluvial de Cuntis para localizar as especies invasoras que alí existen, desprazando en moitos casos ás especies autóctonas. Por outra banda, o alumnado de 4º ESO, acompañado da profesora de Física e Química do centro e Paco tamén monitor de ADEGA, achegouse á beira do río ao seu paso polo centro da vila, para levar a cabo a anual inspección de outono do río Gallo. O resultado desta foi que conserva o bo estado dos últimos catro anos que levamos facendo esta actividade.

Foi unha tarde moi entretida, na que o noso alumnado amosou un grande interese pola conservación do medio. Premendo nestas imaxes, ou visitando a nosa galería de fotos, poderes ver algúns dos momentos máis significativos da xornada.

                          4º ESO                                                                    2º ESO     

O alumnado de 3° ESO visitou onte durante a clase de Bioloxía e Xeoloxía a exposición sobre especies invasoras ubicada no corredor principal do noso centro. Este alumnado traballou o contido da exposición coa axuda dunhas fichas que tiveron que cubrir e que foron elaboradas para tal efecto polo profesorado. Dita exposición foi cedida temporalmente pola asociación ecoloxista ADEGA e estará a disposición de quen visite o noso colexio até o vindeiro martes 14 de Novembro incluído. É moi recomendable adicar uns minutos do noso tempo a observar os seus paneis para descubrir a enorme cantidade de exemplares invasores tanto animais como vexetais que abundan na nosa paisaxe e que están desprazando ás especies autóctonas.

Coma sempre premede nestas imaxes ou visitade a nosa galería de fotos para botarlle un ollo á exposición.