MÉRCORES, 17 DE XUÑO DE 2020

Bos días chic@s!

Agora si que empeza a conta atrás para as vacacións deste curso tan raro que nos tocou vivir.

Non quería deixar de agradecervos estes dous anos que estiven con vós traballando, experimentando, rindo, xogando, paseando, lendo, aprendendo...soamente podo recordar bos momentos nos que vos vexo xuntos, axudándovos uns aos outros, acompañándovos e entusiasmados con cada nova proposta (sobretodo se tiña recompensa!)

Sodes un grupo xenial e esta tempada penso que vos comportástedes como verdadeiros campións.

Nesta batalla contra o COVID fóstedes uns dos que más perdéstedes. Tivéstedes que renunciar ao cole, aos amigos, as actividades , ao voso ocio, a ver a familia....e todo iso sen entender moi ben o que pasaba ao voso redor. Adaptástesvos a unha nova situación para todos de teletraballo, no que tivéstedes unha resposta estupenda. Entendo que agora xa ides algo cansos e non apetecía tanto traballar, pero aínda así, déstedes o que se vos pediu en cada momento.

Se teño que escoller una imaxe de todo este tempo, sen dúbida quédome con esta. Cada un coa súa personalidade, aportando ao grupo cousas diferentes pero igual de valiosas.

Xogade moito ao aire libre, gozade coa familia, seguide practicando esas cousas que aprendéstedes durante o confinamento (cociña, experimentos, bici, construccións...), experimentade, poñédevos un reloxo na man, pagade no súper, calculade pesos...aprendede xogando!

Lede un bo libro, seguro que pola casa tedes algún que aínda non empezástedes. Se pode ser en galego mellor, así collemos un pouco de vocabulario.

Se eu algo aprendín nesta experiencia, foi a valorar o que teño preto, os momentos e a familia e amigos. Que non nos falte eso nunca!

Quérovos moito! A coller forzas este verán para en Setembro recuperar o tempo perdido!

Déixovos uns materiais por si en verán vos apetece traballar un pouquiño! Nas librerías e areas comerciais tamén tedes un montón de cuaderniños de verán moi divertidos.

Vémonos mañá!