Aquí vos deixamos unha pequena mostra dos diferentes obradoiros que este ano fixemos. Cociña e manualidades para os de infantil, primeiro e segundo, mentras que os de 3º, 4º, 5º e 6º, desfrutaron dos obradoiros de maquillaxe e baile.
Así transcorreu a semana de Entroido no CEIP Cabada Vázquez. O tótem que adorna a nosa entrada foi o encargado de indicar os mandados de Entroido este ano.
O pasado 17 de maio, conmemorando o día das letras galegas, unha pequena representación de alumnado do centro coas súas familias, asistiu a unha xuntanza organizada pola ANPA do noso centro e na que recitaron poesías e danzaron arredor do maio elaborado entre membros da ANPA (a estrutura) e o propio alumnado do centro. Nesta parte, aínda que colaborou o profesorado, todo o alumnado do centro participou na xornada do mércores 16 na confección da base de verde da estrutura xa facilitada pola ANPA, e por suposto na colocación dos adornos e no acabado final. Quedou moi lucido e ai vos deixamos unha pequena mostra, tanto do traballo no centro como sobre todo da festa do día das Letras Galegas en Callobre. Bo traballo rapaces e rapazas!
COMO PRODUTO FINAL DO NOSO PDI " AS NOSAS AVES", NESTE SEGUNDO TRIMESTRE, O ALUMNADO DE 3º/4º E 5º/6º, PROFUNDIZARON NO ESTUDO DAS NOSAS AVES E ELABORARON AS PREGUNTAS PARA O TRIVIAL. UNHA BOA FORMA DE APRENDER E DIVERTIRSE, Á VEZ.
O ALUMANDO DE 1º E 2º LEVOU A CABO UNHAS FANTÁSTICAS MANUALIDADES.
Comezamos o curso cunha visita importante. O pasado venres 10 de setembro visitáronnos Ángela e Mariña, dúas colaboradoras da ONG Stop Accidentes. Como o seu nome indica traballan na atención a persoas que foron víctimas dun accidente de tráfico pero tamén se esforzan por concienciar á cidadanía en xeral da importancia de acadar bos hábitos de RESPECTO aos demais como usuarios da vía pública.
Mellorar a nosa CONVIVENCIA e coñecer algunha das NORMAS básicas foi o que nos deixaron ese día.
Na semana do 14 ao 18 de febreiro tivemos tamén a sorte de poder contar cunha actividade de robótica na aula de 3º e 4º. A actividade foi organizada pola fundación ABANCA e permitiulles á cativada desa aula deseñar un dispositivo con son para avisar ás aves mariñas de que non quedasen atrapadas nas redes dos barcos. Usaron sensores de presenza e intercambiaron mensaxes entre eles, e todo usando as posibilidades que os microbits lles ofrecen.
Pasárono xenial e esperámolos para o mes de abril con outra visita ao noso centro!
Para dar comezo a un novo proxecto sobre a flora silvestre tivemos a sorte do contar con Montse Fernández, nai dunha alumna de 4º de primaria, Catarina, e que non só nos ensinou algunha das plantas que podemos atopar no entorno do noso colexio, senón que tamén puidemos degustar algunha das saborosas receitas que con esas herbas elaboramos na nosa nova cociña. Preparamos unhas tortitas feitas con ovo, fariña de espelta, leite de avea, fiuncho e couselo (embigo de Venus), que acompañamos con sirope de arce e froitas (arandos, amorodos e plátano). Para rematar brindamos cun zume feito con mazás, e correolas ou llantén(maior e menor), menta silvestre (mentrastes) e dente de león.
Desde este ano, o día de Rosalía celébrase o 23 de febreiro por recentes achádegos da súa biografía que así o confirman. Para darlle a súa merecida homenaxe, aceptamos gustosamente a invitación que desde Radio Estrada e sobre todo Pilar Bernárdez no seu día nos fixo. Acudimos o propio día para participar xunto a outros centros da Estrada e levarlle a nosa versión da presenza de elementos da natureza silvestre na obra de Rosalía. Encargáronse tres rapazas da aula de 5º de primaria, Danna, Jamila e Fátima. Fixérono tan ben que convidámosvos a que desfrutedes co seguinte audio da súa intervención.
Este curso, para conmemorar o día da Muller Traballadora (8 de marzo), tivemos a sorte de que Rosa Herráiz, Rosa de Cabanas para moita xente, aceptase a nosa invitación e viñese ao centro a presentar un fermoso traballo seu. Do 3 ao 17 de marzo, estará exposto na Casa das Letras da Estrada, unha exposición de 52 retratos de mulleres de relevancia en diferentes eidos que a autora elaborou o pasado ano, un por cada semana e usando diferentes técnicas gráficas.
A importancia da exposición garda moita relación coa necesidade de dignificar e divulgar as aportacións destas grandes creadoras, e poder comprender as dificultades e inxustas discriminacións que tiveron que sufrir ao longo das súas vidas profesionais.
Esta semana de entroido, visitounos David Otero, escritor e mestre veciño de Codeseda, que coa súa naturalidade e frescura ofreceulle ao alumnado de 1º 2º 3º e 4º , un sinxelo pero ameno obradoiro de poesía.
Con máis retraso do agardado, publícase a revista escolar deste curso, que coma sempre recolle o relevante deste curso que remata. Ao igual ca no curso pasado, recordade que en moitas das reportaxes adxúntase un enlace a unha videomontaxe relacionada co artigo en cuestión. Esperemos que vos guste, e coas reiteradas desculpas pola demora na súa publicación, desexámosvos a todos unhas boas vacacións de verán. Para o ano máis e mellor!!
Ao remate do curso recóllese na revista escolar o máis reseñable do realizado ao longo do curso. Recordade que en moitos artigos hai creados enlaces para poder desfrutar doutra maneira das montaxes de vídeo que foron elaboradas por alumnado e polos mestres coordinadores da biblioteca e do EDLG.
Hoxe recibimos no centro unha fermosa visita. O colectivo feminista Deza - Tabeirós quixo homenaxear á gran Rosalía de Castro dun dos xeitos máis orixinais e creativos. Un grupo de mulleres da nosa zona deseñou e creou un fermoso tapiz usando diferentes técnicas artísticas para que o puidesen desfrutar en exposición canta máis xente mellor.
A iniciativa consiste en que esta bela creación viaxe polos diferentes centros educativos do noso concello estando exposto nun lugar visible polo menos unha semana, para despois continuar o percorrido polos demais centros. Era unha actividade xa programada no curso pasado pero que ao igual que outras máis foi adiada polo confinamento ao que toda a poboación foi obrigada.
Comezamos nós pois, co orgullo e fachenda de darlle a merecida publicidade ás nosas grandes artistas, entre elas á coidadora do noso centro, Pili Torrado, que tamén participou na súa elaboración.
A situación deste ano non permite tampouco o desfrute pleno desta obra pois as visitas ao centro para as familias están restrinxidas, pero conformámonos con que poidades valorar e agradecer o traballo destas grandes creadoras. PARABÉNS!