CEIP Cabada Vázquez

No mes de decembro andivemos moi ocupados rematando de preparar o galiñeiro.

En canto o tivemos a punto puxémoslle o comedeiro e o bebedeiro. Buscámoslle unha boa orientación, para que teñan o maior número de horas de sol posible. Decidimos colocalo debaixo das árbores do noso patio para protexelas da xeada, do vento...

Agora que o temos acondicionado acabamos de recibir, o martes 18 de xaneiro, tres fermosas polas da raza “Galiña de Mos”. 

Tamén viñeron darlle a benvida o alumnado de 1º e 2º, 3º/4º e 5º/6º

Víctor, membro da asociación de criadores da Raza autóctona Galiña de Mos (AVIMOS), ensinounos moitas cousas (e as que nos quedan!): é unha galiña autóctona de Galicia, sabemos que agora mesmo teñen dous meses e medio de vida, arredor dos seis meses comezarán a poñer ovos e poden poñer ovos durante uns 5 anos, podendo chegar a pesar 3kg e moito máis...

Agora tócanos coidalas e investigar moito sobre estas compañeiras de patio.

Andamos buscándolle nome, iremos informando... e estamos preparando o terreo para plantar unhas coles...

Moitas grazas a toda a comunidade educativa (alumnado, familias, mestres e mestras, persoal do centro...) pola implicación e apoio especial que recibimos neste proxecto.

O alumando de infantil do Cabada Vázquez, o 14 de decembro, tivemos unha actividade moi interesante, baixo o título “SEMENTANDO FUTURO: EDUCACIÓN AMBIENTAL”.

Trátase dunha actividade enmarcada no Proxecto TERRA, dirixida a promover a realización de proxectos interdisciplinares que fomenten o papel activo do alumnado ante os desafíos sociais, económicos e medioambientais da sociedade actual.

Escoitamos con moita atención un conto, que só tiña imaxes dos nosos bosques, Diego foi o encargado de dirixir a actividade e estivemos moi atentos... ata nos ensinou unha vacaloura de verdade.

Para rematar sementamos unhas landras, aprendemos que temos que botalas en auga antes de sementalas, se flotan non son axeitadas para a xerminación e se afunden son as ideais para plantar.

Sementámolas nuns testos que fixemos nós cos cartóns que trouxemos da casa, agora tócanos coidalas para que xerminen.

O día dous de novembro atopamos unha sorpresa no patio de infantil!!

Enterámonos de que os nosos mestres, mestras e persoal do centro pensaron que para o noso desenvolvemento sería importante que nos fixeramos responsables do coidado dalgún animal (alimentalo, manter limpo o espazo...) así como aprender a respectalo, observar as súas características, ciclo vital, traballar o reparto de tarefas e responsabilidades, compromiso...

Contáronnos que despois dun tempo dándolle voltas decidiron que iamos a compartir un anaco do noso patio, da nosa experiencia e da nosa infancia coas futuras inquilinas do galiñeiro.

Queremos que as galiñas sexan de raza autóctona, e estamos dubidando entre a “galiña de Mos” e a raza “piñeira” xa que calquera delas son propias da zona atlántica.

Con esta acción, que se enmarca perfectamente coa liña metodolóxica do Cabada Vázquez, pechamos o ciclo do noso horto escolar xa que teremos que plantar as coles e o millo para que as galiñas teñan alimento, ao tempo que aproveitaremos o seu esterco para mellorar o compost que producimos na escola.

Desde este espazo queremos facer público o noso agradecemento á familia de Ariadne e Antía que dende o momento que llo propuxemos amosaron o seu entusiasmo e ofreceron a súa colaboración para levar a cabo este novo proxecto do que poderemos desfrutar toda a escola.

Mirade que artistas:

Camiñando, camiñando chegamos ao segundo trimestre: