CEIP de Belesar

Belesar, 21 de Novembro de 2022

Presentan o proxecto “Os camiños da memoria”

O colexio de Belesar en Baiona acaba de dar a coñecer o seu Proxecto Documental Integrado “Belesar, Camiños da memoria”. O seu obxectivo é vincular ao alumnado coas persoas maiores da contorna a través das súas historias, creando logo rutas polos lugares onde estas sucederon.

A primeira fase do proxecto, para a que acaban de lanzar un vídeo publicitario, consistirá en localizar persoas maiores dispostas a ser entrevistadas e gravadas en vídeo contando as súas historias e anécdotas da xuventude.

No centro estarán as próximas catro semanas publicitando o proxecto para captar o máximo número de historias posibles.

A iniciativa, dinamizada dende a biblioteca escolar e que vai ser levada a cabo polo alumnado, rematará coa creación dos “Camiños da memoria”. Estes serán diferentes rutas pola contorna de Belesar onde a persoa camiñante, a través de códigos QR, poderá visualizar co seu móvil aos protagonistas das historias que alí sucederon hai máis de 60 anos.

Ademáis, organizarán unha exposición co resultado do traballo realizado e completarán este traballo de recuperación do vinculo xeracional coa creación de cartéis con “consellos de vida”, onde aparecerán, ademáis, os nenos e nenas xunto coa persoa maior que regala ese consello.

O pasado 26 e 27 de outubro festexamos o Samaín no cole. O 26 tivemos a marabillosa visita de Brais das Hortas cos seus "Contos para caghar patatillas" e o 27 organizamos no centro obradoiros de cociña terrorífica.

Hoxe tivemos a sorte de recibir a Brais das Hortas e gozar do seu espectáculo: Contos para caghar patatillas.

Foi divertidísimo e tanto alumnado como profes pasámolo xenial!

En breve teremos vídeo da actuación, de momento deixamos unha fotiño e unha sorpresiña que lle preparamos a Brais: a nosa versión do seu videoclip "Santa Compaña 2.0"

Rutas da memoria

Trátase de entrevistar a persoas de Belesar nadas antes do 1960 con historias que contar que sucederan en Belesar, tanto no ámbito urbano como na propia Serra da Groba. As historias poden ser de moi diversos tipos: tanto feitos relevantes para a sociedade como anécdotas persoais que ofrezan información sobre o tipo de vida en aqueles anos. 

As entrevistas, realizadas ben no centro educativo, no lugar onde se produciron as historias ou nas casas das persoas entrevistadas serán grabadas en vídeo e subidas á canle de Youtube do centro educativo.

​Coa xeolocalización das diferentes entrevistas crearanse rutas para facer a pé onde se poida acceder a estas historias a través de códigos QR que as pesoas camiñantes se irán atopando nos lugares onde sucederon as historias.

Exposición da memoria

Das entrevistas realizadas poderase extraer información de moi diverso tipo que, ampliada se fora necesario e organizada, poidan dar lugar a unha exposición no centro sobre a vida en Belesar e na Serra da groba hai máis de 60 anos. 

A propia exposición conterá o proceso de traballo utilizado para a realización das entrevistas.

Consellos de vida

​Os consellos de vida das peroas experimentadas foron sempre o motor principal da evolución humana. Primeiro de xeito oral, logo a través da escrita, o feito de poder acceder ao coñemento das xeracións pasadas e poñelo en valor ofrece unhas garantías a aquelas comunidades que deciden aproveitarse del.

Con "Consellos de vida" pretendemos realizar cartéis onde se o elemento central sexa o texto sintético do consello que unha persoa maior da nosa contorna lle regalou a algún dos nosos alumnos.