Matemáticas

Como en anos anteriores, o noso centro educativo formou un equipo de 8 rapaces e rapazas para participar na Olimpíada Matemática de 2º da ESO organizada pola a asociación AGAPEMA. A fase da zona de Lugo tivo lugar nas instalacións da Praza Maior do Círculo das Artes.

Os nosos representantes foron Candela, Iria, Antón, Mateo, Xavier, Daniel, Raúl e Noa, que estiveron loitando con 5 problemas de diferentes áreas do coñecemento matemático durante dúas horas con outros 50 alumnos e alumnas da provincia. Con certeza, deixaron en moi bo lugar o noso centro que xa é un habitual neste tipo de actividades.

Parabéns a todos eles e esperemos ter un finalista do Leiras na fase final galega, a celebrar o 23 de maio, como ten acontecido nalgunha edición anterior.

Nestes días previos ás festas de Nadal, dende o departamento de matemáticas desenvolvemos diferentes actividades:

  Tal e como podedes observar no noso taboleiro, fixemos diferentes figuras empregando a arte da papiroflexia ou origami. Esta é unha técnica na que, dobrando un papel sucesivas veces, chegamos a obter diferentes formas. Na imaxe anterior podedes observar dende un dodecaedro, un octaedro, un icosaedro ata unha caixa ou unha estrela.

Tamén empregamos a técnica de kirigami. Desta vez, en vez de dobrar papel, con diferentes cortes no papel e empregando simetrías conseguimos facer uns copos de neve ben xeitosos.

E como non, nas nosas aulas tamén xurdiu a maxia. Uns mag@s moi especiais deleitáronos cuns trucos de maxia baseados nas matemáticas que nos deixaron abraiados.

Esperamos que vos gustasen todas estas actividades. 

FELICES FESTAS E E FELIZ ANINOVO!