Día Internacional do Pobo Xitano
O 8 de abril conmemorouse o Día Internacional do Pobo Xitano. Esta data lembra o Primeiro Congreso Mundial Xitano celebrado en Londres o 8 de abril de 1971, no que se instituíu a bandeira e o himno xitano.
A bandeira é verde e azul, simbolizando o ceo e o campo, cunha roda de carro vermella no centro, simbolizando o camiño da India e a liberdade. O himno xitano, Gelem, gelem (caminei, andei), foi composto por Jarko Jovanovic e conmemora os xitanos que foron vítimas do nazismo.
No noso centro educativo celebramos este día cunha exposición no taboleiro de cortizas situado na planta baixa e coa actuación musical dun grupo de alumnos/as que animaron o período de lecer co noso tambor flamenco.
