IES Isidro Parga Pondal

A resolución do 28 de febreiro de 2024 permítelle ao alumnado de 4º de ESO e de 2º de bacharelato acreditar as súas competencias dixitais en dous niveis: iniciación e intermedio.

No caso do alumnado de 4º de ESO, a obtención do título suporá a acreditación do nivel de iniciación. O alumnado que o desexe poderá presentarse a unha proba específica co obxectivo de acreditar os coñecementos, habilidades e actitudes propias do nivel intermedio. Esa acreditación terá unha validez de 5 anos.

No caso do alumnado de 2º Bac. a obtención do título de bacharel acredita que a alumna ou o alumno ten os coñecementos, habilidades e actitudes das áreas de dominio 1, 2, 3 e 5 do nivel intermedio descritas no Marco galego de competencias dixitais. O alumnado poderá presentarse a unha proba específica co obxectivo de acreditar os coñecementos, habilidades e actitudes propias da área de dominio 4 do nivel intermedio. No caso de que unha alumna ou un alumno obteña o título de bacharel e ademais supere a proba específica da área de dominio 4 do nivel intermedio, recibirá a certificación ComDix que acredita o nivel intermedio, e que terá unha validez de 5 anos.

O alumnado que desexe participar nas probas específicas deberá cumprir os seguintes requisitos:
a) Estar matriculado en 4º de educación secundaria obrigatoria para presentarse á proba específica que acredita as competencias dixitais de nivel intermedio.
b) Estar matriculado en 2º de bacharelato para presentarse á proba específica que acredita a área de dominio 4 de competencias dixitais de nivel intermedio.

A solicitude para presentarse á proba poderá entregarse no centro ata o día 15 de marzo.

Máis información no texto da resolución e nos ficheiros adxuntos.

No mes de Xaneiro, entre o 21 e o 27, o Departamento de Educación Física realizou unha Semana Branca coma tódolos anos. Este ano fomos á estación de Astún no pirineo aragonés. Na viaxe participaron alumnos dende 2º da ESO ata 1º de BAC. Foron un total de 63 rapaces e rapazas para disfrutar duns días de deporte e convivencia fora da casa. Tivemos moi bo tempo ainda que non moita neve, pero a suficiente para disfrutar de 5 días do placer do esquí. Quedamos moi satisfeitos da viaxe en xeral e pensamos que, a maioría deles,  tamén quedaron con ganas de repetir o próximo ano.

O mellor foi que volvemos sen lesions e iso é moi importante de cara a repetir.

Dende o Departamento estamos moi contentos da aceptación que ten esta viaxe entre os alumn@s.

Aquí deixamos un documento gráfico destes días.

O Departamento de Lingua Castelá, organizou un encontro literario entre Fernando Lalana, escritor de literatura infantil e xuvenil, e o noso alumnado de 1º ESO.

É o autor da novela "La tuneladora", que leu o alumnado este curso académico. O autor contestou ás súas preguntas, algunhas relacionadas coa obra e outras co oficio de escritor e a súa traxectoria profesional. A charla durou unha hora e despois unhas alumnas de 1ªESO E, Adela e Celtia, fixéronlle unha pequena entrevista para a radio.

Agradecer o seu tempo.

Seguindo co Plan Proxecta +, estas dúas semanas tivemos exposto na entrada do instituto 15 cartas de amor, debuxos de artistas da fama como Miguel Calatayud, Patricia Castelao, Jack Mircala, Pirusca entre moitos outros.

Con "Cartas de Amor", a Secretaría Xeral da Igualdade pretende establecer un paralelismo entre o mundo romántico das primeiras relacións de parella e a crueldade que, a veces, vai asociada a elas.

#proxecta+ #cartasamor

Co gallo da celebración, o 13 de Febreiro, do Día Internacional da Radio, o alumnado do Obradoiro de Radio de 1° da ESO traballou na elaboración dun podcast sobre o entroido que foi emitido no portal www.escolasnasondas.com.

O noso agradecemento a Ponte nas Ondas por darnos a oportunidade de amosar o noso traballo en Galicia e o Norte de Portugal.

Tamén queremos dar as grazas a Lupe Blanco e a Jenni Felpete pola súa colaboración na gravación dunhas regueifas e da muiñeira de Cerqueda para o podcast.

Por último os nosos parabéns ao alumnado participante:

Jorge Amado Bardanca

Adela Baldomir Moreira

Paula Caamaño Lamas

Dafne Cantelar Pena

Nerea Collazo Martínez

Marcos Lamas Angeriz

Yoel Moreira Lorenzo

Carla Picos Espasandín

Celtia Vázquez García

Laura Vilares Souto

Podedes escoitar o podcast no noso ivoox:

https://go.ivoox.com/rf/124337008

Organizado polo departamento de Lingua Castelá, o alumnado de 3ºESO acude hoxe día 1 de marzo, ao teatro Ágora, na cidade de A Coruña para ver a obra de teatro “La vida del Buscón”, que é unha adaptación da obra de Quevedo.
Rexenta Teatro leva vinte anos realizando campañas escolares por todo o país, apoiando aos departamentos de Literatura e Lingua, dos colexios e institutos, na lectura e estudo dos autores clásicos. Colaborou con compañías como Zascandil, *Ítaca e desde 2012 con Factoría Teatro.
Regenta teatro presenta a súa adaptación teatral da vida do Buscón de Francisco de Quevedo, unha novela picaresca que conta as aventuras de Pablo, un raparigo de orixe humilde e dubidosa cun forte desexo de mellorar a súa posición social.
A súa versión do Buscón expón unha competición entre cómicos por ver quen consegue interpretar o maior número de personaxes, do mesmo xeito que o Buscón, quen tamén se disfraza co fin de conseguir diñeiro, comida ou pousada mediante o engano e a burla. O seu gran soño é ser rico, para ser “alguén”, pero na sociedade o Século XVII, ese desexo non ten cabida.

Hoxe, mércores 28 de febreiro, ás 20.30 h estará o noso compañeiro Xurxo Souto, no Museo de Bergantiños para presentar o seu libro "Somos un pobo de artistas: O método Luísa Villalta", homenaxe á autora do Día das Letras Galegas.
Organiza Concellaría de Bibliotecas

Grazas a Escola de Nais e Pais do centro, o luns tivemos a sorte de poder disfrutar dunha estupenda charla levada a cargo por Juan Ramos, psicólogo da asociación ANHIDA, onde se tratou a desmotivavión na adolescencia dunha maneira moi entretida.
Dende o centro, gustaríanos agradecer a todas esas familias que tiveron a inquietude de formarse para mellorar a motivación dos seus fillos e buscar ferramentas prácticas para o seu día a día. Queremos salientar a importancia de formar parte da escola de nais e pais, xa que desde o centro consideramos esencial esta unión familia - escola, para poder potenciar as capacidades intrínsecas do noso alumnado.

Un xurado, formado por membros do Equipo da Biblioteca, decidiu o alumnado premiado no Concurso de cantigas de Entroido.

CATEGORÍA A:

1º premio: NURIA PENA TRIGO. 2º ESO C.

2º premio: SARAI FRANCO ROJO. 2º ESO D.

3º premio: HUGO NEGREIRA GARCÍA. 2º ESO A.

CATEGORÍA B:

1º premio: DELIA ANTELO SIMÓN. 4º ESO A.

2º premio: CELIA QUEIJO CAMBÓN. 4º ESO A.

3º premio: JULIA GARCÍA VILAR. 4º ESO A.

Parabéns aos gañadores e graciñas a todo o alumnado que participou e que demostrou a súa creatividade e enxeño escribindo cantigas relacionadas co Entroido e coplas satíricas sobre personaxes e temas actuais. Podedes ver unha selección das mellores cantigas nun taboleiro na entrada do instituto.

Tedes acceso ás cantigas gañadoradas na montaxe.