O luns 11 de marzo o alumnado de 2º de bacharelato tivo unha charla sobre os estudos na USC, nela participaron o profesor Pedro Rey e Belén Moldes, ex alumna do noso instituto.

LuminísTICas, a proposta do IES de Brión para a 3ª edición de Wisibilízalas, ven de ser recoñecida co 2º premio na categoría Sénior.

O pasado día 8 de marzo, coincidindo co Día Internacional da Muller , déuse a coñecer o fallo do xurado na web oficial de Wisibilízalas, un certame convocado polo  Departamento ETIC da Universidade Pompeu Fabra.

Este traballo foi elaborado por alumnado de TIC I de 1º de Bacharelato Científico Tecnolóxico coa colaboración de alumnado de EPVA de 4º de ESO no apartado gráfico e deseño web.

En LuminísTICas publicamos perfís, entrevistas e referencias de mulleres galegas ou formadas en Galicia que traballan co sector TIC e participan activamente en proxectos de divulgación de mulleres nas TIC.

Grazas a Natalia Costas Lago, Eva Cernadas García, Ana Cidre Perry, Sonia Lois García, Carmen Cotelo Queijo, Laura Milagros Castro Souto, María Saez Fernández, Mercedes Rodríguez García e Miriam Pena Villanueva pola súa colaboración con este proxecto.

Parabéns ao alumnado participante!

.

A fotografía Mentres máis preto esteas menos ves do  alumno de 1º de Bacharelato Carlos Andrés Ruíz Abete resultou seleccionada na modalidade de Fotografía na VI Olimpíada de Filosofía de Galicia. Neste curso académico o tema elexido para a Olimpíada é Realidade e apariencia no mundo actual.

O próximo xoves 14 de marzo, Carlos deberá realizar unha defensa de 5 minutos, explicando como naceu a idea, cal foi o seu proceso de realización, cal foi o nivel de participación do alumnado e a axuda recibida polo profesorado á hora de levala a cabo.

O gañador ou gañadora de cada modalidade na Olimpíada Galega ofreceráselles a posibilidade de participar na Olimpíada Estatal en representación da Olimpíada Galega, coa viaxe e os gastos pagados.

Todos os participantes e todas as participantes recibirán un diploma acreditativo de participación na Olimpíada Filosófica de Galicia.

PARABÉNS e QUE VIVA A FILOSOFÍA!!

Traballo realizado polo alumnado de Igualdade de Xénero (1º ESO).

Descarga o GIF en alta calidade.

.

Diante da xornada de folga de estudantes convocada para o día 8 de marzo a dirección do IES de Brión comunica o seguinte:

• O alumnado do IES de Brión dos cursos 3º e 4º de ESO e 1º e 2º de BAC decidíu secundar a folga convocada.
• O alumnado de 1º e 2º de ESO, segundo a normativa vixente, non poderá participar en ningún tipo de mobilización que supoña a non asistencia a clase como consecuencia dunha decisión colectiva. Tan só poderá sumarse á folga individualmente coa autorización expresa do pai/nai ou titor/a legal.
• O alumnado que non realice a xornada de folga será atendido polo profesorado con normalidade.

Durante os días 25 e 26 de febreiro o alumnado de 2º de ESO participou na hora de titoría nun obradoiro de sensibilización sobre os dereitos das persoas con discapacidade. Está actividade foi impartida por membros da Asociación AMIPA, que con dinámicas vivenciais explicaron as dificultades coas que se atopan no día a día as persoas que teñen algún tipo de discapacidade.

Estes días na entrada do IES de Brión temos a exposición sobre especies exóticas invasoras "UNHA INVASIÓN SILENCIOSA. A BIODIVERSIDADE BAIXO AMEAZA". Merece a pena parar un pouco a vela e reflexionar sobre un problema tan grave como esquecido, contra o que quizais podemos facacer algo. Botádelle un ollo!

As alumnas de 1º de Bacharelato Tania García, Antía Cunqueiro, Andrea Antelo e Alba Muñiz e o alumno Miguel Gil gañaron o premio ao mellor equipo na olimpíada de xeoloxía celebrada o pasado 13 de febreiro en Santiago, empatados con un grupo do IES Virxe dom Mar de Noia. Xeoloxía e traballo en equipo van da men, neste evento no que o noso alumnado destacou. Parabéns!

O IES de Brión participa na 3ª edición de Wisibilízalas, unha convocatoria do Departamento ETIC da Universidade Pompeu Fabra que presenta os seguintes obxectivos:

• Xerar reflexión nos institutos sobre a menor visibilidade das mulleres en ciencia e tecnoloxía
• Dar visibilidade a mulleres que traballan no ámbito das TIC
• Potenciar as referencias femininas no ámbito da ciencia e da tecnoloxía

A convocatoria consiste na creación dunha páxina web que describa a carreira de mulleres contemporáneas que traballen no ámbito das TIC.

LuminísTICas é a proposta presentada polo alumnado de TIC I de 1º de Bacharelato Científico Tecnolóxico coa colaboración de alumnado de EPVA de 4º de ESO. O traballo consiste nunha páxina web na que publicamos os perfís, entrevistas e referencias de mulleres galegas ou formadas en Galicia que traballan co sector TIC e participan activamente en proxectos de divulgación de mulleres nas TIC.

Queremos expresar o noso agradecemento a todas as mulleres que participaron no proxecto.

Este curso o departamento de inglés participou de novo no concurso de tradución da Comisión Europea Juvenes Translatores. A proba tivo lugar no mes de novembro e presentáronse seis alumnos/as de 2º de Bacharelato.

Onte, 4 de febreiro, anunciáronse os nomes dos gañadores do concurso 2018 – un por país membro da Unión Europea - e recibimos a gran noticia de que un ano máis o IES de Brión é o Centro da gañadora en España ….

Sara Picos Gómez

No mes de abril, Sara viaxará a Bruxelas para participar na ceremonia de entrega de premios na Comisión Europea. Congratulations!

A nova na prensa:

Sara Picos Gómez, alumna del IES de Brión, ganadora de un premio de la Unió Europea. La voz de Galicia, 05/02/2019

A alumna do IES de Brión Sara Picos Gómez, única española distinguida co premio "Juvenes Translatores" da comisión europea. Compostela24h.05/02/2019

Sara Picos gana el premio europeo de Juvenes Translatores desde Brión. El correo gallego, 05/02/2018