Intercambio de grupos

INTERCAMBIO A GUARDA - AARHUS (DINAMARCA).

Ven, 08/09/2023 - 23:10 — IES A Sangriña

Desde o pasado sábado 2 de setembro, 19 estudantes galegos e daneses participan no intercambio do IES A Sangriña da Guarda e o centro Aarhus Gymnasium Tilst, de Aarhus. Cun completo programa de actividades, foron convidados a coñecer e compartir a súa cultura e ensinanza, amosando unha hospitalidade e atención inmellorables.
Agradecemos desde aquí a todas as persoas que fan posibles estas experiencias tan sumamente enriquecedoras como inesquecibles para a rapazada.

Roteiro xeolóxico

Lun, 15/05/2023 - 13:20 — IES A Sangriña

O martes 2 de maio as alumnas e alumnos de Bioloxía, Xeoloxía e Ciencias Ambientais de 1º de Bacharelato e o alumnado do programa internacional procedente de Dimanarca e Italia realizaron un roteiro xeolóxico pola zona do Baixo Miño acompañados polo doutor en Xeoloxía Francisco Canosa.

INTERCAMBIO CON ITALIA

Mér, 01/02/2023 - 15:16 — IES A Sangriña

Desde o pasado luns, e ata o 6 de febreiro, 16 alumnos e alumnas de 1° de Bacharelato do IES A Sangriña están a realizar un intercambio co Liceo Francesco Angeloni, en Terni (Italia). Xa participaron en varias das clases do centro, coñeceron Terni e visitaron Roma. Nos próximos días tamén visitarán Perugia e Spoleto, ademais de realizar outras actividades académicas e culturais cos seus compañeiros italianos. Agradecemos desde aquí a magnífica acollida das familias e do profesorado implicados no intercambio, xa que están facilitando que esta experiencia sexa única e moi enriquecedora para os nosos alumnos e alumnas.

INTERCAMBIO A GUARDA - AARHUS (DINAMARCA).

Lun, 09/05/2022 - 12:09 — IES A Sangriña

Preme na imaxe para ver o vídeo.

Entre o 24 de abril e o 1 de maio, dez alumnas e dous alumnos de 1° de Bacharelato participaron nun intercambio con “Aarhus Gymnasium” (Dinamarca). Nesa semana recibimos ao alumnado dinamarqués e na maioría das ocasións, xunto cos seus correspondentes, participaron das actividades previstas no noso centro para esa semana que foron moitas e moi diversas:

O luns 25 de abril, dirixido a 1°Bach A e B: Itinerario xeolóxico pola contorna da Guarda”, organizado polo departamento de Bioloxía e enmarcada no ámbito dos Contratos-programa (liña Inclúe ámbito da Educación para a Convivencia).

O mércores 27 de abril, a rapazada de 1º de Bacharelato asistiu ao relatorio de Amelia Tiganus: “Conexións entre a violencia sexual, a pornografía e a prostitución: propostas éticas para vivir unha sexulidade saudable”. Esta charla foi organizada pola Comisión de Igualdade en colaboración co CIM da Guarda.

Asistiron tamén a un obradoiro de Técnicas básicas de primeiros auxilios: cadena de supervivencia, RCP básica, uso do desfibrilador e actuación ante obstrucción de vía aérea, con Pepe Palacios, organizado no ámbito dos Contratos-programa (liña INNOVA: ámbito de Educación para a Saúde), dirixido a 1° curso de todos os Ciclos formativos.

O xoves 28 de abril, alumnos e alumnas de 1º de Bacharelato baixaron ata o río para participar no obradoiro “Prevención de afogamento en ríos, organizado de novo no ámbito dos Contratos-programa (liña INNOVA: ámbito de Educación para a Saúde), tamén con Pepe Palacios.

Ademáis, este alumnado dinamarqués tamén participou na inmersión nalgunhas das clases do mércores, xoves e venres e puido gozar dunha visita a Santiago de Compostela o martes 26 de abril, así como unha andaina polos Muíños do Folón e do Picón, o venres 29 de abril.

O bo tempo facilitou moitísimo o desenvolvemento de todo o previsto.

Mención especial merece a colaboración das familias do alumnado participante, así como todo o profesorado implicado. Gustaríanos felicitalos e agradecer a súa magnífica disposición en todo momento.

Repetiremos!