Axenda 21 Escolar Galega, Dinamización da Biblioteca, Dinamización TIC, Normalización Lingüística, Calidade Educativa, Comisión de Convivencia, O Tesouro dos nosos avós, Xornadas Software Libre, Programas Internacionais e Intercambios, Contratos Programa, Éxito escolar, Grundtvig, Proxecto Abalar, Intercambio de grupos, MAC (Mobilidade Alumnos Comenius), Comenius Bilateral Dinamarca, Pegada Ecolóxica, Erasmus, Comenius multilateral ET2020, Comenius REGIO, Proxecta, Comenius Multilateral Open Street Maps, Erasmus+, Blog Axenda 21, Igualdade

Entrega de premios no IES A Sangriña

Mér, 19/06/2024 - 11:44 — IES A Sangriña

Premios Dinamización da Lingua Galega IES A Sangriña

Esta mañá, na Bibliotrega, entregáronse os premios de diferentes concursos organizados ao longo deste ano 2024 polo Equipo de Dinamización da Lingua Galega e polo Equipo de Dinamización da Biblioteca do IES A Sangriña.

Nas imaxes que ilustran esta noticia podedes ver a Daniela Pereira e Claudia Rodal e a Mario Alonso recollendo as súas acreditacións como gañadores do VII Concurso de Ilustración.

David Fernández Miniño foi galardoado cos premios O Apalpador de debuxo de Nadal e Rosalía de Castro de lettering. Recollendo o primeiro dos premios aparece acompañado polas finalistas Carla Iglesias e Mara Rodríguez e no segundo por Karen Castro (o outro finalista do concurso de lettering foi Iago Baz).

Finalista do premio de poesía Arrimar os lombos foi a alumna Jovana Ferre, aparece na fotografía con Mateo González e Marcos Giráldez que, xunto con Gabriel Sobrino, resultaron gañadores do certame.

Finalmente, a clase de 4º de ESO (grupo PDC) foi a vencedora do Concurso de bandeirolas do Día das Letras Galegas, do que o alumnado 1º de ESO B resultou finalista.

Moitas grazas a todo o estudantado participante nos concursos deste 2024!!!

Álbum de fotos do FESTIVAL DAS LETRAS '24

Xov, 23/05/2024 - 13:30 — IES A Sangriña

Festival das letras Sangriña 24

No IES A Sangriña fixemos unha grande festa para celebrar o Día das Letras Galegas. Na mañá do día 16 de maio bailamos e cantamos nun fantástico festival de música no que tocaron en directo The Tetas’ Van e MJ Pérez. Esta actividade organízouse en colaboración co Concello da Guarda e con financiamento da Deputación de Pontevedra.

Moitísmas grazas ás bandas pola súa implicación e colaboración. Pasámolo xenial!!!

Podes ver o álbum de fotos do festival aquí.

Festival das Letras Galegas 2024

Mér, 15/05/2024 - 13:08 — IES A Sangriña

web festival das letras 24

No IES A Sangriña imos celebrar o Día das Letras Galegas dunha maneira moi moi especial. Na mañá do día 16 de maio gozaremos dun grande festival de música no que estarán en concerto The Tetas’ Van e MJ Pérez. Esta actividade organízase en colaboración co Concello da Guarda e con financiamento da Deputación de Pontevedra.

The Tetas’ Van xuntouse por primeira vez no 2011 para participar nun concurso poñendo música a un poema de Ricardo Carvalho Calero, gañando o premio do público con Luisa Sorriso. Dende entón levan tocando por toda Galicia. Fan versións de clásicos do rock and roll, en inglés e en galego, reivindicando o papel da muller na escena galega.

MJ Pérez é unha das voces do panorama actual da música galega. Inicia o seu percorrido en 2014 e acumula máis de 150 concertos por toda Galicia e tamén Portugal. Suma xa catro álbums: un autoeditado e outros tres auto-producidos. Estivo presente en festivais e nos principáis circuítos musicais de Galicia.

Nas seguintes ligazóns podes escoitar un dos seus fantásticos temas:

"As alumnas" visítannos da man de Paula Carballeira

Xov, 02/05/2024 - 16:37 — IES A Sangriña

Paula Carballeira IES A Sangriña

O pasado martes día 30 de abril visitou o noso centro a escritora Paula Carballeira. Pero a súa visita xa comezara previamente, a pasada semana, cando "As alumnas" se meteu nas nosas aulas a través dunha serie de lecturas dramatizadas en 1º de Bacharelato nas que participaron os departamentos de Lingua Galega e Lingua Castelá. Esta obra, Premio Nacional de Literatura Dramática e Premio Follas Novas 2023 á mellor Obra de Teatro, foi o eixo sobre o que xirou esta actividade organizada pola Bibliotrega Magdalena Garabatos.

"As alumnas" foi escrita a partir dunha proposta de Fran Rei como representante de Culturactiva. Elvira Fontao e Rosa Lires, antigas alumnas de María Barbeito, volven atoparse na data da morte da mestra, no ano 1970. Xa son mulleres. Atrás queda a infancia, o mundo que lles abriu a mestra antes de que o Comité de Depuración a afastase do seu traballo na escola. Así, a memoria, as lembranzas que se van desenvolvendo neste xogo de persoas adultas que é o teatro, fannos descubrir como as decisións que se tomaron, e o medo e a rebeldía, marcan o seu destino.

Paula Carballeira (Maniños, Fene, 1972) é licenciada en Filoloxía e cun curso de Especialización en Arte Dramática, narradora oral profesional desde 1994, actriz, directora e escritora. Candidata dous anos consecutivos ao Astrid Lindgren Memorial Award, ten unha ampla produción literaria en narrativa e teatro, aínda que tamén escribe poesía e ensaio. Moitos dos seus libros foron premiados e traducidos a diferentes idiomas. Como actriz, é membro da compañía teatral Berrobambán desde 1996 e participou en varias series e programas da Televisión de Galicia. Como dramaturga recibiu o Premio Nacional de Literatura Dramática no ano 2023 por "As alumnas", publicado en Editorial Galaxia, onde tamén publicou "Daniel no peirao" (2023), un texto de teatro infantil arredor dun episodio da infancia de Castelao, ademais de "Nunca mascotas" (2016), "O lobishome de Candeán" (2012) e "As outras historias" (2011), entre outros.

Nota biográfica da autora na páxina web da Editorial Galaxia. Para consultar a información completa dos seus libro, preme aquí.