A pasada semana levamos  a cabo unhas sesións  ao redor do deporte do tenis. Isto é debido, entre outras cousas, ao acollemento ao comezo do curso dun programa educativo que promove a FGT (Federación Galega de Tenis) chamado, "Tenis na escola". Ceden temporalmente  material deportivo,  raquetas e pelotas, para poñer en práctica unhas sesións e dar a coñecer e promover este deporte entre o alumnado. Xa levamos catro anos acolléndonos a el, e coma os últimos anos, tivémola ocasión de que viñera a impartir as clases de xeito voluntario  o noso veciño, Justo, entrenador e fundador da Escola de Tenis, JUSTO AL REVÉS.

Moitísimas grazas polo teu interese e pola túa sabiduría.  Esperámoste para o vindeiro curso.

Mañá, día 16 de maio, estaremos festexando na escola os Maios, para o que crearemos tres maios coa colaboración de alumnado profesorado e familias. Remataremos a celebración cantando e bailando xuntas e xuntos.

Ademais, ao longo de toda a mañá, conmemoraremos as Letras Galegas e homenaxearemos ao autor Francisco Fernández del Riego. Aproveitamos para deixarvos por aquí este Genial.ly con enlaces a un montón de contidos e actividades sobre Don Paco. Esperamos que as desfrutedes!

E, lembrade, agardámosvos mañá na escola vestidas e vestidos para a ocasión, con camiseta de Centieiras ou outra parte de arriba branca, pantalón vaqueiro e sombreiro de flores. Ata mañá!

Ola, alumnado e familias!

Infórmovos da celebración da viséxima oitava edición da Milla Escolar organizada polo concello de Fene e que terá lugar o vindeiro domingo, día 14 de maio de 2023. As distancias a percorrer varían segundo as idades dos participantes pero oscilan entre os 50 metros e os 900 metros. 

A realización da mesma virá marcada polo tempo atmosférico previsto para esa data. No caso de ser bo levarase a cabo na Avda do Mar de San Valentín, e no caso contrario, no interior do pavillón polideportivo da Xunqueira, en San Valentín.

O desenvolvemento da xornada comezará aí das 11:00 horas e calcúlase que teña unha duración aproximada de hora e media, polo que remataría ao redor das 12:30 horas remataría. Comezarase coas carreiras das categorías máis superiores (cadetes) e rematando pola máis pequecha, categoría de Prebiberón 1.

Os participantes das categorías máis baixas (Educación Infantil: 3 anos - Prebiberón 1; 4 anos - Prebiberón 2; 5 anos - Biberón) sairán en quendas de 10 - 12 persoas para evitar aglomeracións e posibles caídas. Nestas categorías non haberá trofeos pero sí medalla para tódolos participantes. 

Ao remate de cada proba terá lugar a entrega de medallas a tódolos participantes e unha vez finalizadas todas as carreiras, entregaranse os trofeos aos tres primeiros clasificados de cada categoría, agás, como comentei anteriormente, as categorías pertencentes a Educación Infantil (Prebiberón 1, Prebiberón 2 e Biberón).

Diferenciaranse as categorías por anos de nacemento e aulas, así como por xénero masculino e feminino.

No caso de organizar as carreiras na Avda do Mar, adaptarase a saída de cada categoría á lonxitude da recta en franxas de 50 - 100 - 150 metros.

No caso de organizarse no interior do pavillón da Xunqueira, realizarase un circuíto en redondo de aproximadamente 125 metros, no que o percorrido determinarase por voltas.

• INSCRICIÓNS!!! 

a) EMAIL: cultura.deportes@fene.gal ou mercedes.justo@fene.gal

b) CONCELLO: Departamento de Cultura e Deportes (Prazo máximo de entrega ata as 13:00 horas do 10/05/2023).

c) MESMO DÍA DA CARREIRA: só se recollerán inscricións de última hora o mesmo día da carreira de 9:30h a 10:30h. 

Para calquera dúbida podedes chamar aos seguintes números de teléfonos: 607 615 962 // 981 340 366 

• RECOLLIDA DE DORSAIS

Os centros de ensino poderemos recoller os dorsais para posteriormente repartirllos ao alumnado para a celebración da carreira.

•  CATEGORÍAS

ALEVÍN: 5º e 6º EP. Nados en 2011 e 2012.

BENXAMÍN: 3º e 4º EP. Nados en 2013 e 2014.

PREBENXAMÍN: 1º e 2º EP. Nados en 2015 e 2016.

BIBERÓN: Infantil 5 anos. Nados no 2017.

PREBIBERÓN 2: Infantil 4 anos. Nados no 2018.

PREBIBERÓN 1: Infantil 3 anos. Nados no 2019.

Anímovos a que os rapaces e rapazas participen pois non deixa de ser unha verdadeira festa do deporte. Un xeito máis de que collan moitos valores positivos que transmite o deporte e que claramente nos axuda a ser millores persoas.

Todos aqueles que estedes interesados podedes comunicarllo directamente aos titores/as dos vosos fillos/as. Xa me informarán dos interesados/as e posteriormente xa cubro as follas de inscricións. (Agora facede caso da nota física que vos enviei no caso de anotarvos eu persoalmente). 

Desexo de corazón que sexa do voso interese.

Abel

Ola, familias!

Presentámosvos unha nova edición de CAMIÑO Á FAMA que realizamos este pasado venres, 5 de maio de 2023. Desta vez tocoulle aos pequenos e pequenas de 5º de educación infantil versionando un tema moi coñecido de Sebastian Yatra (Tacones Rojos). Un puro espectáculo destes/as artistas!!!

Hoxe venres, 5 de maio de 2023, tivemos a ocasión de desfrutar dunha visita teórico - práctica por parte do Clube de Atletismo Ría Ferrol. Formaban parte da expedición, ademais de dúas directivas máis un entrenador, a atleta da comarca, Campiona de España e internacional Sub-20, Diaou Diallo, na súa especialidade o triple salto.

Explicáronlle ao alumnado de sexto de educación primaria a importancia do deporte como medio do fomento da actividade física saudable, como medio de socialización e cohesión social e como ferramenta para a loita pola tolerancia, a igualdade e a non violencia de xénero no só no deporte, senón tamén na vida.

Posteriormente puxeron en práctica diversos xogos e actividades enfocadas cara a práctica de diferentes disciplinas ao redor do atletismo.

O alumnado quedou moi satisfeito coa xornada desenvolvida e invitáronnos a pór en práctica este deporte nas súas instalacións deportivas. A continuación sacáronse fotos e solicitáronlle autógrafos á verdadeira protagonista da xornada, Diaou Diallo.

Queremos agradecer ao Clube Ría de Ferrol a súa visita emplazándoos a volver a vernos en vindeiras ocasións.

Co bullying, tolerancia cero. Así nolo conta e explica o alumnado de 6ºEP como proxecto da materia de valores sociais e cívicos.

No Día Internacional Contra o Acoso Escolar, berramos ben alto STOP AO BULLYING. Non te cales, cóntao.

O xoves 27 de abril o alumnado de 3º EP, xunto co de 1º EP, acudiu a Radio Fene, gravar o programa "Crónicas de Centieiras" correspondente a este mes.

Deixámosvos o enlace para que o escoitedes, asi como algunhas fotos dos nenos e das nenas dentro do local de gravación, e agardando nas escaleiras a súa entrada para gravar.

http://173.255.131.18/audio/270423CRONICAS.mp3

O martes 30 de maio celebraremos o CENTIFEST!, a nosa feira escolar. Este ano será unha feira de xogos, como colofón final do noso proxecto de centro "A maxia do xogo".

Queres vir vernos ou participar na nosa feira? Reserva xa o día e anímate!

Ola familias!

Este luns, 24 de abril de 2023, tivemos unha formación básica de primeiros auxilios a cargo da Decana da Falcultade de Enfermería e Podoloxía do campus de Ferrol (UDC), Dona Enma Rodríguez Maseda, dirixida cara os cursos de cuarto, quinto e sexto de educación primaria. Foi unha xornada onde aprendemos algo tan básico como saber a que número de teléfono teriamos que chamar no caso dunha urxencia. Vimos como é o desenvolvemento dese proceso desde a sede central do 061, a calma con que se nos fala... Tamén aprendemos aspectos básicos da cadea de supervivencia, programa de alerta escolar así como os diferentes grados de queimaduras, maniobra de RCP, convulsións, hipoglucemia... e como sería o xeito de actuar. Ogallá esta formación básica sirva para poder actuar correctamente se nos vemos nesa tesitura, seguro que sí. Do mesmo xeito, quen sabe se algún neno/a chegará a ser alumnado da Decana por estudar ben enfermaría ou podoloxía. A decisión é só deles.

Agradecemos á Decana o seu tempo, sabiduría e gañas á hora de ofrecerse para poder darnos esta formación. Emplazámoste para vindeiras ocasións.

Ola, familias e alumnado!

Adxúntovos información relativa á FESTA DO DEPORTE ADAPTADO FENE 2023. Unhas xornadas teórico - prácticas ao redor da práctica deportiva dentro do ámbito funcional e organizada polo concello de Fene maila "ASCM Galicia".

Desexo que sexa do voso intererese.

Ola, familias e alumnado!

O pasado martes, mércores e xoves (18, 19 e 20 de marzo) tiveron lugar un ano máis, as xornadas de Atletismo Divertido por medio de XOGADE e o concello de Fene. Como o tempo acompañounos en todo momento favoreceu que poideramos empregar as instalacións deportivas de atletismo no lugar do Pazo, en Barallobre. Alí comapartimos experiencias durante tres días con outros rapaces e rapazas de todos os colexios de educación primaria do concello de Fene. Trátase dunhas xornadas de convivencia onde hai un pequeno grao de competitividade (san loxicamente) e cuns elementos fundamentais, o deporte como eixe vertebrador para facer exercicio, adquirir valores que nos forman como boas persoas e o divertimento. Poidemos desfrutar de varias disciplinas deportivas onde os rapaces e rapazas demostraron ser uns campións e campionas. Así practicaron varias disciplinas como por exemplo: lanzamento de xabelina, lanzamento de pelota, salto lateral a pés xuntos, salto a pés xuntos, salto con carreira previa, salto de tesoira, carreiras de velocidade, carreiras de relevos, carreira de relevos en gymcana... O alumnado pasouno xenial e o máis importante, trataron de facelo o millor posible dentro das posibilidades que ten cada un.

PARABÉNS a todos e a todas!!! 

Ola familias, ola rapazada!

Retomamos, á volta das vacacións, a tarefa coreográfica que estamos a desenvolver ao longo deste curso e que tanto éxito e acollida está a ter. Desta vez é unha coreografía grupal a cargo do alumnado de 1º e 2º de educación primaria. Para esta ocasión escolleron a canción "Libertad", de Nil Moliner. Outro exitazo!!!

Tamén vaivos o traballo individual feito pola nosa alumna de 1º, Andrea, que por motivos de saúde non poido estar físicamente connosco pero sí dalgún xeito representando a mesma canción. Marabilloso Andrea, fixéchelo xenial!!!

Durante o mes de marzo tivemos un espazo pop up no centro adicado ao xadrez. Durante os recreos, os nenos e nenas que querían podían vir ata a sala para xogar libremente, aprender, ensinar ou ver as partidas que estaban a acontecer.

Durante as dúas últimas semanas, organizamos un torneo por cursos e nos dous últimos días unhas partidas de "masters" coas persoas gañadoras de cada curso.Resulta que de cada 10 persoas que están federadas para xogar ao xadrez, soamente unha é muller, polo que quixemos aproximarnos a este deporte no cole e o resultado non puido ser mellor, xa que a penas había diferenza en números entre nenos e nenas que querían xogar e o resultado do torneo tamén foi terriblemente enriquecedor.

Estamos moi orgullosas da enorme participación (mais de 100 nenos e nenas viñeron xogar algunha vez e 50 persoas participaron no torneo, de 155 que somos no cole!) e de cara ao ano que vén pensamos que pode ser boa idea repetir, incluir partidas de peón para educación infantil e organizar partidas de persoas adultas, xa que con todo o que lles gusta o xadrez ás profes Cris e Iria non puideron xogar nin unha partida!

A día de hoxe publícase a listaxe de persoas admitidas para o curso 2023/2024, sendo aceptadas todas as solicitudes de admisión con 16 persoas en 4º de educación infantil e unha persoa nova que se suma a 6º EI

Benvidas!

E aquí está a nosa memoria de Observa_Acción 2023!

Estamos moi emocionadas de poder compartir unha experiencia así coa comunidade educativa.

E este é o vídeo-resumo das observacións (porque somos así: das comidas, reunións e risos que botamos mentres aprendiamos non hai fotos, estabamos moi ocupadas vivíndoo  )