Durante os últimos días de febreiro e comezo de marzo celebramos o Entroido na escola. Durante toda a semana fixemos o mandadiño levando diferentes disfraces (entre eles o do tradicional mascalleiro) e o venres cada un chegou disfrazado da súa casa como quixo.

Despois, no patio dos maiores, xuntámonos para amosar os nosos disfraces desfilando por clases e finalmente cantando todos xuntos e xuntas a canción Son de Bueu da comparsa "Vou nun Bou".

Ademais, durante eses días fixemos un traballo de investigación sobre o Entroido en Bueu. Cada equipo tiña que investigar sobre un tema distinto:

- A historia do Entroido en Bueu.

- As datas máis importantes.

- As comparsas.

- As receitas típicas do Entroido.

Unha vez recompilada toda a información, reunímonos por equipos para realizar unha posta en común e un mural coa información máis relevante. Aquí podedes ver como traballamos e o resultado da investigación.

Vemos aquí aos nenos e nenas de 2ºA compartindo os seus traballos e esforzos para elaborar un mural sobre o Entroido de Bueu con todo o material de investigación que trouxeron á escola.

O martes día 15 de febreiro o alumnado de 2º A asistiu a unha charla informativa sobre a vida das pilas na sociedade actual dentro da campaña RECICLA CON PILABOT.

O alumnado atopou nesta charla respostas a preguntas tales como: Que é unha pila? Que aparellos usan pilas? Quen inventou a pila?, Como evolucionou ao longo do tempo?, De que materiais está formada unha pila? Cantos tipos de pilas hai? Contaminan as pilas? É moi importante reciclalas?

A charla estivo moi interesante e aportou información  que alumnado demostrou  con moita  emoción e competitividade  na resolución do Kahoot final.

Estamos moi contentos de participar na campaña: RECICLA CON ENERXÍA CON PILABOT. Se premes na imaxe podes ter máis información sobre esta campaña.

Onte foi o DÍA ESCOLAR DA NON VIOLENCIA E DA PAZ, por iso nós conmemorámolo o pasado venres na nosa escola.

Ao longo da semana estivemos aprendendo as cancións RUMBA DAS APERTAS de Magín Blanco e IMAGINE de John Lennon para poder cantalas todxs xuntxs. Ademais cada aula estivo representada por un símbolo e un lema de paz, que recitamos neste día, e que tamén aprendemos a dicir en LINGUA DE SIGNOS. Tamén decoramos e escribimos o lema para decorar un mural colectivo que está na entrada da escola. Estes son os nosos lemas:

MEDRAMOS XUNTOS E XUNTAS NA PEDRA CANDO...

    "aprendemos a xogar xuntos"

    "axudamos aos demais"

    "nos apoiamos os uns aos outrxs"

Outra das actividades que fixemos foi construir POMBAS DE PAPIROFLEXIA.

Nas fotografías podedes ver o ben que o pasaron os nenos e nenas de 2º nesta celebración, na que por primeira vez no curso conseguimos xuntar a todo o alumnado e profesorado de primaria do centro.

Agardamos que vos gusten!

Aquí o alumnado de 2ºB prestando, en lingua de signos, a súa AXUDA a quen a necesite.

Neste vídeo podemos ver a alumnado de 2ºA cantando o retrouso da cantiga "A RUMBA DAS APERTAS" tamén o fan en lingua de signos. Tedes que premer na imaxe para ver o vídeo.

A finais de decembro e principios de xaneiro, o alumnado de 2º fomos os encargados de observar os datos do tempo meteorolóxico na caseta que temos no patio da escola, e logo de rexistrarlos no panel do recuncho das meteoescolas que temos no corredor da Biblioteca.

Como curiosidade, destacamos as altas temperaturas que observamos na semana do 15 ao 21 de decembro, un pouco anómalas para estar a piques de comezar o inverno. Xusto á volta das vacacións de Nadal recollemos no pluviómetro moitísima auga das precipitacións que caeron durante as vacacións. Tanto é así que botaba por fóra a auga do recipiente. Posteriormente, baixaron as temperaturas e aínda que non chegamos a baixo cero, tivemos a sorte de recoller a temperatura mínima deste curso, 3º.

Na primavera volveremos a ter oportunidade de comprobar se as temperaturas e precipitacións van acorde coa estación.