ACTIVIDADES EXTRAESCOLARES

Dentro das actividades da semana da igualdade, un grupo de alumnas realizaron unha entrevista telefónica en directo á escritora María Reimóndez.

O mércores 12 de febreiro tivo lugar na facultade de minas e enerxía do CUVI a XI Olimpiada de Xeoloxía onde participaron oito alumnos de 4º ESO do noso centro.

Pola mañá tiveron que facer  fronte a 7 probas tipo xincana en equipos polo Campus da Universidade e pola tarde un test de cuarenta preguntas de maneira individual. Mentres o xurado correxía as probas participaron en talleres moi interesantes sobre paleontoloxía, xeotecnia e mineraloxía.

Josúe Troncoso obtivo o premio o mellor alumno de cuarto da ESO. Noraboa!

Foi unha experiencia compartir o día con alumnos doutros centros da provincia, visitar a universidade e aprender máis sobre xeoloxía.

O IES Terra de Turonio de Gondomar acolle a inauguración da exposición itinerante "Xosé Mosquera Pérez, O Vello dos Contos", unha mostra de fotos dos anos 30 e 40 que está circulando por centros educativos de Galicia e Norte de Portugal para divulgar a vida e obra deste importante persoeiro e os II Premios Internacionais de Podcast O Vello dos Contos, na semana do Día Mundial da Radio.

Ademais de inaugurar a exposición, realizouse un programa de radio desde o estudio de Radio Turonio e un equipo de TVE gravou unha reportaxe para emitir o 13 de febreiro, Día Mundial da Radio.

Este mércores visitaron o IES Terra de Turonio a domadora galega Irene Gefaell e a deportista Desiré Vila, ex alumna do centro.

Irene Gefaell achegouse ao centro para impartir unha charla ao alumnado do Ciclo de Actividades Físico-Deportivas no Medio Natural e a alumnado da ESO. Antes diso gravou unha entrevista en Radio Turonio, a radio do centro. Raquel foi a alumna encargada de preguntar pola súa relación cos cabalos. No Ciclo impártese un módulo onde o alumnado aprende a montar para conducir grupos a cabalo.

Irene Gefaell falou sobre a súa experiencia na doma de cabalos e en diversos aspectos do mundo equino como a súa biomecánica, etoloxía e coidados. Que sinte un cabalo? Como ve o mundo? Cal é a súa vida? Estas foron algunhas das preguntas ás que Irene deu resposta acompañada de imaxes e vídeos da súa experiencia. Irene é unha recoñecida especialista en doma natural e conta cun centro de recuperación cabalar destinado a equinos maltratados.

Tamén tivo oportunidade de coñecer o proxecto Ceibes no monte (www.ceibesnomonte.com) que o instituto desenvolve desde hai anos e no que se realizaron exposicións e publicacións como o libro Ceibes no monte co que foi agasallada.

Irene Gefaell ten impartido charlas por toda a península ibérica. Naceu en Portugal e actualmente reside en Pontevedra.

Desi Vila, ex alumna do centro, foi recibida cunha calorosa ovación por parte do alumnado do centro. A súa exposición foi todo o percorrido pola súa carreira de superación persoal que a levou a converterse nunha deportista que vai competir no próximo mundial de atletismo en Dubai do 7 ao 15 de novembro. Precisamente este foi un dos últimos actos antes de partir para o campionato mundial o vindeiro sábado.

Desi lembrou o seu paso polo instituto e aos seus colegas que aínda conserva como amizades. Falou sobre o seu accidente como ximnasta e do posterior proceso de adaptación ás próteses. Contou que o deporte sempre foi unha faceta que estivo presente na súa vida e que agora mesmo é un dos seus intereses principais xunto coa súa formación, a carreira de Relacións Internacionais en Madrid, onde reside.

Desi tamén gravou unha entrevista en Radio Turonio e atendeu todas as solicitudes de fotos e selfies do alumnado.

Desde o instituto van transmitirlle a Desi todo o apoio para que o campionato do mundo de Dubai sexa un éxito para poder estar en Tokio nos próximos xogos olímpicos.

Desde a dirección do IES Terra de Turonio véñense realizando actividades que promoven a igualdade e ao mesmo tempo poñen en valor o esforzo e o exemplo de mulleres que son modelos para o alumnado.

Profesores nas ondas

Alumnos e alumnas  de 4º da ESO poden explicar como se fai un podcast, un programa de radio ou unha retransmisión radiofónica. Iso foi o que fixeron na Universidade de Vigo un grupo os estudantes do IES Terra de Turonio de Gondomar representando a Ponte...nas ondas! no Master do Profesorado,  xunto con Santiago Veloso, profesor do centro.

            No noso instituto, un dos centros de Ponte...nas ondas!, realizan emisións en directo a través de Internet, elaboran podcasts de diversas temáticas e difunden vídeos e audios a través das redes sociais e Whatsapp.

            O pedagogo e profesor do Master da Universidade de Vigo, Xosé Manuel Cid introduciu as dúas sesións e destacou a traxectoria de Ponte...nas ondas! como unha das iniciativas de renovación pedagóxica e innovación educativa máis importantes das últimas décadas.  Ademais salientou o papel realizado polas escolas galegas e portuguesas na recuperación e posta en valor do patrimonio común inmaterial.

            Entre os asistentes, estaban os grupos de graduados de diversas especialidades de  Ciencias e Tecnoloxías,  Formación profesional, FOL, Servizos á Comunidade, Linguas estranxeiras,   Linguas oficiais, etc. O interese dos graduados da Universidade de Vigo que cursan o Master de formación do profesorado por Ponte...nas ondas! está na súa aplicación didáctica nas aulas como unha metodoloxía  transversal ás diversas áreas do currículo formativo do alumnado.

            Jessi Iglesias, relatou a súa experiencia en Radio Turonio, a radio do instituto, desde 1º da ESO no que comezou a facer programas. Tamén contou como participou nese curso na retransmisión do acto de entrega de premios  Lois Peña Novo desde o Castelo de Soutomaior. Desde entón Jessi ten entrevistado a xornalistas como Xaime Escudeiro da Radio Galega e realizado programas e podcasts.

            Carlos Enrique Pérez foi o encargado de explicar a inauguración do portal Web www.escolasnasondas.com que el mesmo presentou xunto ao entón Reitor, Salustiano Mato,  na radio do instituto. Carlos non descarta dedicarse á comunicación e dixo que xa superou a súa fase de Youtuber e que agora está centrado na música.

Araitz Aldamizetxebarría,  xunto con Jessi González,  foron as encargadas de realizar unha lectura poética do texto “Libre o meu pensamento” de Ana Romaní con motivo do Día de Rosalía de Castro. Araitz detallou a realización de podcats para a materia de Lingua Galega ou para a radio empregando programas como Audacity ou Ivoox.

            Claudia Comesaña, que xa participara no curso pasado nunha xornada do Master, explicou como funciona a radio no centro e como participaron no Día Mundial da Radio xunto coa Escola Secundaria de Valença do Minho realizando un programa conxunto desde a Radio Municipal de Tui.

            Santiago Veloso, profesor e coordenador de Ponte...nas ondas! destacou a fórmula integradora e novidosa no ámbito da alfabetización multimedia que desde hai máis de dúas décadas se desenvolve nos centros educativos. Desde as primeiras actividades de radio escolar nos anos 90 até a actualidade dos podcasts e os vídeos por Whatsapp, diversas foron as experiencias realizadas nos centros educativos. O empoderamento do alumnado diante dos micrófonos contribúe a desenvolver as competencias básicas e a mellorar a súa formación integral.

            A  exposición do proxecto de Ponte...nas ondas! contemplou diversas proxeccións onde se mostrou o traballo co patrimonio inmaterial galego-portugués ao longo destes 25 anos. Esta abordaxe do patrimonio común a través da radio e das novas tecnoloxías espertou o interese dos graduados que se interesaron por actividades como os encontros de xogos tradicionais, os tesouros humanos vivos ou as recollas de patrimonio inmaterial realizadas desde as escolas.