Skip to Content

Exposición "Cartas de amor"

Dentro do Plan Proxecta 2019-2020, Por 365 días de respecto e igualdade a contamos no noso centro coa exposición Cartas de amor: 15 artistas contra a violencia de xénero. Permanecerá no centro ata o vindeiro 26 de febreiro de 2020.

Trátase de 15 marabillosos cadros que nos convidan a reflexionar sobre diferentes situacións ou momentos violentos nas relacións de parellas entre adolescentes e que, en ocasións, damos como normalizadas, cando, en realidade, estamos ante mostras de control cara á muller, así pois preténdese sensibilizar a poboación máis nova sobre a existencia de violencia nos seus modos de relacionarse, axudar a detectala e, polo tanto, a eliminala.

Esta exposición está aberta ao público en xeral, mais dun xeito especial, dende o centro, queremos convidar a toda a comunidade educativa a visitala e compartir con nós as súas reflexións.

Charla informativa sobre agresións e violencia sexual

Onte luns, día 17 de febreiro, o alumnado de 3º e 4º da ESO asistiu a unha charla informativa sobre Agresións e violencia sexual impartida por Angélica Mercado e promovida pola Secretaría Xeral de Igualdade dentro do Plan Proxecta 2019-2020: Por 365 días de respecto e igualdade.

Angélica Mercado, especialista universitaria en estudos de xénero e políticas de igualdade falounos polo miúdo sobre como identificar actuacións que poden ser consideradas como situacións de agresión e violencia sexual e, ao mesmo tempo, ensinounos estratexias que nos poden axudar a detectar todas estas situacións que van en contra da nosa integridade afectiva-sexual. Alén disto tamén nos deu algunhas claves para aprender a dicir NON e a aceptar ese NON, facendo especial fincapé en que o consentimento ha de ser libre, afirmativo, específico, consensuado e reversible.

Deixámosvos algunhas fotografías de distintos momentos da charla.

Semana Branca - Andorra V

O venres, o noso último día da Semana Branca en Andorra, amenceu soleado e gozamos doutro espléndido día de sol.

Asistimos ao curso de esquí e snow e recollemos os diplomas.

Tras o xantar puidemos esquiar pola nosa conta ata as 15:00h.

Despois de devolver o material de esquí, pasamos polo hotel para darnos unha ducha rápida, recoller as nosas maletas e emprender viaxe cara a Xove. Saímos moi cansos pero á vez moi satisfeitos dunha semana de deporte e convivencia da que, con seguridade, nos lembraremos durante moito tempo.

Agárdanos unha longa viaxe e esperamos chegar ao IES Illa de Sarón sobre as 10:00-11:00 da mañá do sábado día 8.

Semana Branca - Andorra IV

A xornada do xoves transcorreu dentro da normalidade, tivemos que visitar a enfermería, pero nada grave.

Erguémonos cedo, almorzamos e subímos ás pistas. O sol foi xeneroso con nós, ao igual que toda a semana.

O alumnado asistiu ao curso de esquí e hai quen xa domina a técnica marabillosamente. Houbo tamén quen pretendía quedar na cafetería toda a mañá, mais finalmente foi e regresou encantad@.

Despois de xantar, coma todos os días, houbo tempo para esquí libre polo Tarter.

Parece que, por fin, ao 100% lles gusta este deporte de inverno.

De volta á cidade pola tarde, e despois dunha boa ducha, paseamos polo centro urbano e realizamos ás últimas compras.

Despois de cear, organizamos as quendas das duchas do venres antes de sair cara Xove e voltamos ao centro para ver a cidade nocturna.

Agora xa só queda preparar as maletas e repoñer forzas para afrontar o último día en Grandvalira, Soldeu-el Tarter.

Semana Branca - Andorra III

A xornada do mércores transcorreu sen novidade. Bo tempo, boas condicións de neve, moita ilusión e novas sensacións ao descubriren novas pistas. E sen lesións, que é moi importante!

Pola tarde noite saímos por Andorra pasear e facer algunha compra.

Xa pola noite, despois de cear, repuxemos forzas para afrontar a xornada do xoves.

Seguiremos informando...

Semana Branca - Andorra II

Esta mañá de martes amenceu cunha temperatura máis alta do normal para esta época do ano, mais tamén con moito vento que foi amainando ao longo da mañá.

O alumnado despois de erguerse ás 07:00h asistiu ao curso de esquí e  segue aumentando o seu dominio e a súa capacidade para superar novos retos.

O cansazo segue estando presente, mais tamén a ilusión por mellorar neste deporte fan que non se decaten das maniotas e que todo sexa máis levadeiro.

Rematamos a xornada no Centro Termal CALDEA onde relaxamos os músculos e compartimos dúas extraordinarias horas.

Todo segue o seu ritmo normal!!!

Deixamos algunhas fotos.... e seguiremos informando.

Semana Branca - Andorra I

Despois dunha longa viaxe de 14 horas, chegamos a Andorra á mediodía, xantamos e fomos recoller o material de esquí.

O luns ás 7 da mañá tocou o espertador, percibíase o cansazo acumulado pero tamén as gañas e a ilusión por pisar a neve e experimentar novas sensacións. Almorzamos e ás 8:00 estabamos indo cara ao autobús para subir á estación de El Tarter en Grandvallira.

SarónSpot - Concurso de mensaxes comerciais

O IES Illa de Sarón convoca o concurso de Mensaxes comerciais "SarónSpot"

BASES DO CONCURSO

  1. Participantes: pode participar toda a comunidade educativa do IES Illa de Sarón do curso 2019/2020. A participación pode ser individual ou grupal.
  2. Categorías: única.
  3. Presentación: será obxecto deste concurso vídeos editados polo autor ou autores.
  4. A temática dos vídeos será unha publicidade positiva do noso centro, dando visibilidade ós ciclos formativos que se imparte.
  5. Requisitos a cumprir: Cada vídeo presentarase en arquivo dixital (MPEG, MOV, MP4) non superior a 700MB para o visionado do xurado. Nas obras presentadas NON figurarán os créditos. Se é seleccionado, o autor/es comprometese a presentar unha copia dixital HD para a súa proxección pública e nesta figurarán os créditos.
  6. Non excederá de 4 minutos.
  7. Non se admiten traballos entregados despois do 2 de marzo de 2020.
  8. Engregarase a obra nun dispositivo de memoria cun alcume como nome do arquivo. Acompañarase cun sobre pechado no que por fora figure este mesmo alcume e conteña dentro un documento no que figure o alcume do autor/es do traballo co nome e apelidos dos autores. Todo isto meterase nun sobre máis grande sen identificacións e entregarase en conserxería.
  9. O gañador cede o uso de vídeo para a promoción do IES Illa de Sarón.
  10. Premiso: Diplomas acreditativos para os tres mellores e un vale de 50€ para a compra de material escolar ou material tecnolóxico para o gañador.
  11. A entrega do premio e os diplomas terá lugar o 10 de marzo.

 

Bo Nadal!

Actividades BiblioSarón

Participa no troco de libros organizado pola biblioteca do IES Illa de Sarón!

  

 

 

Distribuir contido