O 25 de novembro celébrase o día Internacional de loita contra a violencia de xénero. Dende o noso centro e coa colaboración da concellería de Educación, Traballo e Benestar social do concello de Carral, imos celebrar as seguintes actividades. Deste xeito, contribuiremos á construcción dunha sociedade máis concienciada para que nun futuro non sexa necesario celebrar este día.
MANIFESTO
O 25 de novembro é a data elixida polas Nacións Unidas para conmemorar o Día internacional da eliminación da violencia contra a muller.
É por isto polo que os alumnos e as alumnas de 4º ESO PDC do IES de Carral queremos achegar a nosa solidariedade con este manifesto que titulamos:
“SEN BÁGOAS DE MULLER”
1º Rexeitamos de xeito contundente a violencia de xénero. Cómpre plantarlle cara ao maltrato machista, porque empobrece a nosa sociedade e pode causar morte ou anulación da persoa.
2º Condenamos calquera acto de violencia contra a muller, non admitindo ninguna xustificación e, ao mesmo tempo, manifestamos noxo diante da chamada “violencia invisible”, expresada en supostos chistes machistas.
3º Belén, Rosa, Aurora, Estela, Yadira, Alejandra, Mencía ....... e tantas outras vítimas da violencia machista. Indignámonos, estremecémonos e berramos .... por que?
4º O maltrato, ademais de atentar contra a dignidade e a integridade das persoas, é un delito que a sociedade debe coñecer. E o maltratador debería cumprir, cando menos, cadea perpetua, como perpetuo foi o inferno que lle fixo pasar á súa vítima.
5º Choramos polas asasinadas este ano e todos os anteriores, neste infinito pranto, e tamén polas outras vítimas que viven cada día unha morte silenzosa nos seus fogares, en moitos casos créndose culpables ou xustificando o seu agresor, atrapadas nun amor posesivo e dependente.
6º Non debemos de mirar para outro lado, non ficar impasibles ante este horror. Non é un asunto privado; calquera muller pode ser vítima de malos tratos (físicos, sociais, sexuais, verbais, ...), xa que a violencia non discrimina por idade, profesión, ideoloxía ou nivel cultural. A muller non é escrava de nada nin de ninguén.
7º Queremos espertar as conciencias diante desta grande inxustiza e sufrimento, polo que berramos con todas as nosas forzas
VIOLENCIA MACHISTA, ABONDA XA ESTE ETERNO LOITO!
Carral, 25 de novembro de 2015
Elaborado e asinado polo alumnado de 4º ESO PDC do IES de Carral:
Marta Candal Corral
José Manuel Castro Díaz
Valeria Celemín Hernández
Andrea Cortés Insua
Fátima Insua Solmo
Javier Piñeiro González
Alejandro Roel Barreto
Alejandro Sánchez Rodríguez
Mércores, 25 de novembro
I Concurso de Lemas contra a Violencia de Xénero
Bases:
1. Poderá presentarse todo o alumnado do centro por clases. Non se permitirá a participación individual, xa que se trata dun traballo de equipo.
2. O obxecto do concurso é a elaboración de lemas para a campaña de sensiblización contra a violencia de xénero, en galego, orixinais e inéditos.
3. Cada grupo presentará o seu lema en cartolina cun tamaño mínimo de A2.
4. Os lemas portaranse publicamente durante a andaina que terá lugar o 25 de novembro dende o centro educativo ata a praza do concello.
5. O prazo de presentación rematará o 25 de novembro.
6. O xurado, formado por membros da concellería de Educación, Traballo e Benestar social do Concello de Carral e docentes do IES de Carral, fallará o concurso o 25 de novembro.
7. Premio: o grupo gañador recibirá un agasallo concedido por cortesía do concello de Carral.
8. A presentación de lemas a este concurso supón a aceptación das bases do mesmo e o fallo do xurado será inapelable.
A CLASE GAÑADORA DO CONCURSO DE LEMAS FOI: 1º B
NORABOA!
Andaina "Contra a violencia de xénero"
O 25 de novembro, en colaboración coa concellería de Educación, Traballo e Benestar social do concello de Carral, o alumnado e o equipo docente do IES de Carral, realizaremos unha andaina ás 12:30 horas. Para manifestar o noso profundo rexeitamento en contra da violencia de xénero, levaremos prendas de cor violeta durante o percorrido. Cada grupo de alumnos exhibirá a súa pancarta ata a praza do concello, onde terá lugar a lectura dun manifesto en contra da violencia de xénero e do relato gañador do I Concurso de relato curto "Non máis violencia de xénero".
Ademáis, tentaremos aprender esta canción,"Que nadie calle tu verdad", interpretada por Malú e Manu Carrasco, para cantala durante o percorrido.
I Concurso de relato curto "NON MÁIS VIOLENCIA DE XÉNERO"
Con motivo do día Internacional da loita contra a violencia de xénero, 25 de novembro, a Biblioteca "Pasando Páxina" do I.E.S. de Carral e a Concellería de Traballo e Benestar Social do Concello de Carral, convocan o I Concurso de Relato contra a Violencia de Xénero. As bases para participar no concurso son as seguintes:
Bases
1. Poderán concorrer ao certame todos os alumnos da E.S.O que o dexesen e que presenten os seus orixinais escritos en galego.
2. Cada participante poderá presentar un relato.
3. Todos os relatos presentados deberán ser orixinais, inéditos e non ter sido gañadores noutro concurso.
4. Os relatos terán unha extensión mínima dunha folla e un máximo de tres, letra Arial 12, espaciado dobre.
5. Os traballos presentaranse sen firma con pseudónimo e título do relato nun sobre pechado. Dentro deste sobre irá escrito con claridade o nome, o apelido , e o curso.
6. Os participantes deberán entregar os traballos o Martes 24 ás 10.10 horas na Biblioteca.
7. O alumno gañador recibirá un agasallo concedido por cortesía do concello de Carral e outro pola Biblioteca do centro.
8. O xurado estará integrado por profesores dos Departamentos de Linguas, e Membros da Concellería de Traballo e Benestar Social.
9. Os premios entregaranse o 25 de novembro.
RESULTOU GAÑADORA DO CONCURSO DE RELATO CURTO: PAULA REY ARES (4º A)
NORABOA!
Anexo | Tamaño |
---|---|
MANIFESTO MALTRATO.pdf | 84.27 KB |