Skip to Content

8 M.IGUALDADE XA!

Dom, 03/19/2023 - 09:10 — netguillerm

 

Xa sabes que o día 8 de marzo é o día Internacional da Muller. Este día reivindicamos a loita da muller pola igualdade e pola participación activa na sociedade. No cole fixemos unha manchea de actividades coas que pretendemos amosar o noso rexeitamento a estas situacións de desigualdade.

Nas aulas elaboramos unhas fermosas siluetas para o noso mural central, logo fixemos unhas canisetas de papel ben fermosas nas que a artista baionesa Irene Silva estampou un símbolo que reivindica a igualdade. Penduramos esas camisetas nunha tendedeira na entrada do cole e finalizamos cun acto central de intercambio de camisetas co que simbolizamos a nosa postura a prol da igualdade efectiva.

Na seguinte ligazón podes ver un vídeo resumo das actividades, agardamos que vos guste.

Moitas grazas a todas e todos pola vosa colaboración.

 

 

PREMIO "AIRIÑOS"

Mar, 03/14/2023 - 20:18 — belen.beci

O CASAMENTO DOS PAXARIÑOS

Ven, 02/24/2023 - 10:27 — netguillerm

A partir da candeloria, ningunha ave voa soa di o refrán para lembrar que o mes de febreiro comeza, na cultura popular, cunha celebración ben especial, xa que casan os paxariños, comeza o retorno das aves migratorias e os cortexos preludian ese renacer primaveral.

Da importancia que ten esta representación na imaxinaría tradicional europea dá conta a multitude de estampas nas que, desde tempos inmemoriais, o símbolo do amor e a unión sentimental son apaixonadas parellas de aves xuntando os peteiros. Tal é así que algunhas persoas defenden que, para nós, o 2 de febreiro debe ser a data do amor romántico, e non a que se celebra doce días máis tarde na honra dun crego romano do século III, chamado Valentín, representado cun rapazolo gordecho e voador que anda aseteando a xente… onde vai parar! Non hai comparación!

Como pasou con outras datas –por exemplo, coa noite de San Xoán–, a Igrexa acabou cristianizando a celebración pagá que tiña lugar o 2 de febreiro: o día da Candeloria.

A Candeloria tamén serve para anunciar a chegada máis ou menos próxima da primavera: “Cando a Candeloria chora, o inverno xa vai fóra; cando a Candeloria ri, o inverno está por vir”. É o mesmo concepto que o Día da Marmota estadounidense, cando este animal prevé a chegada inminente da nova estación (ou non).

Velaquí os estupendos traballiños que fixemos para conmemorar esta data.

 

DÍA DA PAZ

Xov, 01/19/2023 - 11:32 — belen.beci

A HISTORIA DE SADAKO E AS MIL GRÚAS

Segundo unha lenda xaponesa, o teu maior desexo farase realidade, se constrúes mil grúas de papel. A consígna de crear grúas de papel na loita pola paz, remóntase á historia dunha das pequenas vítimas da bomba de Hiroshima durante a Segunda Guerra Mundial.

Sadako Sasaki tiña dous anos cando caeu a bomba en Hiroshima,cidade na que vivía. Dez anos máis tarde (cando

tiña 12 anos), como consecuencia da irradiación que lle produciu a bomba de Hiroshima, os médicos diagnosticáronlle leucemia.

Cando a pequena Sadako estaba no hospital recuperándose da súa enfermidade, a súa amiga Chizucho explicoulle a historia das1.000 grúas de papel. A historia consiste en que se desexas algo con moita forza e constrúes 1.000 grúas de papel (papiroflexia), os deuses concederanche ese desexo que tanto anhelas.

É así como Sadako desexou curarse da súa terrible enfermidade e para iso propúxose construír por si mesmas 1.000 grúas de papel, aínda que non logrou conseguilo 

porque faleceu moito antes de poder acabalas todas. Morreu en outubro de 1955 e só

conseguira encartar 644 grúas de papel. Simbólicamente, os seus amigos continuaron 

a súa misión e completaron as mil grúas, coa esperanza de que se evitasen as guerras 

no futuro e conseguísese a paz entre todos os países do mundo. Tres anos máis tarde 

da morte de Sadako, os nenos e nenas de toda a cidade de Hiroshima dedicáronlle 

unha estatua dela cunha grúa na súa man. A estatua está no Parque da Paz de Hiroshima.

Xustificación do proxecto

O RETO PARA O DÍA DA PAZ

O reto será facer 1000 grúas de papel que colgaremos no centro.

 

Esta actividade de papiroflexia farémola entre os/as alumnos/as, as familias e o profesorado. Durante a súa elaboración  teremos que desexar que remate a guerra e así conseguir superar o reto.

VÍDEO EXPLICATIVO DE COMO FACER UNHA GRÚA DE PAPEL

https://www.youtube.com/watch?v=LLbWxDWqtQg&ab_channel=Papelisimo

 

 

VISITA DO APALPADOR

Ven, 12/23/2022 - 07:56 — netguillerm

Vaia sorpresa máis agradable recibimos para rematar o trimestre e, xa que logo, o derradeiro día de clase do ano 2022. O Apalpador e varias das súas acompañantes achegáronse ao cole a traernos unha morea de ilusión e vos desexos para estas datas de Nadal e para o vindeiro ano 2023 que xa chega. Ademais achegáronse cun bo lote de xogos para todas as aulas e para a biblioteca que a bo seguro desfrutaremos.

Moitas grazas á Anpa do noso cole por facelo posible e por ese rico chocolate quentiño que tan ben nos fixo.

Aquí vos deixamos testemuño do acontecido e aproveitamos para desevarnos que gocedes moito destas festas.

 

O APALPADOR XA ESTÁ AQUÍ!

Mar, 12/20/2022 - 22:48 — netguillerm

Achegámonos ás datas do Nadal e non podemos deixar pasar por alto a unha figura tradicional do Nadal galego como é o Apalpador. Vaia por diante que a tradición do Apalpador e a Noite do Apalpadoiro estaban totalmente perdidas á entrada do actual milenio. Afortunadamente mantíñanse na lembranza dunhas persoas nadas na primeira metade do século XX e que as viviran de pequenas. Grazas a elas, ao estudo por parte duns poucos e ao esforzo de moitas persoas, podemos dicir que, aínda que quede moito camiño, algo se ten andado xa.

 

 

Aquí vos deixamos información sobre a figura deste persoeiro que a bo seguro será do voso interese.

Cantos de vós coñecedes en profundidade ao carboeiro máis senlleiro do nadal galego?

 

Desde Orgullo Galego apórtannos o seu gran de area na recuperación das figuras mitolóxicas e tradicionais da Galiza.

Quen é? De onde é propio? Cando aparece? OApalpador na cultura tradicional galega e a súa recuperación no século XXI son preguntas que achan resposta neste artigo onde tamén atopamos unha ligazón a este magnífico documental realizado pola Gentalha do Pichel con decenas de grabacións que dan boa conta da súa existencia.

 

 

 

 

 

 Historia de Galicia

 

Desde o portal de Historia de Galicia nos deixan algunhas evidencias dunha tradición case extinta.

 

 

 

 

 

En apalpador.gal atoparás información sobre: Quen é? As súas orixes, outros personaxes do Nadal, así como unha morea de recursos en formato de láminas e imaxes para colorear,  exemplos de actividades e moitas cousas máis.

 

Dende o Portal da Lingua tamén nos ofrecen unha actividade na que, a través de sinxelos exercicios e xogos, o alumnado dos primeiros cursos de primaria coñecerá mellor a figura máis tradicional do Nadal galego, o Apalpador.

 

VIEIROS DA ESCOLA

Hai xa anos desde Vieiros nos ofrecían unha man chea de ferramentas moi útiles para coñecer máis sobre esta figura.

Aquí vos deixamos a ligazón a unha presentación feita con "Genially" da que seguro que gozaderes.

 

 

Conmemoración do Día Internacional da Eliminación da Violencia contra as mulleres

Ven, 11/25/2022 - 09:28 — netguillerm

Neste curso 2022/2023, afondamos as orixes do 25N a través dunha actividade onde o alumnado deberá surcar as ondas moradas.

Con ela, coñeceremos a historia deste día, así como a historia de mulleres que tiveron que pasar por este trance e que axudan na súa eliminación. 

 

CHEGOU O CICLO DO INVERNO. CHEGOU A FESTA DAS CABAZAS.

Dom, 11/06/2022 - 09:29 — netguillerm

Un ano máis velaquí tedes unha pequena vídeomontaxe coas cabazas que trouxestes. Moitos parabéns e moitas grazas pola vosa paticipación. Agardamos que teñades un moi bo paso polo ciclo de Inverno. Para ver a montaxe non tedes máis que premer na imaxe.

 

 

 

A NOITE DE DEFUNTOS: CRENZAS E TRADICIÓNS.

Sáb, 10/29/2022 - 08:58 — netguillerm

Todas as culturas do mundo, dende que o home é home, estableceron rituais para honrar e conmemorar os seus mortos. A orixe do noso actual Día de Defuntos pérdese, xa que logo, na noite dos tempos, por iso as celebracións de hoxe en día son herdeiras de antigas tradicións, ritos e crenzas que como pobo construímos ao longo da nosa historia.

En moitos lugares por estas datas lembran que ían pedir polas almiñas dos defuntos. Por exemplo en Caldas de Reis ían a "Pericha" nestes días polas casas, pedían nabos, millo, cabazas e outros produtos da horta, na Illa de Arousa aínda as crianzas, acompañadas polas nais e pais saen todos os anos a pedir a esmoliña baixo o lema "unha limosniña polos defuntiños que van alá"

Aquí tedes información interesante sobre esta conmemoración que vos axudará a comprender un pouco máis sobre as orixes.

 

ELECCIÓNS Ó CONSELLO ESCOLAR 2022

Mar, 10/25/2022 - 12:34 — belen.beci

RENOVACIÓN PARCIAL DO CONSELLO ESCOLAR NO SECTOR DE NAIS/PAIS

2022

No mes de novembro hai ELECCIÓNS Ó CONSELLO ESCOLAR. É unha renovación parcial dos membros do Consello Escolar. A continuación informámosvos deste proceso no que se refire ás nais/pais.

A organización e supervisión electoral correspóndelle á XUNTA ELECTORAL, presidida pola directora e integrada por unha nai/pai, mestra/mestre e un persoal non docente. Os membros  do consello escolar elixidos serán nomeados por un período de catro cursos escolares. Os membros da XUNTA ELECTORAL son:

- Presidenta: Olga Álvarez González

-  Vogal 1: Belén Bernárdez Cibeira

- Vogal 2: Samanta Torre Diego

- Vogal 3: Raúl González Fernández

A QUEN SE ELIXE?: 2 nais/pais que serán os representantes no Consello Escolar. No noso centro  contamos con 5 nais/pais, un deles é representante da ANPA. Nas próxima renovación parcial, elíxense 2 membros mediante votación das familias.

QUEN PODE SER CANDIDATO?: todas as nais/pais/titores legais que teñan fillas/os matriculados no centro e incluídos no censo electoral. O prazo de presentación de candidaturas empeza o día 11 de novembro e remata o 18 do mesmo mes ás 14h. As interesadas/os deberán cubrir e asinar o impreso de candidatura que podedes recoller no centro ou descargar aquí e presentalo na secretaría do colexio. A publicación das candidaturas farase o día 21 de novembro.

QUEN PODE VOTAR?: todas as nais/pais ou titoras/es legais que teñan alumnas/os matriculadas/os no centro e estean incluídos no censo que será exposto o 10 de novembro no taboleiro de anuncios. Tedes que comprobar se estades incluídos e se os datos son correctos. Se hai algún erro, teredes que facer unha reclamación (prazo: ata o 17 de novembro). O voto será directo, secreto e non delegable. Terá dereito a votar tanto a nai coma o pai da alumna/o ou, de ser o caso, o titor/a legar. Para poder facer uso do dereito ó voto, haberá que presentar  DNI, pasaporte, carné de conducir, etc.

DÍA DAS VOTACIÓNS: terá lugar o martes 29 de novembro  de 9:00 a 10:00, de 13:00 a 14:00 e de 15:30 a 17:00h. Será no centro, na sala multiusos (ximnasio pequeño).

Dada a importancia deste órgano no centro, animamos ás nais/pais a participar nas eleccións presentando a súa candidatura ou votando a quen crean máis convinte.

A Xunta electoral fai público o censo de responsables do alumnado para poder votar nas eleccións ó Consello Escolar.

CENSO DE RESPONSABLES 

A Xunta electoral fai público o listado de nais/pais que presentan candidatura para as eleccións ó Consello Escolar.

LISTADO DE CANDIDATURAS

A Xunta electoral fai público o escrutinio do sector nais/pais para a nova composición do Consello Escolar.

ESCRUTINIO

 

TADOS DAS VOTACIÓNS E COMPOSICIÓN DO CONSELLO ESCOLAR

 

 

ENLACE Á NORMATIVA

 

https://www.edu.xunta.gal/portal/sites/web/files/anunciog0655-210922-0003_gl.pdf

Distribuir contido


by Dr. Radut