Complementarias e extraescolares

O alumnado de 6º nivel de E.Infantil leva traballando sobre os dinosauros dende principio de curso. Por esta razón, as súas titoras decidiron levalos/as a visitar unha  exposición á praza de touros de Pontevedra, desta extinguida especie animal, para completar a súa formación académica o venres, 30 de novembro. Alí, quedaron marabillados/as co que viron na denominada "Living Dinosaurs" e regresaron encantados/as, ao final da xornada lectiva, ao centro.

Na semana do 12 ao 16 de novembro celebramos a Semana dos trompos, como vimos facendo dende hai xa uns cantos anos por aquelo de :"Polo San Martiño trompos ao camiño".

Deste xeito, tanto nos recreos da mañá coma no de despois de xantar e nas sesións de E.Física trátase de: motivar, ensinar e axudar a nenos e nenas para que fagan bailar o maior número posible de trompos.

De todos modos, dende a área de E. Física procúrase traballar cos trompos e bailaretes ou trompos sen cordel todo o mes e incluso noutros momentos do curso coma nas xornadas de xogos populares, etc. Aínda que, evidentemente, os rapaces e rapazas poden facelos bailar sempre e cando lles apeteza sexa a época do ano que sexa.  

O martes, 13 de novembro, pola tarde celebramos o Magosto no noso cole. A elección da data foi consecuencia de ser próxima ao San Martiño e das condicións metereolóxicas.

Durante a xornada levaronse a cabo diversos xogos, tanto populares: tiro da corda, pano, trompo, etc coma con materiais alternativos: chanclas, paracaídas, relevo de castañas en culleres, aros musicais, comecastañas... Polo tanto, houbo varias estacións de xogo, supervisadas por distintos profesores/as do centro e os/as nenos/as ían pasando dunhas a outras e xogando nelas, segundo mellor lles parecía. Logo, a iso das 16:20h, degustáronse as deliciosas e tradicionais castañas asadas, acompañadas de zumes e/ou augas para quen os/as quixo.

A principios de semana, os nenos e nenas foron levando ao centro as cabazas, que previamente adornaran nos seus fogares coa axuda de distintos familiares.

Logo, o mércores, 31 de outubro, día propio do Samaín, alumnado e profesorado foron percorrendo os corredores dos dous andares do edificio principal, por quendas, para ver a exposición de cabazas.

Xa pola tarde, a iso das 16:30h, cada aula saiu ao patio cuberto con titores/as e/ou especialistas e alí  o profe Adrián foi nomeando aos alumnos e alumnas, que recibirían un diploma como gañadores das mellores cabazas: terroríficas, ecolóxicas e de máis cor, en cada un dos antigos ciclos. Tamén  houbo agasallo, cadanseu libro  para  os/as premiados/as no concurso de contos de medo promovido dende a biblioteca do centro. 

                                                      Noraboa a todos/as os/as premiados/as!!!

Os alumnos/as de 1º e 2º niveis de E.Primaria, o/as titores/as e a profesora de E.Física tiveron unha xornada de convivencia e recoñecemento da contorna, cunha andaina desde o centro á Ponte do Ruso e algo máis tarde ao Monte Golfo. Unha vez alí, recuperaron enerxías na pequena praia fluvial que hai, para logo regresar ao centro. Aínda que, no traxecto de retorno, realizaron varias paradas máis, e a primeira foi na Área recreativa do Areal. Alí foi onde realizaron a parada máis grande e aproveitaron para merendar, brincar e conversar. Logo, continuaron ata o parque biosaudable e dalí partiron para o souto da Horta do Muiño, no que recolleron bastantes castañas. Finalmente, dirixíronse ao centro.

A xornada transcorreu sen incidencias e, tanto o alumnado coma o profesorado, gozaron da xornada e dos lugares visitados.