CEIP PLURILINGÜE DE OUTES

MOITO MAXÍN, NO SAMAÍN!

Ven, 30/10/2020 - 21:44 — admin

Emocionante xornada de Samaín, a la par que sanitariamente segura, no CEIP Plurilingüe de Outes!

Decoración de cabazas, visionado de curtas, lectura de relatos... e ENTERRO DOS MEDOS! Medos fóra!

PREMEDE PARA VER OS DETALLES DA CELEBRACIÓN,

O VÍDEO DAS CABAZAS E A PRESENTACIÓN DOS RELATOS!

E NON PASEDES MOITO MEDO ;)

COLABORADORES DO COMEDOR ESCOLAR

Ven, 23/10/2020 - 09:01 — admin

O Consello Da Xunta ven de autorizar os seguintes cambios que afectan ás persoas colaboradoras do comedor escolar:

Aumentar a cuantía que reciben ás Colaboradoras de atención e vixiancia d@s menores comensais en comedores de xestión directa a 12,50 euros por día de asistencia efectiva ao comedor.
Ampliar excepcionalmente a outr@s familiares convivintes, que residan no mesmo domicilio d@s menores comensais, a posibilidade de colaborar voluntariamente nas tarefas de atención e vixiancia nos comedores escolares, por non existir persoal funcionario e laboral da Xunta de Galicia, nin colaboradoras directas dispoñibles previstos ordinariamente en número suficiente. Esta colaboración voluntaria se desenvolverá nos mesmos termos previstos na lexislación sectorial educativa ao respecto dos pais, nais, titores legais e acolledores familiares do alumnado.

Por tanto, ante este cambio de normativa ábrese un novo prazo desde hoxe día 23 para aquelas persoas interesadas en comezar a colaborar no comedor.
Deberán pedir cita para cubrir unha solicitude no centro que deberán acompañar de:

Unha declaración xurada de que conviven no mesmo domicilio que algún d@s menores comensais.
Unha autorización do pai, nai, titor legal ou acolledor familiar do alumn@ comensal co que convivan para colaborar no comedor escolar.
Certificado negativo do Rexistro Central de delincuentes Sexuais de non ter sido condenad@ por sentenza firme por delito algún contra a liberdade e indemnidade sexual.

Non dubidedes en poñervos en contacto co centro se tedes calquera pregunta.

NOTICIA!! SOMOS "BIBLIOTECA CREATIVA"!

Xov, 15/10/2020 - 19:49 — admin

Alégranos informarvos de que somos un dos 25 centros seleccionados de toda Galicia para incorporarse este ano ao programa de “Bibliotecas Creativas”.

Este programa de innovación da Dirección Xeral de Centros e Recursos Humanos nace co fin de apoiar a cultura da experimentación, a creación e a investigación e aportará recursos ao centro para tal fin, o que é unha moi boa nova.

Preme na imaxe para acceder á Resolución ;)

De paso convidámosvos a que entredes no blogue de vez en cando! Tedes agora unha proposta de cara ao Samaín na que podedes participar.

Para acceder podedes premer no enlace directo que atoparedes na columna dereita de esta páxina.

INFORMACIÓN SOBRE PAGO DE COMEDOR

Lun, 05/10/2020 - 10:07 — admin

Xa está habilitada a plataforma para realizar o pago do comedor. A continuación explicamos os pasos a seguir:

Dende o navegador (non dende a aplicación de AbalarMóbil que tedes descargada) entrades na dirección de espazoAbalar (https://www.edu.xunta.gal/espazoAbalar/).

Unha vez dentro, pinchades en "Servizos Complementarios" - "Comedor" - "Formulario".

* Para poder realizarse o pago é preciso ter o certificado dixital ou a chave 365.

* Unha vez feito o pago, xa chega automáticamente a notificación ao centro.

Para axudarvos no trámite, podedes visualizar o seguinte video ou ver o documento adxunto.

1 adxunto

APROBACIÓN REAXUSTE HORARIO

Ven, 02/10/2020 - 14:28 — admin

Vimos de recibir a aprobación do reaxuste horario por parte de Xefatura Territorial, que podedes consultar no adxunto desta publicación.

Polo que a partir de agora mantense o horario de 9:50 a 14:50, prorrogando o horario establecido no mes de setembro, con carácter excepcional e duración limitada ao período que obrigue a situación de risco motivada pola pandemia ocasionada pola Covid-19, de conformidade co que determinen as autoridades sanitarias.

1 adxunto

HORARIO EXTRAORDINARIO DÍA 2 DE OUTUBRO

Xov, 01/10/2020 - 16:41 — admin

Acabamos de recibir instrucións por parte de Inspección Educativa indicando que o horario lectivo do centro para mañá 2 de outubro segue a ser de 9:50 a 14:50 (o mesmo que o que tivemos hoxe 1 de outubro), en espera da aprobación definitiva da solicitude presentada, si procede, por parte da Xefatura Territorial.

TARDES DIVERTIDAS DÍA 1 DE OUTUBRO

Mér, 30/09/2020 - 18:25 — admin

Infórmannos que o servizo de Tardes Divertidas de mañá 1 de outubro, co fin de adaptarse ao horario do centro, será de 16:00 a 18:00 para o alumnado usuario deste servizo.

HORARIO EXTRAORDINARIO DÍA 1 DE OUTUBRO

Mér, 30/09/2020 - 17:55 — admin

Acabamos de recibir instrucións por parte de Inspección Educativa indicando que o horario lectivo do centro para mañá 1 de outubro é de 9:50 a 14:50 (o mesmo que o que tivemos este mes).

Tómase esta decisión en espera da aprobación definitiva da solicitude presentada, si procede, por parte da Xefatura Territorial.

Os autobuses por tanto, recollerán ao alumnado das paradas e sairán co mesmo horario co que vimos funcionando en setembro. É dicir, a saída dos autobuses dende o centro e ás 16:00.

Desde o centro somos conscientes das dificultades que algunhas familias podedes ter, polo prematuro da decisión.

Polo que para mañá, habilitaremos a posibilidade de atender aqueles casos debidamente xustificados co horario laboral porque temos que manter os grupos de convivencia e son limitados os recursos dos que dispoñemos.

Se botades man desta medida deberedes recoller ao alumnado no centro como máximo ata as 5 da tarde.

Por este motivo é tamén importante, que de ser o caso, vos poñades en contacto canto antes co centro a través do correo electrónico (ceip.outes@edu.xunta.es), expoñendo e xustificando a vosa necesidade para o día de mañá.

NOVAS SOBRE O TEMA HORARIO

Mér, 30/09/2020 - 16:16 — admin

Tal e como informamos onte na páxina web, celebrouse o Consello Escolar Extraordinario que aprobou realizar unha solicitude de reaxuste horario trala recepción da Resolución da Secretaría Xeral de Educación e FP do 29 de setembro de 2020, na que autoriza esta medida excepcional e de carácter estrictamente sanitario, como unha medida máis a adoptar para minimizar o risco de contaxio na actual situación COVID-19.

Esta solicitude foi tramitada a Xefatura Territorial a través do Inspector do centro, polo que estamos agardando resposta.

Somos conscientes das dificultades organizativas que para as vosas familias supón non saber neste momento o horario de mañá, pero os prazos establéceos a Administración Educativa e non o centro.

En función da resposta que teñamos durante a tarde de hoxe informaremos das posibles modificacións horarias e estamos buscando a forma de atender ás necesidades de aquelas familias que por motivos de conciliación poidan ter problemas no día de mañá, dada a premura da medida.

A continuación adxuntamos a Resolución da Secretaría Xeral de Educación e FP, a solicitude do Consello Escolar e un documento coa argumentación que defende esta medida.