Ao longo de este mes de abril as mestras Ana e Carmen levaron a cabo diferentes obradoiros nos que ensinaron ás nenas e nenos dos diferentes cursos a tecer. Ademais fabricaron uns pequenos teares con cartón para que cada nena e neno constrúa o seu propio pousavasos.

Lembrades que Gatiza solicitou a axuda dos nenos e nenas de Centieiras para facer do mundo un lugar máis sostible? Aquí tedes os seus eco-consellos! 

Agora só queda poñelos en práctica!  

Moitas grazas ás e aos participantes por estes vídeos tan didácticos.

Ola familias!

Deixámosvos por aquí unhas pequenas imaxes da actividade realizada este xoves e venres no pavillón de A Xunqueira, onde o alumnado experimentou con diferentes modalidades ao redor do deporte do atletismo. Unhas xornadas de competitividade san e de convivencia con outros rapaces e rapazas dos diferentes colexios do concello de Fene.

Moitas grazas ao concello por organizar un ano máis esta marabillosa actividade. Voltaremos para o vindeiro ano.

Ola, familias!

O pasado luns e martes, 29 e 30 de abril, tivemos unha actividade no centro para achegar un deporte pouco coñecido e habitual entre os rapaces/as, o remo. O Clube de Remo de Mugardos, co seu entrenador Jorge á cabeza, explicoulles ao alumnado a orixe deste deporte e posteriormente, tras unha explicación previa sobre a mecánica a traballar, puxéronse mans á obra empregando dous remoergómetros. Posteriormente fixemos unha pequena competición onde pasárono pipa!!!. Isto é unha antesala do día 8 de maio, pois viaxaremos ata o Instituto de Mugardos para facer unha competición entre os colexios do propio concello e nosoutros. Unha nova experiencia que de seguro, será marabillosa. Manterémosovos informados/as!

Apertas varias

O día de onte recibimos a fermosísima visita das MULLERES da Asociación Rural de Mulleres de Cabanas que nos viñeron a contar como desenvolvían unha labor que xa está esquecida en moitos sitios: o tratado da lá das ovellas: o cardado, o fío, o tecido...

Como sabedes, estamos a traballar un proxecto de centro - PDI Pegadas Verdes- dedicado ao coidado do medio ambiente e da sostenibilidade e con esta visita queriamos recuperar non só os oficios que parecen olvidados senón tamén falar sobre os recursos que temos ao noso arredor e sobre as opcións sostibles que podemos atopar e empregar dun xeito sostible e respetuoso coa natureza.

Ademais, o vindeiro luns terá lugar o Día da Terra e este ano estamos levando a cabo a construción conxunta dun tear con diferentes retales cosidos e diversos bordados con mensaxes moi importantes sobre o coidado do medio. Esta visita nos axudou a coñecer a orixe de moitas teas e tamén o traballo de tecido que podemos facer coa lá.

Queremos aproveitar para agradecer enormemente a este fermoso grupo de mulleres pola súa visita, a súa paciencia e os seus coñecementos tan valiosos. Foi unha experienca moi enriquecedora e coa que quedamos realmente abraiadas e abraiados.

Ola, familias!

Aquí abaixo temos a representación do alumnado de Centieiras na fase final do Cross Provincial Escolar de Xogade, que se desenvolveu o pasado venres día 12 de abril, no pobo costeiro de Porto do Son. Alí xuntámonos unha morea de alumnos/as desde 2º de EP ata 3º da ESO representando a moitos colexios da provincia de A Coruña.

Pola nosa parte íannos representando 9 alumnos/as que acadaron a clasificación por medio da anterior carreira que se desenvolveu ao comezo do 2º trimestre. O tempo atmosférico foi espectacular e a experiencia, máis.

Parabéns por representar tan ben a todos/as os/as vosos/as compañeiros/as. Para o vindeiro ano... voltamos seguro!!!

Este domingo 7 de abril, celebrábase o Día Mundial da Saúde, e como caía a domingo, pasámolo a celebrar o luns día 8. Por elo organizamos unha merenda con froita (lembrar que xa o facemos varios días da semana) e na hora de lectura, percorremos a milla todos xuntos cos apadriñamentos correspondentes. Como o día non foi o axeitado debido ás inclemencias meteorolóxicas, tivo que desenvolverse dentro do pavillón e acurtando algo a distancia polo monótono que se facía estar a dar xiros en redondo. Todo elo acompañado pola música motivadora da película de ROCKY BALBOA. Non queremos deixar pasar o agradecemento enorme ao Eroski de Fene pola súa implicación neste día, pois non en vano, foron os encargados de ceder a froita de xeito totalmente solidario.

Apertas

Gatiza apareceu novamente na escola e, coma sempre que vén por aquí, é porque necesita da vosa axuda. Esta vez quere que gravedes un vídeo curto, dun minuto como máximo, dándolle algún consello sobre ecoloxía, reciclaxe, sostibilidade ou medio ambiente. Tedes ata o venres día 19 de abril para traelos á escola nunha memoria usb co voso nome escrito.

Lembrade, o vídeo ten que estar en galego e gravado en horizontal.

Gatiza conta con vós!

O pasado 21 de marzo conmemoramos no centro o Día Mundial da Síndrome de Down.

Para isto, levamos a cabo dúas actividades, por unha banda, todos e todas trouxemos calcetíns desparellados como símbolo de diversidade. 

Por outra, o alumnado de 2º de Educación Primaria, como verdadeiros e verdadeiras expertas acudiron ás diferentes aulas da escola a facer unha campaña de sensibilización e visibilización sobre as persoas non verbais e o emprego de comunicadores.

Comezaban a sesión lendo o conto de Mimo, un pequeno paxaro que non podía piar. Por isto, pensaba que tampouco sería quen de voar nin de contar sementes. Estaba moi confuso. Ao final, unha pomba moi sabia ensínalle outro xeito de expresión: a música. Así, Mimo pode expresar cando está triste, cando está contento… Mimo tamén descobre que a través da pintura pode contar moitas cousas.

Logo os nenos e nenas explicaron o que era un comunicador, os aspectos fundamentais para facer un bo uso do mesmo e incluso o que tiñamos que facer se queríamos comunicarnos cunha persoa que o empregue, sempre sendo respetuosos e respetuosas.

Parabéns nenos e nenas polo voso traballo! Sodes un verdadeiro exemplo!

“Non poder falar, non significa non ter nada que dicir”

En Arts de 5º e 6º estivemos traballando sobre a marabillosa pintora Hilma af Klint, que nos abraiou coas súas espectaculares obras e coa súa incrible historia.

Neste mes de marzo, mes da muller, en Arts de terceiro ciclo estamos afondando sobre mulleres artistas, e tras Bridget Riley como figura representativa do Op art, desta volta tocoulle o turno á artista sueca Hilma af Klint, que foi a pioneira do arte abstracto, xa que creou os seus primeiros cadros abstractos en 1906, anos antes que Wassily Kandinsky, Piet Mondrian e Kazimir Malévich, quenes tradicionalmente foron considerados os primeiros en realizar obras deste tipo.

Os cadros abstractos de Klint non foron coñecidos ata 1986, xa que ela mesma deixou instrucións de que as súas obras debían permanecer ocultas e non podían ser amosadas ao público ata polo menos vinte anos despois da súa muerte, debido a que consideraba que a xente da súa época non estaba preparada e non comprendería ese tipo de arte.

Tanto a biografía coma a obra desta incrible muller son merecedoras de que todas e todos investiguemos e afondemos máis sobre elas. Polo menos a nós, Hilma roubounos o corazón.

Tras coñecela e admirar as súas obras, os rapaces e rapazas de 5º e 6º crearon a súa persoal versión do arte de Hilma, mesturando formas xeométricas e outras máis orgánicas que nos lembran ás que atopamos na natureza, empregando cores vivas e vibrantes. Ademais, debían engadir, como mínimo, un adxectivo en inglés que elas e eles consideren que describe como son as mulleres.

O resultado, coma sempre, un espectáculo para os sentidos, ou se non, vide ver a exposición da planta baixa da escola e veredes.

Un ano máis o Leprechaun estivo facendo das súas en Centieiras, pero logrou fuxir e non caeu en ningunha das trampas preparadas polo alumnado da escola. Iso si, deixoulles un pequeno agasallo en forma de tatuaxes temporais e ciscou trevos de papel polas trampas como sinal da súa visita... algo é algo!

Houbo moitísimas trampas, todas marabillosas e feitas con gran enxeño, mais este Leprechaun é un fedello e non hai quen o pille!

Ademais, tiñamos un photocall para nos converter en simpáticos Leprechauns, mirade que riquiñas e riquiños están:

Better luck next year and happy Saint Patrick's Day!

O alumnado de 5º e 6º de primaria tivo un encontro co escritor Lois Pérez para falar sobre o seu libro A Gruta da Torre, que lemos nas aulas este trimestre.

A Gruta da Torre cóntanos a historia dun rapaz chamado Lois, que vai coa súa familia a pasar outro verán en Ribadeo. Quique, Greta e o resto da cuadrilla agardan por el, e ese ano hai tamén unha nena nova. Non a coñece, mais morre por falar con ela... Na vella biblioteca da Torre dos Moreno, Quique encontra un libro e, no seu interior, un misterioso documento que fala dun pasadizo. Onde estará? Deciden que teñen que atopalo. Unha aventura trepidante, atravesada pola forza da amizade, os primeiros amores e o valor dos libros, no Ribadeo de 1990.

Desfrutamos moito coa lectura do libro na clase, comentando o que lles ía acontecendo aos personaxes e imaxinando que pasaría a continuación. O libro fixo voar a nosa imaxinación, fíxonos rir ás gargalladas e, ás veces, emocionarnos bastante, e o encontro co seu autor non ía ser menos. Desfrutamos moito falando con Lois sobre o seu libro, preguntándolle por fin esas inquedanzas e dúbidas que ía aparecendo ao longo destas semanas, segundo avanzabamos na lectura, e escoitando as historias tan graciosas e curiosas que nos contou. Ata descubrimos que foi profe de Centieiras hai anos!

Moitas grazas, Lois, por animarnos a seguir gozando da lectura!

A rapazada de 5º e 6º de primaria estivo traballando arreo nos obradoiros organizados polas titoras para o Día Internacional da Muller.

Este 8 M quixemos reivindicar que segue sen haber unha igualdade real entre homes e mulleres no reparto das tarefas do fogar e no coidado das fillas e fillos, actividades que continúan a estar principalmente en mans das mulleres. O mesmo acontece coa porcentaxe de homes e mulleres en postos de responsabilidade e toma de decisións, que seguen estando maioritariamente en mans de homes.

Para facer fincapé na necesidade de seguir avanzando cara á ansiada igualdade, quixemos facer partícipes ás nosas alumnas e alumnos na realización de tarefas do fogar tales coma varrer e fregar o chan, limpar os cristais e tender e dobrar a roupa. Ademais, tamén estiveron a coser, facer sopas de letras sobre mulleres con premios Nobel e caleidociclos.

Previamente a esta xornada o alumnado de 5º e 6º fixo un mural e outras decoracións en Arts para engalanar o cole e tomar conciencia da importancia e necesidade das reivindicacións feministas.

Foi un tempo de convivencia e traballo en equipo moi enriquecedor, desfrutárono moito e deixaron a escola coma os chorros do ouro! Agardamos que sigan a desenvolver na casa as aprendizaxes adquiridas