CEIP Balaídos

A Axencia Estatal de Meteoroloxía e MeteoGalicia alertan dun fenómeno meteorolóxico adverso de nivel LARANXA por refachos de vento superiores a 100km/h, que comezará hoxe, mércores día 18.12.2019 ás 09.00 horas e prolongarase ata as 18:00 horas. Este adverso afectará ás zonas de predición meteorolóxica da totalidade da provincia da Coruña e Pontevedra, a Mariña de Lugo e noroeste e montaña de Ourense.

Ante a devandita situación de risco, a Comisión Escolar de Alertas acordou o seguinte:

    1. A SUSPENSIÓN DE ACTIVIDADES NO EXTERIOR nos centros educativos situados nas zonas de predición meteorolóxica afectadas.
    2. A autoridade educativa comunicará esta incidencia ás direccións dos centros escolares afectados, solicitando que leven a cabo esta medida e fagan un seguimento dos partes meteorolóxicos durante a xornada na que se desenvolverá este adverso.
    3. Para o caso de que as circunstancias da localidade onde se atopa o centro, supuxesen un risco superior ao declarado e pasase a unha declaración de nivel superior, as direccións poderán adoptar as decisións oportunas respecto da suspensión das actividades extraescolares.

No mes de Novembro realizamos no colexio dúas sesions de Emociomartes nas que traballamos o poder das palabras, e comprobamos como podemos motivar ou desanimar aos nosos amigos e compañeiros. Foi unha experiencia moi profunda e impactante para os nenos e nenas.

O vindeiro mércores 11 de decembro, de 16:00 a 18:00h terá lugar a seguinte sesión do "Taller de intelixencia emocional - Escola de nais-pais".

O xoves 21 de novembro de 2019 o alumnado de 5º e 6º de educación primaria saímos do colexio en dirección ao Pavillón de As Travesas, e alí chegamos camiñando.

Nel agardábannos os compoñentes do clube ENKI de A Coruña para pór en practica e vivenciar in situ, todo o explicado na charla desenvolta no colexio Balaídos na semana anterior (da cal xa informamos nesta web) referida ao DEPORTE ADAPTADO e baixo o nome de PONTE NO MEU LUGAR.

Xunto con varios colexios olívicos, puidemos vivenciar varias disciplinas deportivas, durante dúas horas: 

-Tenis en cadeira de rodas.

-Eslalom en cadeira de rodas.

-Percorridos en handbike. Discamino

-Boccia

-Goalball

- Voleibol Sentado.

Aquí vos deixamos varias imaxes do encontro : XORNADA DEPORTE ADAPTADO

E ESTE MINIVIDEO:

O pasado mércores 20 de novembro, o alumnado de 4º de Educación primaria, dentro do marco da materia de Introducción ao Pensamento Computacional, tivo a gran oportunidade de participar nun obradoiro práctico sobre a automatización industrial da man de Olivia, nai de Natalia alumna do noso centro. Coñecimos como na súa labor coma enxeñeira industrial é moi importante  a programación e a aplicación da lóxica para solucionar problemas. O noso alumnado puido manexar moitos instrumentos que ela trouxo do seu traballo tales como Datamatrix, láseres que recoñecen cores, lectores RFID, balizas, motores, sensores de inducción e infravermello... e moitos máis. 

Os nenos e nenas de 1º de Primaria visitamos o Museo Liste dun xeito distinto, no que conxugamos coñecemento e diversión.

Percorremos as distintas salas, onde nos explicaron os aspectos máis salientables e as pezas máis senlleiras, co fin de acadar o obxectivo final: obter nove chaves que, coa súa combinación de números, abrirían a caixa forte na que se gardaba un agasallo para nós! 

Non foi doado, tivemos que pasar moitas probas e demostrar o aprendido: atopar obxectos agochados, observar ben para decatarnos das diferenzas, abrir cadeados para formar a seguinte pista, ordear pedras segundo o seu peso...

Queredes ver o ben que o pasamos? Non perdades o seguinte video.

Hoxe mércores 13 de novembro, o noso alumnado (5º e 6º de E. Primaria) tivo a fortuna de achegarse ao DEPORTE ADAPTADO en primeira persoa, a traveso da asistencia a unha charla sobre a historia de superación relatada por dous deportistas profesionais con discapacidade (o triatleta Ángel López, e o tenista Daniel Prado). Pertencen ambos á Federación Galega de Deporte Adaptado, clube ENKI.

O alumnado vivenciou en directo todo o relativo á discapacidade e integración social dende a palabra de quen sen prevelo, e por causa de sendos accidentes de coche por exceso de velocidade, viron a súa vida dar un xiro total; que souberon reconducir e superar a través do deporte e a adicación.

Esta primeira fase da actividade (visita ao colexio), proposta polo clube ENKI de A Coruña, terá continuidade o vindeiro xoves 21 de novembro coa Actividade deportiva a desenvolver no Pavillon de As Travesas.

Diso habemos informarvos para a semana. Mentres tanto e, tras darlles as grazas a Ángel, David e Raquel Sanduende, deixámosvos un ENLACE aos minivideos e algunha imaxe do coloquio.

ESTA ACTIVIDADE TAMÉN SE INSIRE NO PROGRAMA DE PROPOSTAS QUE O COLEXIO BALAÍDOS ESTÁ A PREPARAR NAS AULAS DE INFANTIL E PRIMARIA PARA CELEBRAR O DÍA 3 DE DECEMBRO: DÍA INTERNACIONAL DAS PERSOAS CON DISCAPACIDADE.

O 24 de outubro, o alumnado de 2º de Educación Primaria visitou o Museo Liste para participar na actividade de Samaín, "A noite dos calacús".

Alí mergulláronse na celebración do Samaín, dende a aprendizaxe da súa orixe e características ata a realización dunha coroa de Samaín que levaron como agasallo para enfeitizar a aula e un taller de maquillaxe.

Pero iso non foi todo!, participaron nunha xincana "A noite dos calacús", na que foron descubrindo todas as tradicións propias destas datas pasando por distintas probas.  

Un ano máis chegou ao cole a festa do Samain. Como cada curso, disfrutamos dun día de diversión e medo cos nosos disfrazes e a decoración das aulas e do cole.

Debido ao mal tempo, tivemos que anular o magosto, pero ainda así pasamos un gran día. En infantil compartiron unha sana merenda terrorifica, e despois todos saimos ao patio a xogar e pasalo moi ben!!!!!

O sábado 12 de outubro ás 18:00 h, tivo lugar o ensaio xeral da Orquestra Clásica de Vigo no Teatro García Barbón.

Asistiron unhas 15 familias do alumnado de 4º, 5º e 6º de Educación Primaria en xeral.

A actividade divulgativa durou, aproximadamente, unha hora arredor ao concerto que tivo lugar ese mismo día ás 20:30 h.

Escoitamos un movemento do Concerto para piano Nº1 en sol menor op 25, de Félix Mendelssohn, polo artista Jorge Abreu Seoane e dirixido por Manuel Martínez.

Ao rematar a actividade, o alumnado coñeceu o Teatro García Barbón por dentro e participaron debuxando nun mural o que máis lles gustou do ensaio (os instrumentos da orquestra, o director, o pianista...), así como ao pianista ao cal lles puideron facer preguntas. 

Resultou moi enriquecedor e positivo.

Aquí vos deixamos un vídeo coas fotos desta experiencia!

GRAZAS POLA ASISTENCIA E PARTICIPACIÓN!

ATA A PRÓXIMA!