A conselleira de Educación, Universidade e Formación Profesional, Carmen Pomar, deu hoxe a benvida aos 617 auxiliares de conversa que prestan apoio este curso no sistema educativo, nun acto celebrado na Cidade da Cultura. A presenza destas persoas, tal e como sinalou a conselleira ten un alto valor engadido para a formación das alumnas e alumnos. “O voso traballo non é só contribuír á aprendizaxe de linguas, senón tamén abrirlles os ollos ao mundo, darlles os mecanismos para entender unha sociedade cada vez máis globalizada e, desta forma, facelos máis plurais e críticos”, dixo.

A titular do departamento educativo da Xunta de Galicia agradeceu a implicación dos docentes na implantación do modelo plurilingüe nos centros educativos, xa que “supón un esforzo importante para a administración e un aínda maior para o profesorado, ao que nunca me cansarei de agradecer o seu esforzo e compromiso diarios”.

Carmen Pomar sinalou cada idioma como unha forma de ver e interpretar a vida, de tal forma que “canto máis coñezamos, máis abertos seremos e máis libres”. “con esa idea –engadiu- implantamos o modelo plurilingüe en Galicia hai unha década, un modelo que cada vez chega a máis centros e que está a acadar uns resultados moi positivos no alumnado”. “O curso pasado realizáronse probas par que os que remataran algunha etapa educativa en centros plurilingües puidesen, de forma gratuíta para a súas familias, certificar os niveis B1 e B2 de inglés. Máis do 80% dos presentados superou os exames”, explicou a conselleira, engadindo que estas probas de certificación se volverán realizar o mes que vén.

A conselleira rematou agradecendo o labor dos auxiliares, que “sodes, sen dúbida, unha parte importante deste éxito”, por contribuír ademais a “acadar unha educación aberta, plural e libre, que garantiza a igualdade de oportunidades”

Seis idiomas

Os auxiliares de conversa prestan servizo nas Escolas Oficiais de Idiomas, nos 423 centros educativos de Galicia con modelo plurilingüe integrado polo Plurilingüismo clásico, o PlurInfantil, o PluriBach ou o PluriFP e, nalgúns casos, nos centros con seccións bilingües.

Por idiomas, o sistema educativo galego vai contar este curso con 564 auxiliares de inglés, 28 de francés, 10 de alemán, 7 de portugués, 7 de chinés e 1 de ruso. Os países de procedencia das persoas auxiliares son Alemaña, Australia, Austria, Bélxica, Bulgaria, Canadá, China,  Estados Unidos, Federación de Rusia, Filipinas, Francia, Hungría, Irlanda, India, Marrocos, Noruega, Nova Zelandia, os Países Baixos, Portugal, Reino Unido, diferentes países de Oceanía (Fiyi, Illas Salomón, Tonga e Vanuatu), Suecia.

Tras a inauguración a xornada de recepción continuará con relatorio arredor do modelo plurilingüe e a Estratexia Galega de Linguas Estranxeiras Edulingüe 2020, así como das funcións das persoas auxiliares de conversa. Ademais, varios auxiliares e representantes de centros educativos exporán as súas experiencias neste programa. Ao longo do día abordaranse tamén cuestións como a xestión administrativa, entre outras.

Achegamento á cultura doutros países

A figura do auxiliar de conversa é un elemento clave para acercar a realidade cultural e lingüística do seu país de orixe ao alumnado galego. Deste xeito, estas persoas desenvolven un importante servizo complementario, ao apoiaren o labor do profesorado, facilitando as prácticas de conversa en linguas estranxeiras. Ademais, representan un auténtico vehículo de achegamento á cultura dos países onde se fala a lingua obxecto de estudo, polo que reforzan o labor docente na compoñente de multiculturalidade.  

A maiores, e debido ao alto perfil académico dalgúns deles (en especial os chegados ao abeiro do convenio coa Comisión Fulbright), é previsible que aporten un alto valor engadido aos proxectos plurilingües, por exemplo en ámbitos como os de materias STEM (Ciencias, Tecnoloxía, Enxeñarías e Informática).

A conselleira de Educación, Universidade e Formación Profesional, Carmen Pomar, visitou esta mañá o CEIP Plurilingüe de Abanqueiro, na localidade coruñesa de Boiro, un centro dos máis veteráns no modelo plurilingüe, ao que se incorporou no ano 2011. Neste contexto a titular do departamento educativo da Xunta de Galicia anunciou que este ano se incorporan ou amplían o modelo plurilingüe (nas modalidades de centros plurilingüe en Primaria ou ESO, PlurInfantil, PluriBach ou PluriFP) un total de 69 centros educativos de toda Galicia.

Deste xeito, en Galicia hai xa 377 centros con plurilingüismo en Primaria ou ESO (ou en ambas etapas), 171 con PluriInfantil (que contan tamén, na súa maioría, con plurilingüismo en Primaria), 13 con PluriBach (que tamén pode ser combinado con outra etapa) e 23 imparten ciclos formativos de FP nalgunha lingua estranxeira. A maiores, as seccións bilingües increméntanse este curso ata chegar a un total de 4.647 en 727 centros educativos.

Para dar apoio a estes estudantes beneficiados, arredor de 110.000 alumnas e alumnos, a Consellería pon ao servizo da comunidade educativo un total de 617 auxiliares de conversa neste ano académico.

A relación dos centros que se incorporan este ano ao plurilingüismo ou suman algunha etapa é a recollida no seguinte cadro:

Cómpre sinalar que as diferentes accións que a Consellería desenvolve en prol da mellora da competencia do alumnado en idiomas enmárcanse na Estratexia galega de linguas estranxeiras 2020, EDUlingüe, cuxo obxectivo fundamental é estender o plurilingüismo a todas as etapas educativas e facilitar que os alumnos e alumnas poidan acreditar o seu nivel de lingua estranxeira ao final de etapa. Ata hai tres cursos, a ensinanza plurilingüe estaba implantada nas etapas obrigatorias, é dicir, Primaria e Secundaria, pero desde o curso 2017/18 ábrese tamén a Infantil, Bacharelato e Formación Profesional.

Durante a súa visita ao centro boirense a conselleira felicitou a comunidade educativa polo seu traballo arredor do modelo plurilingüe, así como pola súa implicación noutras iniciativas impulsadas pola Consellería, tales como os contratos-programa.

Non en balde, o CEIP Plurilingüe de Abanqueiro desenvolveu o pasado curso as liñas 1 e 2 dos mesmos. A primeira liña, de Reforzo, orientación e apoio (PROA), busca mellorar as perspectivas escolares do alumnado con dificultades, a través do traballo ou apoio organizado para a adquisición das destrezas básicas que lle faciliten a incorporación plena ao ritmo de traballo ordinario e ás esixencias das diferentes áreas e materias.

Pola súa banda, a liña 2 céntrase nas accións para a Mellora das competencias clave, en especial da matemática. O desenvolvemento desta actuación incluirá sempre o reforzo desta competencia, podendo incluír tamén actuacións para a mellora da comunicación lingüística e/ou competencias básicas en ciencia e tecnoloxía.