Igualdade

Ao longo de todo este mes, todos os cursos do noso centro están visitando a nosa biblioteca, nesta visita, coñecen os distintos espazos da mesma ao tempo que se lles recorda cal é o funcionamento da biblioteca.

Faise especial fincapé no espazo de igualdade inaugurado o pasado curso, falando dos volumes que poden atopar neste espazo e curioseando naqueles libros que falan de mulleres importantes na ciencia, nas artes e na docencia e xogando a atopar neles a aquelas mulleres que o profesorado lles indica.

Este pasado xoves asistimos á segunda sesión do noso clube de lectura feminista "A liña violeta". Consistiu nun xantar literario e unha representación teatral da man de Paula Seone, para falarmos deste libro que nos fala en primeira persoa da anorexia, da necesidade de gustar, de sermos perfectas.

A sesión deixou moi bo sabor, xa que vemos moito futuro na perspectiva da xente moza de Teis, que é feminista e sabe identificar os prexuízos que pairan na nosa sociedade.

Queremos agradecer a asistencia ao alumnado, profesorado e nais que se sumaron a esta sesión e, por suposto, a Paula Seoane, que contribuíu a encher de creatividade e ilusión o noso insti.

Isabel Blanco e Silvia Cernadas, escritora e historiadora, viñeron presentar hoxe o seu libro "María Vinyals. Un talento rebelde". O resultado foi moi fermoso. Silvia falounos da parte histórica, desta muller senlleira que merece quedar no catálogo das feministas galegas de todos os tempos. E Isabel falounos sobre a arte e o oficio de crear un libro. Para iso trouxo o caderno de notas que usa cando escribe.

Grazas por contaxiarnos o entusiasmo a través das vosas palabras. Grazas ao alumnado pola atención e amabilidade coa que acollestes a actividade.

O pasado 25 de novembro foi o día internacional contra a violencia de xénero, no noso instituto realizamos actos conmemorativos o venres 22 de novembro e o alumnado asistiu ás actividades do Enlaza Vigo o luns día 25.

Entre os actos desenvolvidos o día 22 destacamos a performance da violencia de xénero e a súa fin levada a cabo polo alumnado do Ciclo Básico de Peiteado e Estética, a proxección no salón de actos de varios vídeos relacionados coa temática, presentación da árbore violeta cun lazo violeta por cada unha das mulleres asasinadas neste ano e o descubrimento dunha pancarta na fachada principal do noso centro.

O centro tamén montou un stand no Enlaza Vigo e o alumnado asistiu ás conferencias desenvolvidas no Concello, e creou catro carteis para mostrar situacións de micromachismo que se poden ver nalgunhas rúas da nosa cidade.

O IES de Teis di non á violencia de xénero!