NOVAS:

A Consellería de Cultura, Educación e Universidade ven de publicar as instrucións para o acceso e a admisión do alumnado ás ensinanzas Artísticas Superiores e ás ensinanzas Deportivas para o curso 2022-23. 

O prazo de solicitude de admisión para as ensinanzas Artísticas Superiores de Deseño estenderase dende o 22 de abril ata o 23 de maio, ambos os dous incluídos, no caso de precisar realizar a proba de acceso que substitúe ao requisito de titulación de bacharelato. Se este non é o caso, poderánse presentar as solicitudes ata o 23 de xuño incluído.

No caso das ensinanzas Deportivas, o prazo de inscrición na proba substitutiva do requisito de titulación de educación secundaria obrigatoria e/ou na proba específica de grao medio será o comprendido entre o 22 de abril e o 29 de xuño de 2022, ambos os dous incluídos. O prazo de inscrición na proba substitutiva do requisito de titulación de bacharelato será o comprendido entre o 22 de abril e o 23 de maio de 2022, ambos os dous incluídos.

Tes toda a información nos enlaces da sección Novas.

A semana pasada a Consellería de Educación, Cultura e Universidades presentou un breve resumo dos curriculos educativos da LOMLOE, que entra en vigor o vindeiro ano académico nos cursos impares (1º, 3º ESO e 1º BAC).

Pódese consultar este documento nesta ligazón.

A Consellería de Cultura, Educación e Universidade acaba de publicar as DIRECTRICES SOBRE O USO DAS MÁSCARAS NO ÁMBITO EDUCATIVO NA COMUNIDADE AUTÓNOMA DE GALICIA.

Segundo este documento, o uso de máscara será, a partir de agora, únicamente obrigatorio no transporte escolar (excepto para persoas que presenten algún tipo de enfermidade ou dificultade respiratoria que poida verse agravada polo uso da máscara). No centro educativo a súa utilización é recomendable para o persoal docente e para o alumnado. Para casos sospeitosos e confirmados de COVID-19 e contactos estreitos de casos é especialmente recomendable o uso de forma constante da máscara e evitar actividades que impliquen quitala sen manter a distancia de seguridade de 1,5 metros con outras persoas.

Neste contexto normativo no que a máscara non resulta obrigatoria é especialmente relevante lembrar a importancia de manter o resto de medidas de protección como a hixiene de mans, a ventilación e evitar as aglomeracións.

O noso centro foi un dos 58 seleccionados en Galicia pola OCDE para formar parte da mostra do estudo principal PISA 2022. Trátase dun programa que avalía os resultados educativos do alumnado de 15 anos en lectura, matemáticas e ciencias, ademais de noutras áreas como a competencia financeira ou o pensamento creativo.

Poden consultar a nosa carta ás familias premendo nesta ligazón.

Sobre as probas PISA no noso centro:

• Cando? Terán lugar neste mes de abril, ao longo dunha mañá.
  
• Quen? Participarán 42 alumnos/as escollidos aleatoriamente de entre os nacidos en 2006. Non saberemos quen serán eses alumnos/as ata o mesmo día da proba.
• Como? A proba será en galego e realízase con ordenador aportado pola organización, cunha proba cognitiva de lectura, ciencias, matemáticas e unha área innovadora, que este ano será o pensamento creativo, e un cuestionario de contexto.
• Canto? Durará case toda a mañá, desde as 8.45 h ata as 13.30, aproximadamente, e con descansos propios que, pola particular estrutura organizativa da proba, non coincidirán cos nosos recreos.
• Preparación? As probas PISA non se deben preparar, pero si é bo coñecer de antemán que tipo de exercicios contén. Pódense consultar exemplos de probas liberadas, premendo nesta ligazón.
  
• Resultados? A publicación dos primeiros resultados prevese en decembro de 2023, pero non se obteñen resultados por alumno/a nin por centro; obteranse só resultados xerais a nivel Galicia, resto de comunidades, países participantes e a media da OCDE.