Actividades escolares

Grazas, grazas e mil veces grazas.

Grazas a todas as persoas que hoxe acudistes connosco a reivindicar que a roupa non ten xénero, a loitar contra os estereotipos, a encher as rúas de cores e de liberdade.

Grazas aos medios de comunicación, ao concello, ao equipo de igualdade, pero sobre todo, grazas a todas as persoas que edición tras edición apoiades esta iniciativa. Sen vós, nada disto sería posible.

Sigamos enchendo o mundo de cores, de respecto e tolerancia. Sigamos loitando por un mundo mellor. Sigamos loitando porque todas podamos ser simplemente como queiramos ser.

Nesta ligazón poderás atopar todas as noticias de prensa, radio e televisión que fixeron eco do proxecto: https://wke.lt/w/s/jM7VvX

Arrincamos co proxecto "Coñecendo as neuronas con anticorpos" no  STEMBach.

Achegámonos ata a Facultade de Bioloxía na UVigo para coñecer aos investigadores da universidade e planificar o proxecto.

Máis información no menú STEMbach da dereita.

O pasado 2020 celebrouse o centenario da publicación do primeiro número da revista Nós. Por este motivo, dende o Departamento de Lingua e Literatura Galega e o EDLG, propuxemos a recreación da icónica portada da revista.

Para crear a nosa versión, a profesora de Debuxo, Mª Xosé Ares, dividiu a portada orixinal en cadros, que se repartiron nos diferentes cursos. Tras unha posta en común, o alumnado substituíu a profesión ou símbolo da capa orixinal por outro representativo do noso mundo e da nosa vida, un século máis tarde. 

En 1º ESO A Fabiola Castro deseñou unha mariñeira; en 1º ESO B, Alejandra Gómez e María Otero crearon unha astronauta; mentres que en 2º ESO B se decidiron polo coronavirus e a aula virtual como os novos monstros que nos ameazan, deseñados por Miguel Martínez, Diego Pastoriza e Andrea Rial.

En 3º ESO, Helena Rosas, Adrik Blanco, Zaira Dios, Xiana Pastoriza e Miguel Peixoto modernizaron os músicos da parte inferior e na FPB de Peiteado Mohamed Belhadj fíxolle unha homenaxe ao persoal sanitario.

Raquel Martínez (4º ESO A) foi a encargada de debuxar unha mariscadora mentres que Iria Estévez e Lía Menduíña (1º Bacharelato) substituíron o cáliz orixinal por unha icona feminista que pinta o mundo de cores.

Este é o resultado, un gran traballo feito por un gran equipo. Parabéns!

E o 27 de xaneiro, nós tamén saímos en nòs