Actividades

O alumnado de Francés do IES de Fene quere desexar a tod@s un bo Nadal e un feliz ano 2023.

Hoxe conmemoramos o Día Internacional para a Eliminación da Violencia contra as Mulleres e no IES de Fene tivemos a sorte de contar con Joshua Alonso Mateo e Sara Amorín para dirixir un obradoiro sobre violencia de xénero. Joshua e Sara son axentes de igualdade e realizan unha labor marabillosa formando e sensibilizando a persoas de distintos ámbitos e idades sobre a violencia machista. Foron dúas sesións emocionantes e enriquecedoras  nas que se falou de diferentes tipos de violencia, sexual, dixital, psicolóxica, a violencia do cine e as series e nas que o alumnado tivo a posibilidade de tomar parte na actividade e expoñer as súas inquedanzas e opinións.

Sentímonos agradecid@s de poder contar con persoas que traballan para vencer esta lacra e implicad@s en poñer o noso grao de area na prevención e formación sobre violencia machista das novas xeracións.

Joshua agasallounos cun exemplar do libro "No camiño do vento", un libro de poemas e ilustracións de súa nai, María José Mateo, que forma parte dun proxecto solidario que leva o mesmo nome. Ademais asinou no libro da nosa biblioteca.

A actividade contou tamén coa presenza de Mª Carmen Martínez, concelleira de Ensino, Benestar Social e Igualdade, á que agradecemos a colaboración para levar adiante este tipo de actividades e a implicación do concello de Fene na loita en prol da Igualdade

Acceso á web Sesé Mateo

Continúa o ciclo de conferencias Contando Ciencia organizado pola biblioteca O Segrel do Penedo do IES de Fene en colaboración coa concellaría de Ensino. A cita será o próximo xoves 20 de outubro no salón de actos da Casa da Cultura de Fene ás 19:30 h. Nesta ocasión o protagonista será o investigador do SERGAS Manuel Collado Rodríguez que abordará o tema  "A Procura da fonte da xuventude".

Manuel Collado Rodríguez é investigador do SERGAS no Hospital Clínico de Santiago onde dirixe o grupo de “Senescencia celular, cancro e avellentamento”. É doutor pola UAM, realizou estadías posdoutorais no Ludwig Institute for Cancer Reseach de Londres, na NYU Medical School e no Memorial Sloan Kettering Center de New York.

Manuel Collado tamén e autor de numerosos artigos de investigación en revistas científicas de alto impacto. O seu labor científico desenvolveuse fundamentalmente na área do cancro e en particular en mecanismos de supresión tumoral, fundamentalmente no proceso de senescencia tumoral. Recentemente o seu traballo trata de entender a implicación de células nai adultas en cancro e avellentamento.

A CHARLA FOI ADIADA PARA O XOVES 27 DE OUTUBRO

O pasado 8 de setembro deron comezo as clases dun novo curso xa sen as restricións que tivemos nos dous anteriores por mor da pandemia e con moitas novidades, sobre todo nos cursos impares, xa que comeza a implantarse a LOMLOE. Para inaugurar este novo curso que mellor que contar con dous exalumnos e unha exalumna do centro que desenvolven a súa actividade profesional en sectores tan diferentes como a música, a investigación ou a empresa, para que sirvan de exemplo, motivación e inspiración ás novas xeracións que se están a formar.

Primeiro foi o turno do alumnado de ESO, que encheron o salón de actos Xaquín Marín de algarabía e tamén de nervos, sobre todo por parte do alumnado de 1º de ESO que comezan etapa e chegan por vez primeira ao centro. Foron recibidos polo director, Xoán Vázquez, e por Gisela Sanmartín, pandeireteira e compoñente do grupo Xirifeiras de Fene, ademais de exalumna do centro.

Mentres, ao salón de actos do edificio de ciclos formativos chegaba o alumnado de FP básica onde eran recibdos pola vicedirectora e o xefe de estudos de adultos, Santiago Varela, quen lles informou do desenvolvemento das ensinanzas que comezan, titulacións que recibirán e das posibiladades de continuar a súa formación nun ciclo medio e superior ou incorporarse ao mundo laboral.

A continuación o alumnado de bacharelato participaba nunha charla sobre especies invasoras e a súa influencia na perda de biodiversidade, impartida por Rubén Portela Carballeira, biólogo e exalumno do IES de Fene, que a pesar da súa xuventude conta cunha ampla experiencia investigadora en diferentes pasíses do mundo.

Por último recibimos tamén ao alumnado de ciclos medios. Neste caso participaron nunha sesión con Miguel Ameneiros Vilasánchez, exalumno do ciclo de instalacións frigoríficas, emprendedor e fundador da empresa Aerofri, que narrou ao alumndo a súa experiencia no noso centro e despois como traballador e empresario autónomo.

En resumo, unha mañá chea de actividades para coller folgos e comezar unha nova andaina académica.

O pasado martes 24 de maio, co gallo de conmemorar o Día das Letras Galegas, tivemos a sorte de contar no noso centro coa compañía Redrum Teatro presentando a obra #2pilgrims e na que participou o alumnado de 3º e 4º de ESO.

Trátase dunha obra cunha forte carga didáctica dirixida ao público adolescente e na que, utilizando o Camiño de Santiago como fío condutor, toca temas como o feminismo, a igualdade, novas masculinidades e as redes sociais.

Unha vez máis agradecemos ao departamento de Igualdade do Concello de Fene a posibilidade de ofertar ao noso alumnado unha actividade tan importante na sociedade actual.

Acceso á guía didáctica

Acceso á web de REDRUM TEATRO

Acceso á noticia na prensa

O pasado venres, 6 de maio, no IES de Fene vivimos un deses momentos que gardaremos na nosa memoria para sempre. Tivemos o pracer de contar coa presenza do ilustrador e humorista gráfico Xaquín Marín, para renderlle unha humilde homenaxe poñendo o seu nome a un dos salóns de actos do noso centro.

O acto comezou co descubrimento dunha placa realizada polo ceramista Francisco Pérez Porto e a inauguración dun mural pintado por alumnado de Debuxo Artístico baixo a guía da profesora Luisa Parada. Unha vez dentro do xa Salón de Actos Xaquín Marín, viñeron as intervencións do director do centro, Xoán Vázquez, a presidenta do Club de Prensa de Ferrol,Xulia Díaz e o propio Xaquín Marín quen expresou o seu emocionado agradecemento pola homenaxe. Como broche o grupo de música Arredemo, xunto coa profesora Bárbara Mourelo agasallounos cunha maravillosa actuación.

Ao acto asistiron autoridades locais, a coordinadora do Museo do Humor de Fene, Almudena Marcos, os ceramistas Francisco Pérez Porto e Carme Romero Díaz así como representantes do alumnado, profesorado e familias.

Desde este día un novo espazo do centro pasa a levar o nome dun persoeiro do noso pobo, neste caso Xaquín Marín, xunto coa biblioteca O Segrel do Penedo, en recordo de Xosé María Pérez Parallé, e a aula de Música, Daniel Bellón.

O pasado luns 24 de xaneiro tivo lugar no salón de actos do IES de Fene a representación do espectáculo "Bravas" de Isabel Risco. Nel participou o alumnado de 1º de bacharelato que acudiu en dúas quendas para cumprir co protocolo sanitario para facer fronte á covid-19.

A actividade foi posible grazas á colaboración da concellería de Servizos Sociais e enmárcase dentro das organizadas polo concello de Fene ao redor do Día Internacional contra a Violencia de Xénero.

Dende o IES de Fene e a comisión de igualdade queremos agradecer aos servizos sociais de Fene a labor que desenvolven neste senso e a posibilidade de poder disfrutar deste espectáculo.

Ler a noticia publicada en La Voz de Galicia

Se non podes visualizar o vídeo, preme aquí

Alumnos e profesores do IES de Fene, dos ciclos de Automoción e Soldadura, viaxaron a Burgos o pasado mes de xuño para participar na  carreira de vehículos de inercia Hiperbaric Challenge celebrada o día 22 de xuño nesta cidade. O vehículo co que participaron foi posto a punto nos propios talleres polo alumnado e profesorado implicado, e acadaron o segundo posto na clasificacioón, sendo esta a primeira vez que participan

Para o desenvolvemento do proxecto, contaron cunha subvención do CONCELLO DE FENE para os gastos de viaxe e aloxamento, así como coa colaboración de empresas patrocinadoras: ORTEGAL OIL de Fene, COMASA de Fene,  DIRESA de Narón, FERPA de Viveiro, NORTE AGROFORESTAL de A Capela, JOYPA de Pontedeume e outras

Entrevista en Radiofusión

O noso alumnado de 1° de FP Básica coa súa profesora Laura Viñas Mayo están a traballar nun novo proxecto, a hortiña do IES de Fene... Parabéns!!!!!! #orgulloFPB E grazas ao noso profesor, Daniel, pola súa implicación 

O vindeiro martes 14 de maio ás 18:00 horas termos unha charla dirixida ás famlias no Salón de Actos de FP, no IES de Fene, na que falaremos sobre a prevención  da violencia de xénero, dentro dun programa socioeducativo levado a cabo pola Deputación de A Coruña: SUPRime o ConTRoL

Agardamos as familias do noso alumnado!!

Carta para os pais

O alumnado dos ciclos medios de soldadura e auto do IES de Fene están a participar no desafío Hiperbaric Challenge, deseño, prototipo e construción de coches de inercia, pero sempre dende unha perspectiva socialmente responsable, e hoxe presentaron dúas iniciativas que imos comezar este luns 26 de novembro e ata o día 18 de decembro son as seguintes:

☺️Unha campaña de recollida de xoguetes destinados a nenos e nenas de ata 14 anos. Os produtos que se entreguen deben reunir boas condicións de hixiene e de estado, ademais de ser seguros. Na medida do posible, que sexan sostibles e que non consuman pilas. 

☺️Unha campaña de recollida de alimentos principalmente non perecedeiros para o seu reparto ás persoas máis necesitadas.

Esperamos a vosa colaboración

SÚMASTE Á INERCIA DO HIPERBARIC CHALLENGE DO IES DE FENE?

Presentamos as bases de dous concursos:

 Concurso de deseño do LOGOTIPO do proxecto de igualdade do IES de Fene: #enFeneNino para alumnos e alumnas de 1º e 2º da ESO e Formación Profesional Básica

BASES LOGOTIPO

Concurso de CURTAMETRAXES do proxecto de igualdade do IES de Fene: #enFeneNino para alumnos e alumnas de 3º e 4º da ESO. Cámara...acción!

BASES CORTO

Páxina en Facebokk de EnFene-Nino

O alumnado de 1º ESO realizou a súa viaxe de fin de curso os días 12, 13 e 14 de xuño.

O primeiro día deron un paseo pola praia das Catedrais e visitaron El Capricho de Gaudí en Comillas, para finalmente instalarse en Santillana del Mar. Un día despois, estiveron no Parque de Cabárceno e fixeron unha visita ao Museo Marítimo de Santander. Xa de regreso, o día 14, tiveron tempo para adentrarse nunha mina e visitar o Museo da Minería de El Entrego-Langreo, así como para dar un paseo pola vila de Ribadeo.

Pasárono realmente ben, pero o mellor desa viaxe foi a sensación que ían deixando ao seu paso, xa que por onde pasaban foron felicitándonos polo bo comportamento que tiñan (cousa, por outra parte, habitual no alumnado deste instituto). Ás veces só reciben os reproches ás súas condutas, por iso, de cando en vez, tamén hai que felicitalos: parabéns, rapaces e rapazas!!

O pasado venres 12 de Maio os alumnos de 3º ESO do IES acudiron á charla de Cristina Otero Correa, clarinetista e colaboradora voluntaria no proxecto Vura Music Project, un proxecto de desarrollo e integración social a través da educación musical. 

Cristina falounos do proxecto, crear e manter unha escola de música en Moyo ( Uganda) para os mais novos, e falounos de África… e trasladounos alí durante un anaquiño de tempo, entre  as súas xentes, os seus costumes e as súas necesidades. E vimos fotografías, preguntamos, reflexionamos e compartimos ideas. Grazas Cristina por axudarnos, como tí dis, a ir mais alá do que ven os nosos ollos.