O vindeiro martes 28 de novembro, ás 16.00 horas, teremos no CEIP Xuvencos unha actuación dos Bolechas.
Os Bolechas falan das familias é unha actuación que se desenvolve dentro do proxecto Facemos Corresponsabilidade 2023 no marco do Plan Corresponsables, promovido pola Asociación de Familias Monomarentais de Galicia (FAGAMOS) co financiamento do Ministerio de Igualdade a través da Secretaría Xeral da Igualdade da Xunta de Galicia.
Destinado aos nenos e nenas en idade escolar e ás súas familias, a iniciativa pretende reforzar o concepto de diversidade familiar e da importancia do valor da corresponsabilidade tanto dentro da familia como no resto da sociedade. De forma lúdica e didáctica, os nenos e nenas poderán aprender sobre a aceptación e importancia da diversidade familiar, através dun conxunto de actividades como:
teatriño cun Bolecha monicreque
video de Os Bolechas falan das familias
taller de xogo de preguntas e desafíos
coñecer a web interactiva de Os Bolechas falan das familias
agasallo de materiais didácticos a todos os nenos e nenas asistentes
A entrada é de balde e non é imprescindible ser alumno/a do colexio onde se celebran para poder asistir.
Cumprimenta este formulario de inscrición para que o teu neno ou nena poida desfrutar destas actividades.
O luns 13 de novembro, o alumnado e profesorado do CEIP Xuvencos celebramos o magosto. Bailamos e cantamos un montón e tamén comemos castañas e chourizos ben deliciosos. Aquí tedes un pequeno vídeo que resume o noso dia.
Na semana do 6 ao 10 de novembro o alumnado de 4º de Educación Primaria coñeceu a Realidade Aumentada.
Primeiro fixeron o seu propio Merge Cube en cartulina blanca. Despois descargamos na tablet as aplicacións Merge Object Viewer, Merge Explorer e Merge HoloGlobe.
A continuación accederon ao menú de ciencia no visor de obxectos e escolleron a colección de anatomía humana, onde puideron ver os diferentes aparellos e órganos que compoñen o corpo humano e observaron cómo os obxectos se animaban e cobraban vida.
Foi unha experiencia moi bonita e que repetiremos en vindeiros temas.
Aquí vos deixamos un video para que vexades o ben que o pasaron.
O martes 31 de outubro tivemos unha terrorífica celebración. O alumnado e o profesorado do colexio celebramos o SAMAÍN!!!. Debemos dar a noraboa ao equipo de actividades complementarias e a todo o profesorado que se implicou e traballou moi duro para que os nenos e nenas do cole disfrutaran ao máximo.
Aquí vos deixamos un vídeo resumo das actividades.
A radio escolar supón un recurso extraordinario para traballar moitos aspectos do curriculum dun xeito atractivo e motivante para o alumnado. O profesorado do Xuvencos todos os anos fai diferentes formacións para actualizar ou amosar ó profesorado novo como realizar as prácticas de radio na mesa de son. Entre as actividades que realizaron, aproveitando a data de SAMAÍN, fixeron uns relatos de terror con varios efectos de son.
O dia 25 de outubro celebramos no colexio o día das bibliotecas. Nesta xornada amosamos ao alumnado o funcionamento da mesma. Ademais os rapaces e rapazas degustaron un delicioso almorzo saudable. Para rematar a xornada o alumnado de 5º e 6º fixo unha representación sobre o proxecto que levaremos a cabo no centro este curso, despois dun duro traballo de investigación ALFIN/ AMI dende as titorías e que ten que ver cos hábitos de vida saudables, o seu nome: "Xuve saudable".
Aquí tedes un pequeno vídeo da recopilación de actividades:
Miudiño S.Coop.Galega, ven de celebrar unha charla co alumnado de 3º a 6º de primaria, onde reflexionamos sobre que patio queremos no noso colexio. Intentaron detectar os problemas que mais lles preocupa nese tempo de lecer e nese espazo e buscaron solucións e alternativas posibles.
A cativada de hoxe en día ten cada vez menos oportunidades de elección, atopándonos cunha infancia cada vez máis dirixida en calquera ámbito da súa vida. Mais sendo, como son, suxeitos de dereito, é necesario darlles ferramentas, tempo e espazo para contribuíren coas súas opinións, desexos e necesidades á hora de intervir nese espazo común que é o patio da escola. Espazo que é maioritariamente empregado por nenas e nenos.
Por outra banda, tampouco podemos esquecer a gran contribución ao seu desenvolvemento cognitivo, sendo a reflexión, a análise, a comparación de propostas, a toma de decisións, etc, grandes estimuladores das funcións executivas cerebrais, con beneficio tamén, a medio e longo prazo, na súa construción de identidade, ademais de xerar un vínculo fermoso tanto co espazo como coas persoas adultas que acompañan ese proceso. O obxectivo final deste obradoiro é dar voz e liberdade de pensamento para poder extraer unhas conclusións a plasmar no plano do espazo, mediante o emprego de diferentes ferramentas en función da idade das persoas participantes.
O xoves 5 de outubro, o alumnado de 4º, 5º e 6º de primaria do CEIP XUVENCOS, aprenderon moito mais sobre CIBERSEGURIDADE e da importancia de ser coidadosos no mundo dixital, grazas a un contacontos musical, levado a cabo por: "Polo correo do Vento", un colectivo especializado en promover a lectura, a comprensión oral en GALEGO e o fomento da creatividade e expresión artística. Os rapaces e rapazas pasárono xenial. GRAZAS
O pasado martes 3 de outubro o claustro de Xuvencos participou nunha charla formativa (Poñendo os lentes) para a Prevención da Violencia Sexual contra a Infancia impartida pola asociación AMINO Galicia. Esta campaña do Consello de Europa trata de concienciar á comunidade educativa da importancia da prevención e detección da violencia sexual en menores. Recibimos información sobre os indicadores de violencia sexual infantil e pautas de actuación ante unha sospeita ademáis de material didáctico para traballar nas aulas a prevención.
