FAMILIAS

Esta semana avoas e avós do Taller de memoria achegáronse ata o cole,

despois de diversas reunións e ensaios para amosarnos tradición oral.

Somexirdos nun mar de contacontos e cancións da vila gozamos de

intres fermosos acariñados polas verbas do saber. Avoas e avós de

moitos de nós espallaron un legado oral que agora temos que protexer

con sumo coidado. Temos que protexelo do esquecemento e un bo xeito

e contando e cantando. Esta entrada irá medrando co paso dos días,

pois é moito o material que nos ofreceron. O mellor de todo e que floreceron

lazos e esta non será a última vez que coincidiremos.

Realizaremos diversas reunións ao seu carón, pois é tanto

o que saben que moito dubidamos que un ano chegue para contalo.

Gracias avoas e avós!

Chegado o tempo de Nadal moitas familias achéganse á biblioteca a

realizar unha documentación moi importante, a transmisión da tradición

oral da nosa música de Nadal: panxoliñas, cantos de reis e por suposto,

unha manchea de contos. Hoxe contamos coa visita de Jose de Vigo,

que agasallou ao alumnado de 5º e 6º con dúas panxoliñas que falan da

xeografía da nosa vila. Con elas inauguramos esta semana

de tradición oral de xeneración en xeneración.

 José de Vigo prometeunos voltar, aquí quedan

as panxoliñas grabadas para ir practicando nestes días.

A primeira é da súa colleita, escrita e cantada por José de Vigo.

Unha panxoliña na que collemos todos os de Cedeira,

de tódalas parroquias, perfecta para nos tempos que estamos. 

A segunda é unha canción mariñeira, a primeira noticia a recibimos

por unha mamá, falounos de Manolo do Mudo (en paz descanse)

e desta canción. Despois soubemos por Jose que a cantaban nos bares,

as fins de semana, despois de vir do mar, Manolo do Mudo, Manolo Vergara,

Javier Vergara e Manolo Pita Cribeiro ( O Norreca). Ata o de agora, aínda estamos

por saber de certo, se a letra é só de Manolo do Mudo ou hai máis autores.

Pero o que máis nos gusta é que permanecera na tradición oral. Hoxe pasa a

unha nova xeración que ten que encargarse de cantala moito e transmitila á seguinte.

Agasallos musicais da man dos que hoxe non están e grazas a José de Vigo.

Cantada polos nenos en homenaxe aos que hoxe non están.

 Podedes descargar a panxoliña e a canción nos ficheiros adxuntos.

Agora é a quenda da comunidade educativa e os diferentes axentes sociais.

O vindeiro 15 de decembro, o voluntariado de 6º de primaria levará a cabo

unha formación de usuarios para as familias. Para realizar esta visita agradecemos

que vos apuntedes seguindo as indicacións do cartaz,

aínda que non queremos que ninguén quede sen facer a visita,

se é que pode vir no último momento.

A rapazada vos guiará pola Biblioteca Lía a través dunha presentación,

vos explicará que é a CDU, fará un mini xogo e vos acompañará a unha

visita guiada polas instalacións. A formación durará aproximadamente unha hora.

Esta formación é algo necesario e importante, as portas da biblioteca e da escola

ábrense ese día para que as familias coñezades un espazo cheo de recursos,

que alberga múltiples proxectos. Un espazo que é da rapazada pero tamén do pobo.

Esperamos vervos o 15 de decembro ás 12:30h. na Biblioteca Escolar "Carlos Labraña".

Almudena Molina agasalla á rapazada de segundo cun contacontos

"La mochila invisible" de Stefanie Sherbon

(Autora), Editoria: Independently published.

Unha actividade do programa Lectura e Familias,

a través da Biblioteca Humana-Polos Creativos.

Mónica Bellas agasalla á rapazada de segundo cun contacontos

"Don Medricas" e "Dona Fachendosa" de Roger Hargreaves

(Autor), Editorial Alhambra.

Unha actividade do programa Lectura e Familias,

a través da Biblioteca Humana-Polos Creativos.

As familias dos Vagalumes volven semanalmente

realizar os grupos interactivos na biblioteca ou na aula.

Hai cinco grupos cooperativos cun adulto que dinamiza a actividade,

encargándose de promover a participación de todo o alumnado e

asegurandose que entenden e son quen de

explicar a actividade e posteriormente, realizándoa.

Cada 15/20 fan un cambio e tódolos grupos van rotando por

tódalas actividades. Nesta semana tocou completar os ósos do

esquelete buscando a información nos fondos da biblioteca,

xogaron a comprar productos e pagalos, realizaron unha comprensión

lectora sobre a alimentación saudable, recordaron as normas ortográficas

por medio de ilustracións e traballaron os meses do ano e as estacións.

Para asistir a esta actividade as familias asinan uns permisos e un documento de confidencialidade.

Como vén sendo habitual ano a ano, a biblioteca da escola embárcase

nun proxecto de traballo no que a colaboración de toda a comunidade

educativa é condición indispensable para arribar en bo porto.

Basearemos coma sempre as nosas investigacións no currículo

cedeirés e así propoñemos este curso un tema que forma

parte esencial da existencia da nosa vila A MÚSICA.

Cedeira...unha vila que non se entende sen o compoñente musical.

Foron, son e serán moitos os músicos e agrupacións que manteñen

viva a nosa tradición musical. A música é parte da vida cotiá:

cantamos cando xogamos, cando contamos contos ,

despois dun xantar compartido e mesmo cando traballamos,

forma parte das nosas vidas e da nosa historia como pobo.

Non entenderemos pois o currículo cedeirés sen o compoñente musical.

Queremos achegar aos nosos nenos e nenas a nosa tradición máis sonora,

queremos facelo dende a escola, dende a biblioteca

e coa axuda inestimable de todos vosoutros.

Ao estar en vésperas do Tempo de Nadal e coa intención de ir preparando

os cantares de aguinaldo iniciamos este proxecto. Se conservades na vosa

memoria ou na dos vosos avós algún cantar tradicional, cubride o seguinte

cuestionario que vos enviamos ou solicitade un na biblioteca ou en secretaría.

https://www.facebook.com/bibliotecacarloslabranha/
@beCarlosLabrana
biblio.nicolas.del.rio@gmail.com

A Biblioteca Humana, dentro do programa Lectura e Familias,

volve outro ano máis para facer escola entre todos e todas!

Está claro que as nosas xentes son fonte de recursos diversa.

Ademáis a biblioteca, as mestras e os mestres somos conscientes do poder motivador

que pode exercer que a avoa, o tío, a madriña, a veciña, o curmán, mamá, papá...

se achegue á escola e forme parte dela, que cree, ensine, lea, constrúa coñecemento.

Por todas estas razóns e moitas máis, abrimos novamente o banco humano

que abarca tres grandes obxectivos:

a)Continuar ampliando as persoas libro (contar oralmente unha vivencia, experiencia, saber...

a un grupo pequeno de persoas que logo teñen opción a facer preguntas sobre o comentado).

b)Acudir na hora de ler a contar unha historia a tódolos

compañeiros e compañeiras da aula do seu familiar.

c)Realizar un ou varios obradoiros sobre a temática que se solicita co alumnado.

A escola conta cunha gran dotación de recursos materias de Polos Creativos e da biblioteca escolar.

Somos moi afortunadas e afortunados pois temos un centro con gran cantidade de material.

Agora é necesario sacarlle o máximo partido para aprender do mellor xeito que sabemos, Xuntos!

O alumnado de primeiro realiza unha curtametraxe

sobre a realidade das aulas galegas con alumnado extranxeiro. 

O fai coa axuda das familias que tamén participan en diversos ámbitos,

tanto na actuación como na música.

Agradecer a colaboración de todos eles, en especial de Antonio Rodríguez Bustabad.

O pasado 28 de maio celebramos unha xornada da Biblioteca Humana

con Mey Lin Apac Rivera, co seu libro "Caminos para reconocer tu título universitario".

Atracou na nosa biblioteca da man da súa autora.

Historia que perdurará en audio, no noso catálogo Meiga,

para escoitar sempre que se desexe.

A palabra foi a protagonista da data, pero tamén o que

ela teceu, pois unha manchea de rapazada grande e pequena e xente da vila que tivo

o interese de escoitar achegouse e entre libro e libro, as verbas crearon redes.

Estas redes para todas e todos, pero en especial para a rapazada miúda ten un valor

moi especial. Son os lazos de pertenza, de identidade, de cariño e agarimo.

Hoxe podemos compartir o seu libro con todos vos!

Agasallando verbas!

Unhas imaxes da xincana sobre o noso PDI, pola praia e coas familias.

A piques de rematar o curso gozamos dunha xincana sobre o noso PDI,

pola praia e coas familias. En grupos de 3 ou 4 nenas e nenos, cun adulto

responsable, reunímonos na biblioteca para explicar as probas do padlet.

Unha aplicación coa que queremos experimentar. Os adultos levaban un

móbil e, compartida a ligazón, obtiñan as 13 probas propostas. Probas de busca,

de creacion con cunchas, identificación, escoita de sons, escritura, xogo, mapas,

baño, recollida de lixo e invasoras... Dende o móbil, gravaban sons ou fotografaban

as actividadades. Para ser o noso primeiro intento, todos o fixeron moi ben.

Quen non foi quen de mandalo ao padlet o fixo por medio dun Whatsapp.

O mellor foi a convivencia, o respecto, o pasar unha mañá xuntos.

Amosamos o resultado no PADLET.

Se non o ves ben, podes acceder clicando aquí! 

E animarte a facela xincana.

 

 

 

 

 

 

Karen e Amaya cóntanlle a 4 anos "O Grúfalo".

Lecturas e familias. Biblioteca Humana/Polos Creativos.

Ledos de compartir coa comunidade educativa, que onte non colleu

no Auditorio, o filme de Alicia Freire e a rapazada do voluntariado escolar,

esas mociñas e mociños que agasallan co seu tempo libre a outro alumnado.

Convidando a ler, organizando andeis, aconsellando xogos, lecturas, axudando a investigar...

Gracias Alicia, por ser como es, unha artista de pes a cabeza pero cunha sensibilidade

especial. Fuches quen de escoitar á rapazada e facer que a súa palabra tomase decisións!

Parabéns por esta fermosa curtametraxe!

Preparade panos!

O alumando de 3º continúa gozando do álbum de cromos.

Namentres, recibimos a sorpresa da familia de Xiana

(unha nena curiosa e namorada da flora e da fauna).

A súa nai crea un canal de youtube chamado Caderno de campo.

Entre as dúas crean uns vídeos que teñen un valor documental que

dende logo aproveitaremos con toda a rapazada.

Moitas gracias a estas dúas naturalistas!

Os Vagalumes de 1ºC levan un curso ensaiando a obra

de teatro escollida, será "Os Ratos" de Carlos Labraña,

pero realizarán unha adaptación que leva por nome 

"Os gaiteiros de Hamelín". Durante algunhas semanas os

grupos interactivos xiraron ao redor do atrezzo de teatro,

en cada mesa un adulto con tres ou catro raparigos ou

raparigas foi facendo pequenos complementos que levarán

no seu traxe ou decoración para o escenario.

Xa case teñen todo rematado e, en breves, poderedes ver a

súa actuación. Esta é unha mostra do traballo

artístico nos grupos interactivos.

Inés, xuntos cos seus pais, Verónica e Pablo fixeron un traballo

de investigación sobre os seus parruliños e o trouxeron para

amosárnolo. Aprendemos como son os peteiros, as patas,

as especies... e unha morea de cousas máis sobre os parruliños

de Inés. Unha aportación importante para o proxecto

"Naturalmente, aprendendo!".

Moitas gracias por vir e ensinarnos tanto sobre estas aves!