Gatiza apareceu novamente na escola e, coma sempre que vén por aquí, é porque necesita da vosa axuda. Esta vez quere que gravedes un vídeo curto, dun minuto como máximo, dándolle algún consello sobre ecoloxía, reciclaxe, sostibilidade ou medio ambiente. Tedes ata o venres día 19 de abril para traelos á escola nunha memoria usb co voso nome escrito.

Lembrade, o vídeo ten que estar en galego e gravado en horizontal.

Gatiza conta con vós!

O pasado 21 de marzo conmemoramos no centro o Día Mundial da Síndrome de Down.

Para isto, levamos a cabo dúas actividades, por unha banda, todos e todas trouxemos calcetíns desparellados como símbolo de diversidade. 

Por outra, o alumnado de 2º de Educación Primaria, como verdadeiros e verdadeiras expertas acudiron ás diferentes aulas da escola a facer unha campaña de sensibilización e visibilización sobre as persoas non verbais e o emprego de comunicadores.

Comezaban a sesión lendo o conto de Mimo, un pequeno paxaro que non podía piar. Por isto, pensaba que tampouco sería quen de voar nin de contar sementes. Estaba moi confuso. Ao final, unha pomba moi sabia ensínalle outro xeito de expresión: a música. Así, Mimo pode expresar cando está triste, cando está contento… Mimo tamén descobre que a través da pintura pode contar moitas cousas.

Logo os nenos e nenas explicaron o que era un comunicador, os aspectos fundamentais para facer un bo uso do mesmo e incluso o que tiñamos que facer se queríamos comunicarnos cunha persoa que o empregue, sempre sendo respetuosos e respetuosas.

Parabéns nenos e nenas polo voso traballo! Sodes un verdadeiro exemplo!

“Non poder falar, non significa non ter nada que dicir”

En Arts de 5º e 6º estivemos traballando sobre a marabillosa pintora Hilma af Klint, que nos abraiou coas súas espectaculares obras e coa súa incrible historia.

Neste mes de marzo, mes da muller, en Arts de terceiro ciclo estamos afondando sobre mulleres artistas, e tras Bridget Riley como figura representativa do Op art, desta volta tocoulle o turno á artista sueca Hilma af Klint, que foi a pioneira do arte abstracto, xa que creou os seus primeiros cadros abstractos en 1906, anos antes que Wassily Kandinsky, Piet Mondrian e Kazimir Malévich, quenes tradicionalmente foron considerados os primeiros en realizar obras deste tipo.

Os cadros abstractos de Klint non foron coñecidos ata 1986, xa que ela mesma deixou instrucións de que as súas obras debían permanecer ocultas e non podían ser amosadas ao público ata polo menos vinte anos despois da súa muerte, debido a que consideraba que a xente da súa época non estaba preparada e non comprendería ese tipo de arte.

Tanto a biografía coma a obra desta incrible muller son merecedoras de que todas e todos investiguemos e afondemos máis sobre elas. Polo menos a nós, Hilma roubounos o corazón.

Tras coñecela e admirar as súas obras, os rapaces e rapazas de 5º e 6º crearon a súa persoal versión do arte de Hilma, mesturando formas xeométricas e outras máis orgánicas que nos lembran ás que atopamos na natureza, empregando cores vivas e vibrantes. Ademais, debían engadir, como mínimo, un adxectivo en inglés que elas e eles consideren que describe como son as mulleres.

O resultado, coma sempre, un espectáculo para os sentidos, ou se non, vide ver a exposición da planta baixa da escola e veredes.

Un ano máis o Leprechaun estivo facendo das súas en Centieiras, pero logrou fuxir e non caeu en ningunha das trampas preparadas polo alumnado da escola. Iso si, deixoulles un pequeno agasallo en forma de tatuaxes temporais e ciscou trevos de papel polas trampas como sinal da súa visita... algo é algo!

Houbo moitísimas trampas, todas marabillosas e feitas con gran enxeño, mais este Leprechaun é un fedello e non hai quen o pille!

Ademais, tiñamos un photocall para nos converter en simpáticos Leprechauns, mirade que riquiñas e riquiños están:

Better luck next year and happy Saint Patrick's Day!

O alumnado de 5º e 6º de primaria tivo un encontro co escritor Lois Pérez para falar sobre o seu libro A Gruta da Torre, que lemos nas aulas este trimestre.

A Gruta da Torre cóntanos a historia dun rapaz chamado Lois, que vai coa súa familia a pasar outro verán en Ribadeo. Quique, Greta e o resto da cuadrilla agardan por el, e ese ano hai tamén unha nena nova. Non a coñece, mais morre por falar con ela... Na vella biblioteca da Torre dos Moreno, Quique encontra un libro e, no seu interior, un misterioso documento que fala dun pasadizo. Onde estará? Deciden que teñen que atopalo. Unha aventura trepidante, atravesada pola forza da amizade, os primeiros amores e o valor dos libros, no Ribadeo de 1990.

Desfrutamos moito coa lectura do libro na clase, comentando o que lles ía acontecendo aos personaxes e imaxinando que pasaría a continuación. O libro fixo voar a nosa imaxinación, fíxonos rir ás gargalladas e, ás veces, emocionarnos bastante, e o encontro co seu autor non ía ser menos. Desfrutamos moito falando con Lois sobre o seu libro, preguntándolle por fin esas inquedanzas e dúbidas que ía aparecendo ao longo destas semanas, segundo avanzabamos na lectura, e escoitando as historias tan graciosas e curiosas que nos contou. Ata descubrimos que foi profe de Centieiras hai anos!

Moitas grazas, Lois, por animarnos a seguir gozando da lectura!

A rapazada de 5º e 6º de primaria estivo traballando arreo nos obradoiros organizados polas titoras para o Día Internacional da Muller.

Este 8 M quixemos reivindicar que segue sen haber unha igualdade real entre homes e mulleres no reparto das tarefas do fogar e no coidado das fillas e fillos, actividades que continúan a estar principalmente en mans das mulleres. O mesmo acontece coa porcentaxe de homes e mulleres en postos de responsabilidade e toma de decisións, que seguen estando maioritariamente en mans de homes.

Para facer fincapé na necesidade de seguir avanzando cara á ansiada igualdade, quixemos facer partícipes ás nosas alumnas e alumnos na realización de tarefas do fogar tales coma varrer e fregar o chan, limpar os cristais e tender e dobrar a roupa. Ademais, tamén estiveron a coser, facer sopas de letras sobre mulleres con premios Nobel e caleidociclos.

Previamente a esta xornada o alumnado de 5º e 6º fixo un mural e outras decoracións en Arts para engalanar o cole e tomar conciencia da importancia e necesidade das reivindicacións feministas.

Foi un tempo de convivencia e traballo en equipo moi enriquecedor, desfrutárono moito e deixaron a escola coma os chorros do ouro! Agardamos que sigan a desenvolver na casa as aprendizaxes adquiridas 

O pasado día 28 de febreiro tivemos a sorte de contar cun obradoiro de educación sexual chamado "De bo rollo!: Educación sexual para aprender a querernos ben", que aborda as verdadeiras inquedanzas da rapazada, con enfoque sexolóxico, entendendo que para construir unha casa non podemos comezar polo tellado.

Foi un obradoiro moi interesante e ameno, útil e necesario, pois non hai maior protección que ensinar a rapazada a pensar, a quererse ben, a querer ben, a repectarse e a respectar.

O alumnado de 5º e 6º de primaria estivo aprendendo e traballando en Arts durante as últimas semanas de febreiro sobre Op art, un estilo de arte visual abstracto que emprega as ilusións ópticas e consegue imaxes que simulan movemento e desafían aos nosos ollos.

Unha das principais representantes desta corrente artística é Bridget Riley, pintora británica coñecida pola forma na que os seus traballos xogan coa vista de quen os admira. Afondamos no seu traballo e o alumnado realizou as súas propias obras de Op art.

Parabéns, artistas!

A convivencia escolar constrúese a través de todas as persoas que forman parte da comunidade educativa; esta construción será positiva si é realizada desde o respecto aos demais, a aceptación das diferenzas e a participación responsable na vida cidadá en igualdade. Traballando a convivencia escolar positiva e o benestar emocional, estase a fomentar que o alumnado se sinta parte do centro educativo ao mesmo tempo que se lle proporcionan as ferramentas precisas para respectar tanto os dereitos individuais como sociais das persoas. Deste xeito, fomentamos tamén condicións oportunas para o autocoidado e a autoestima.

É por todo isto, polo que este ano dende comezo de curso estamos a levar a cabo distintas actividades para afianzar o modelo dunha boa convivencia escolar. Comezamos con propostas de cohesión a nivel de aula e de centro e seguimos coa implementación dun programa de mediación escolar. 

Recentemente rematamos a primera fase deste programa. Foron unhas mañás moi produtivas grazas a Andrea Bechlian nas que traballamos a resolución pacífica de conflitos, a asertividade e tamén a autoestima e o autoconcepto.

Nesta primera fase tamén levamos a cabo unha escola de nais e pais coa finalidade de proporcionarlles información sobre este programa. Familia e escola somos aliados na complexa tarefa de educar. 

Moi pronto comezaremos coa segunda fase: formación específica para o alumnado mediador. 

Como parte da celebración do Día da Muller e da Nena na Ciencia, as clases de quinto e sexto fomos ao CIS Tecnoloxía e Deseño de Ferrol para asistir a un espectáculo científico centrado na importancia das mulleres científicas e tecnólogas ao longo da historia.

A charla, conducida polos divulgadores Iria Ollero e David Ballesteros, que levaron a cabo chamativos experimentos, permitiu que o noso alumnado se aproximara dun xeito entretido a grandes mulleres como Hipatia de Alexandría, Marie Anne Pierrette, Rosalind Franklin, Marie Curie ou Hedy Lamarr, entre outras, que fixeron importantes aportacións científicas e que nunca recibiron o recoñecemento que merecían.

Hoxe, 23 de febreiro, conmemoramos o Día de Rosalía, unha das autoras máis importantes da nosa literatura. Para isto, tiñamos previsto saír polas distintas prazas do concello de Fene para recitar poemas de Rosalía, mais o mal tempo non nolo permitiu e, finalmente, realizamos o recital na pista cuberta do colexio.

Comezaron os rapaces e rapazas de sexto cantando unha versión musicada de Cantarte, hei Galicia, poema pertencente á obra Cantares Gallegos publicada o 17 de maio de 1863, data que marca a celebración do Día das Letras Galegas. 

Despois da actuación de sexto, por quendas, todos os cursos recitaron poemas de nosa autora máis universal. Fixérono todas e todos de marabilla, parabéns!

Ademais, coma sempre, contamos coa asistencia das familias que acudiron como público ao recital. Moitas grazas por acompañarnos, a pesar da chuvia e do frío.

O mércores 21 de febreiro recibimos de novo a visita de Sara, que pertence á Garda Civil e que sempre se encarga de explicar cousas moi interesantes e importantes aos rapaces e rapazas para que fagan un uso responsable e seguro de internet.

Nesta charla, pertencente ao Plan Director, explicoulles como protexerse de distintos tipos de ciberacoso, como poden ser o grooming e o sexting.

2º CICLO VISITAMOS O MELLOR MURAL DO MUNDO.

Por se non o sabiades, o mellor mural do mundo está en Fene;si, aquí ao lado do cole.... Así que aló nos fumos a velo.

O mural do artista Sfhir da violonchelista é fermosísimo, e sacamos unhas fotos para que queden no noso recordo.

Ademais vimos outro mural na parede  que tamén nos gustou moito.....

Fantástica saída !!!

Esta mañá volvemos desfrutar dunha xornada de xogos en familia en 5º e 6º de primaria.

Nesta ocasión os xogos elixidos foron:

    • Splittissimo, un xogo para comprender mellor as fraccións e as súas equivalencias mediante porcións de pizza do que se encargou Marisa, a nai de Óscar.

    • ODS, un xogo con preguntas sobre os obxectivos de desenvolvemento sostible que dinamizou Irene, nai de Stefano.

    • Ritmo Bola, un xogo moi entretido de atención no que hai que seguir o ritmo de We Will Rock You e encadear distintos signos sen equivocarse e que estivo dirixido por Diego, pai de Nicolás.

    • Panic Lab, un xogo de observación e agudeza visual no que hai que atopar as amebas que escaparon do laboratorio e fixarse moi ben que cumpran os requisitos amosados nos dados. Deste xogo encargouse Sonia, nai de Daniela.

    • Bobo Bobo, un xogo de cartas en equipos que pon a proba o enxeño dos participantes, que estivo dinamizado por Mónica, nai de Bruno.

    • Timeline, un xogo de cartas no que hai que crear unha liña temporal, neste caso dos descubrimentos, e que estivo a cargo da mestra Cris.

Todos os xogos foron un éxito e tanto alumnado como familias e profes pasamos un anaco ben entretido no que a convivencia e a diversión foron a nota predominate.

Grazas, familias, por compartir este tempo de xogo connosco!