CURSO 2ºA 2ºB
NOVEMBRO - MES DA CIENCIA EN GALEGO
Enviado por Ainhoa Suarez o Mar, 30/11/2021 - 12:39Nestas datas, estamos a celebrar na escola o MES DA CIENCIA EN GALEGO. Con tal motivo, visitamos o LABORATORIO para facer unha experiencia sobre OS SENTIDOS, un tema que ademais formaba parte no noso proxecto de ciencias "COIDÁMONOS E COIDAMOS".
Nas seguintes fotos podedes observar o ben que o pasaron experiementando!
Por outra banda, recibimos a visita de Cris, exalumna do centro e alumna de prácticas 1º curso de primaria. Cris, antes de estudar para mestra realizou estudos de hixiene bucodental, e veunos contar cómo debemos coidar os nosos dentes, falounos das enfermidades ocasionadas por unha mala hixiene e lembrounos da importancia de acudir ao DENTISTA, cando menos, unha vez ao ano.
DÍA INTERNACIONAL DA ELIMINACIÓN DA VIOLENCIA CONTRA A MULLER
Enviado por Marta Valbuena o Xov, 25/11/2021 - 21:04Hoxe, 25 de novembro, é o DÍA INTERNACIONAL DA ELIMINACIÓN DA VIOLENCIA CONTRA A MULLER.
Celebrámolo nas aulas de 2º con lecturas de contos relacionados, visionado de historias como PEPUCA e decoración de axendas. Pero a actividade coa que mellor o pasamos foi creando un lazo xigante no que plasmamos as nosas mans como símbolo para que pare a violencia de xénero e que despois colgamos na entrada da escola para que non o esquezamos!
Deixámosvos algunha imaxe.
CONTACONTOS DO ALUMNADO DE 6º DE PRIMARIA
Enviado por Blanco Rodrígue... o Mar, 23/11/2021 - 00:38Hoxe día 22 de novembro o alumnado de 2º A tivo unha hora de ler moi especial xa que Paula, Martín, Martina, Violeta e Blanca, todos alumnos e alumnas de 6ºA e membros do equipo da biblioteca do centro, contaronlle o conto das FORMIGUIÑAS FILANDEIRAS de Victoria García no patio da escola. Os contacontos fixéronno moi ben, mesmo viñan vestidos para a ocasión e, os nenos e nenas de 2º estiveron moi atentos. Se premedes na imaxe podedes ver o contacontos.
OBRADOIRO COAS TANXUGUEIRAS
Enviado por Marta Valbuena o Lun, 22/11/2021 - 21:42Hoxe, 22 de novembro celebramos o día da música. Aproveitando esta data, o venres tivemos o inmenso placer de recibir na nosa escola ás TANXUGUEIRAS para levar a cabo un obradoiro de música tradicional no que aprendemos moitas cousas.
Comezaron explicándonos que é unha pandeireta, a diferenza con outros instrumentos semellantes como a pandeira e o pandeiro... Explicáronnos a forma de tocala e incluso practicamos ritmos sinxelos con frases como ANA COME PAN, PLÁTANO, EU SON DE MARÍN... E así recoñecer os distintos tipos de cancións galegas: RUMBA, XOTA, MUIÑEIRA... Tamén debuxamos unha pandeireta para elas! Finalmente cantáronnos unhas cantigas nas que tiñamos que adiviñar o ritmo que tocaban. Quedamos abraiados coas súas voces!!!
Resultou unha experiencia moi bonita e agradecémoslle ao pai de Alba que nos facilitara esta visita.
Moita sorte nos vosos proxectos, Tanxugueiras, e grazas por compartir con nós a vosa cultura musical!
Se queredes escoitalas un chisco, premede nesta imaxe que enlaza cun VÍDEO.
20 DE NOVEMBRO - DÍA DOS DEREITOS DXS NENXS
Enviado por Ainhoa Suarez o Lun, 22/11/2021 - 14:31O 20 de novembro celébrase o DÍA DOS DEREITOS DA INFANCIA.
Con tal motivo, e aproveitando a temática do noso proxecto de
ciencias "COIDÁMONOS E COIDAMOS", o alumnado elaborou
cadanseu libro de dereitos.
Primeiro tiveron que seleccionar e recortar os dereitos correctos, xa
que había algúns "trampa", e despois pegáronos en folios
de distintas cores. Finalmente compilamos todo e engadimos unha
bonita portada.
Agardamos que vos guste o resultado!
Por último, dende VALORES, construimos entre tdoxs o TREN DOS DEREITOS DA INFANCIA.
ALIMENTÁMONOS BEN POLO MAGOSTO!
Enviado por Marta Valbuena o Dom, 14/11/2021 - 21:03Durante esta semana o alumnado de 2º realizou múltiples actividades relacionadas coa alimentación, a principal delas foi o MAGOSTO que puido celebrarse con xogos tradicionais no patio da escola acompañados de moi bo tempo. Ademais participaron en dous obradoiros:
- Fai clic ao teu bocata.
- Ti si que es un bo peixe!
Neles aprenderon moito sobre peixes, as propiedades que nos aportan e incluso sobre artes de pesca.
Se premedes na imaxe, poderedes ver un vídeo con todas estas actividades. Aliméntate ben!
24 DE OUTUBRO - ANIVERSARIO DE PAPIRUS!
Enviado por Ainhoa Suarez o Ven, 05/11/2021 - 14:15O pasado 24 de outubro, celebramos o día das Bibliotecas Escolares, que ao mesmo tempo é o día do aniversario da nosa mascota de biblio: O POLBIÑO PAPIRUS! Por este motivo, elaboramos uns marcapáxinas personalizados, onde incluimos agasallos e felicitacións para el.
PARABÉNS PAPIRUS!!!
SAMAÍN
Enviado por Ainhoa Suarez o Sáb, 30/10/2021 - 11:16Esta semana estivemos celebrando o SAMAÍN no noso centro. O alumnado foi traendo as cabazas que personalizaron coa axuda das familias. A temática deste curso é o aniversario da escola "50 ANOS MEDRANDO XUNTOS". Non era nada fácil, pero fixérono xenial! Podedes ver o resultado nestas terroríficas fotografías.
DÍA DAS ESCRITORAS
Enviado por Marta Valbuena o Xov, 28/10/2021 - 22:51O pasado 18 de outubro celebramos o DÍA DAS ESCRITORAS, e fixémolo a través dunhas actividades dende a biblioteca xurdidas a partir dunha exposición de libros escritos por diversas autoras. O obxectivo é ser consciente da cantidade de libros que coñecemos e foron escritos por mulleres.
Botade un ollo a algunhas destas tarefas realizadas polo alumnado de 2º!
Aos nenos e nenas de 2º A gustoulles moito o traballo das escritoras que fixeron na biblioteca, realizaron uns debuxos moi bonitos que colocamos na cortiza da entrada a clase. podedes ver aquí unha foto.
ERUPCIÓN VOLCÁNICA!
Enviado por Ainhoa Suarez o Mér, 13/10/2021 - 13:59Despois da erupción do volcán CUMBRE VIEJA da illa da Palma, o alumnado de 2ºC estivemos traballando sobre o tema na aula. Unha vez coñecimos as partes dun volcán, construimos a nosa propia MAQUETA, e finalmente fixemos unha ERUPCIÓN VOLCÁNICA mesturando bicarbonato, colorante e vinagre.
Agardamos que vos guste!
Na clase de 2º A tamén creamos a maqueta do volcán de Cumbre Vieja e intentamos reproducir a Paisaxe da illa de La Palma para logo experimentar a explosión do volcán cos ingredientes mencionados. Se premedes na seguinte imaxe podedes observar a emoción do alumnado.
O alumnado de 2ºB tamén construiu un volcán e para iso empregou un molde e escaiola. Despois decorárono con témperas e plastilina ata que conseguiron facer unha illa. Finalmente fixérono estoupar cos mesmos ingredientes que os outros cursos. Aínda que a erupción non foi moi grande, valeunos para aprender máis sobre os volcáns. Premede na imaxe para ver todo o proceso!
- « primeira
- ‹ anterior
- …
- 4
- 5
- 6
- 7
- 8
- 9
- 10
- 11
- 12
- …
- seguinte ›
- última »
