ENTREGA DA CESTA DE NADAL

 

Onte, 20 de decembro, fíxose entrega da Cesta de Nadal que sorteamos e coa que conseguimos fondos para financiar as diferentes excursións que están programadas polos Departamentos para este curso. Na fotografía aparece a alumna Nuria Danis e o premiado acompañados do profesor Fernando Vigo encargado da xestión do sorteo, a xefa de estudos Teté R. Louro e a vicedirectora Concha Sabucedo.



CESTA DE NADAL

NÚMERO PREMIADO
07825
A cesta pódese recoller até o 21 de Decembro no propio instituto. De non aparecer o gañador o premio será doado a unha institución benéfica da vila.

Esta é a Cesta de Nadal que grazas á colaboración de Gadis sorteamos no centro. Coas ganancias financiaranse varias das excursións proxectadas para este curso como a Viaxe a Blanes, en xuño, para o alumnado de 2º da ESO na que farán un curso de inmersión en inglés ou a viaxe a Andorra de fin de etapa, para os de 4º da ESO. Grazas a todos, pais e nais, profesores e profesoras e a Gadis polo esforzo realizado para facelo posible.



VISITA Á CATEDRAL

 

O alumnado de Historia da Arte e de 2º de ESO A pasou a mañá do 7 de decembro entre arcos de medio punto, bóvedas de canón, esculturas románicas e traballos do Mestre Mateo. Fixeron o percorrido polo Pazo de Xelmírez, tribunas e tellados nunha interesante visita guiada. Logo coñeceron o coro mateano do Museo e para rematar un paseo polas naves da catedral despois de ver voar o botafumeiro. O grupo converteu a mañá de traballo nunha agradable visita para os acompañantes.

 



ENTREGA PREMIOS BARBANTIA

Na mañá do sábado 26 de novembro tivo lugar na Casa da Cultura de Noia a entrega dos Premios Barbantia da Cultura 2011 organizados pola Asociación Cultural Barbantia e o Concello. No acto presentouse o novo Anuario de Estudos do Barbanza e o novo número do suplemento cultural A Voz de Barbantia. O acto estivo presidido polo coordinador do Anuario, Manuel Cartea, o presidente da asociación, Xesús Laiño e o Concelleiro de Cultura de Noia, Xavier Rodríguez. Trala presentación das publicacións fíxose entrega do Sereo aos galardoados nesta ocasión: Paola García Paz, pintora, a poeta Eva Veiga e aos responsables da Casa da Gramática  Xavier Castro, Lola Arxóns e Concha Sabucedo. Parabéns a organización e aos premiados.



25 DE NOVEMBRO

 

O 25 de novembro é o Día Internacional da Loita contra a Violencia de Xénero. No IES Virxe do Mar sumámonos á sensibilización que esta celebración pretende. Desde o Departamento de Orientación traballouse, con grupos da ESO, ao longo do mes de novembro na elaboración de materiais audiovisuais que se van expor no Concello de Noia. Mentres na Biblioteca Maria Mariño do centro teñen feita unha selección de lecturas, música e películas das que dispoñen e nas que se reflicte esta tremenda situación que están a vivir miles de mulleres no mundo día a día.



VISITA Á ESCOLA TÉCNICA DE MINAS EN VIGO

O mércores 9 de novembro un grupo de alumnos do  noso centro foi de visita á ETSE de Minas da Universidade de Vigo, con motivo da celebración da Semana da Ciencia. Ali viron como funciona unha cámara termográfica, un motor Stirling,un láser 3D,un laboratorio de ensaio de materiais...e asistiron a unha charla sobre os plans de estudos da Escola e as saídas profesionais.Unha visita interesante para, quizais, futuros enxeñeiros. A visita foi organizada polos profesores Emilio Regueira e Felipe Roget do Departamento de Tecnoloxía.



Distribuir contido