IES VILAR PONTE

Estimadas familias:

Ante as contradicións flagrantes da Consellería de Educación, e despois de ver o que din nos medios, que é a única forma de informarnos estes días, posto que oficialmente non temos comunicación ningunha, queremos deixar claro o seguinte:

Segundo o Conselleiro, os centros temos a liberdade de organizar o curso como creamos mellor, optimizando os medios existentes, buscando espazos, facendo desdobres, utilizando mamparas ou optando polo ensino semipresencial. Todo isto é o que di o Conselleiro nos medios, nunca directamente aos institutos. Facendo caso destas indicacións, neste centro optamos por solicitar desdobres, para manter o mesmo horario que os cursos anteriores e o 100% da presencialidade, porque consideramos que desta maneira mantemos un ensino de calidade, cuns estándares de seguridade. Para iso necesitamos 5 unidades (grupos) máis dos que contamos en xullo, co protocolo anterior, e temos solicitado 4 profesores máis á Consellería. Desbotamos o uso de mamparas por ir en contra das indicacións do Ministerio de separar os alumnos a 1,5m e porque para este centro é inasumible a súa compra, dado que non temos presuposto extra. Da mesma maneira desbotamos a semipresencialidade porque a consideramos un mal menor no caso extremo de ter que pechar o centro ou algunha clase.

Queremos que quede claro que calquera outra medida, como a redución da distancia entre mesas, o uso de mamparas, a semipresencialidade, etc, é unha imposición da Consellería que teremos que acatar como funcionarios, pero non é o noso desexo nin a nosa opinión.

Cremos que é necesario manternos firmes para ter un ensino público de calidade.

O Equipo Directivo.

Estimados membros da comunidade educativa do IES Vilar Ponte:

En xullo, atendendo ao protocolo vixente daquela, o equipo directivo traballou para deixar o curso 20/21 preparado: asignados os alumnos por aula e materia, distribuidas as horas nos departamentos, separadas as mesas e demais mobiliario nas aulas a 1m...

O 31 de Agosto, a Xunta publicou un novo protocolo, que tiraba polo chan todo o traballo feito: os alumnos tiñan que estar a 1,5m. Isto implica que as aulas reducen drasticamente a súa capacidade (pasan de 40 a escasos 18-19, e de 30 a 15...). Por tanto, houbo que recalcular o número de grupos por curso, número de profesores necesarios, retirar todo o mobiliario que non fose estrictamente necesario (houbo que desmontar a aula de música, as dúas de plástica, a biblioteca: instrumentos musicais da sala de música, sofás da biblioteca, mesas e sillas sobrantes das aulas, taquillas...).

O equipo directivo traballou incluso en sábado para poder ter todo preparado nas mellores condicións posibles. Neste momento, o centro está preparado para impartir clase cos alumnos a 1,5m. Pero agora mesmo as informacións desde Inspección educativa son contradictorias:

A día de hoxe (11 de setembro) non sabemos se vamos contar co profesorado extra necesario prometido, se vamos poder ter un grupo máis por curso ou non, se os rapaces van estar a 1,5 m ou a 1m con mamparas... Nesta situación, é MATERIALMENTE IMPOSIBLE comezar o curso nas datas previstas (16 a 18 deste mes).

Seguiremos informando.

E Equipo Directivo.

A matrícula de Setembro para o curso que entra realizarase coas seguintes indicacións:

4 SETEMBRO- RECOLLIDA DE SOBRES DE MATRÍCULA XUNTO COS BOLETÍNS DE NOTAS.

7 SETEMBRO- MATRÍCULA DE 4ºESO e 2ºBAC.

8 SETEMBRO- MATRÍCULA DE 2ºESO, 3ºESO E 1ºBAC.

O horario de atención ao público será de 9:30 a 13:30

Adxuntamos o Protocolo da Xunta para o curso 20-21.

Aínda que non aparece explicitamente, a día de hoxe a ratio por aula (número de alumnos por aula) é de 25 alumnos para ESO e 30 para Bacharelato, sen contar os repetidores. Isto fai imposible, na maior parte dos casos, manter a distancia de 1 metro entre alumnos, co que implica o uso da mascarilla en todo momento.