Hoxe celebramos o Día de Pi (3/14), Día Internacional das Matemáticas, inaugurando A SEMANA das MATEMÁTICAS do IES VAL MIÑOR, que durará ata o vindeiro xoves 21 de marzo.

Cada ano, a Unión Matemática Internacional, quen lidera o proxecto do “Día Internacional das Matemáticas” (idm314.org), propón un tema para fomentar a creatividade ao redor das matemáticas e estimular a participación. O tema para 2024 é: "Xogando coas matemáticas". De acordo co tema seleccionado este ano, durante os dous recreos de cada día e ata o vindeiro xoves, organizaranse na Biblioteca do centro obradoiros e xogos dirixidos polos nosos monitores: estudantes de 1º e 2º de ESO.

Fotos e vídeo CLICA

O concello e a ANPA do IES Val Miñor fixeron posible que o alumnado de 1º e 2º ESO puidese escoitar a César Bona, ponente de gran prestixio internacional, co que compartimos unha experiencia educativa que non nos deixou indiferentes. Para que? Para aguilloar as mentes en busca de pensamento crítico, curiosidade, motivación, entre outros moitos obxectivos. O seu paso polo centro deixou pegada no alumnado, que esperamos removese  software do seu cerebro, para avanzar e saír da zona de confort.

Neste enlace  CLICA , poderás ver fotos deste intercambio entre os centros IES Val Miñor e Sant Brieuc, ubicado na Bretaña francesa.O xoves 14 de marzo, despediuse coas súas caras iluminadas con sorrisos, pensando seguramente na aventura que supón a súa viaxe de estudos á Bretaña francesa, o alumnado de 4ºESO e 1ºBach. Compartirán experiencias que de seguro farán que volvan cunha nova mochila de crecemento persoal e un mellor nivel de francés.

O día 23 de febreiro, Rosalía de Castro en persoa visitounos no centro reencarnada na profesora Nerea Martínez, e estivo charlando coa rapazada de 1º e 2º de ESO sobre a súa vida e obra. Ademais, decoramos o instituto con poemas e fragmentos da autora decorados polo alumnado de todos os cursos da ESO. Podedes ver as fotos aquí:

Nos tempos que corren, non está de máis lembrar o importante que segue a ser loitarmos pola paz a diario. Por iso, aproveitamos a celebración do Día da Paz para encher o instituto con carteis a prol dela elaborados por alumnado de todos os cursos da ESO.

Día de Rosalía

O día de Rosalía compartimos festa no auditorio do Concello o alumnado do Escolas Proval xunto coa nosa rapazada de 3ºESO.

O profesorado en continua formación permanente. Un grupo de profesores/as investigan as posibilidades educativas da realidade virtual.

En Nigrán tamén se fala galego!

60 Alumnos de 4o da ESO do Ies Val Miñor participan na campaña de promoción de promoción da lingua galega entre o comercio local.

O proxecto Aquí Tamén Se Fala xurdiu o curso pasado no Ies Rafael Dieste da Coruña e procura rachar cos prexuízos que invisibilizan a lingua galega. A rapazada exerce de dinamizadora da lingua visitando todo tipo de establecementos que traballan de cara ao público e queiran colaborar, para o cal deben colocar un cartel deseñado co lema “Aquí Tamén Se fala Galego” e facerse unha foto que se promociona nas redes sociais da campaña e na web do centro.

Estamos a organizar a Semana das Matemáticas no IES Val Miñor: Tangrams, pentaminós, cubos soma, torres de Hanoi, tres en raia áureo, pontes de Königsberg e outros labirintos, xogo do prisioneiro etc.

Xa queda pouco para xogar con eles nos recreos do 14 ao 21 de marzo.

Confiamos en que vos divirtades xogando e pensando.

O pasado 2 de febreiro celebrouse o Día Mundial dos Humedais, unha data na que se lembra a importancia destes ecosistemas non só polo que contribúen ó mantemento da biodiversidade senon pola cantidade de servizos ecosistémicos que ofrece. Por este motivo, o Dpto. de Bioloxía e Xeoloxía organizou unha xornada de observación de aves para o alumnado de 1 ESO na Foz do Río Miñor, un espazo que forma parte da Rede Natura 2000.

Durante a mañá do 21 de febreiro o alumnado puido observar a biodiversidade da avifauna deste espazo natural e ó mesmo tempo coñecer algúns aspectos que resaltan a importancia deste esteiro e daqueles outros que comprometen a súa conservación e protección.