A obra de teatro “Non bulas o bulo” foi tan inspiradora que decidimos montar o noso propio obradoiro de cartelería. Libremente, o alumnado escolleu un asunto dos tratados na sesión de teatro con As Centolas, e a partir de aí, elaborou un cartel que recolle o seu punto de vista propio.
O resultado son traballos moi vistosos! A reflexión e a creatividade sempre fixeron un bo par. Bravo por esta rapazada!
Para ver o desenvolvemento do obradoiro, preme AQUÍ
Preguntarédesvos que é un centón… pois para nós un pretexto para achegar a poesía á rapazada creando poemas propios a partir de versos prestados. Silvia Plath, Daphné B., Las Sinsombrero ou Carlos Negro, son algunhas das voces que inspiran os catro centóns resultantes en cada unha das linguas de estudo no noso instituto. Os textos de partida non foron escollidos ao chou, senón que gardan unha conexión temática: o universo feminino e a loita por facer visibles as desigualdades que o rodean.
Iniciamos abril cunha visita excepcional: os colectivos ORMUSA e CONCAVIS TRANS chegan da outra beira do Atlántico, para presentarnos como é a loita polos dereitos civís da muller e do colectivo LGTBI en América Latina, concretamente en El Salvador. Estamos convencidas de que a proximidade e o relato en primeira persoa sempre chega mellor e move conciencias.
A finais do mes de marzo, o persoal da Biblioteca Escolar do IESP Pedra da Aguia asistiu ás Xornadas de Encontro das BE de Galicia. Sempre atopamos inspiración no labor de tanto profesorado que traballa na dinamización das biblios dos centros de ensino. Como sorpresa nesta edición, a ponencia de Alicia Sellés titulada “Bibliotecas e Axenda 2030, tamén na escola” tratou sobre o rol clave que estas xogan para o acceso á información e, por tanto, para o desenvolvemento das comunidades no contexto dos ODS 2030 da ONU.
