O alumnado de 3º ESO decidiu emular a Florencio e velaquí tedes as composicións gañadoras cos seus respectivos autor e autoras. Como non podía ser doutro xeito, levaron de agasallo e como compensación candanseu suadoiro.
José Tercero Vidal gañou o suadoiro "Malo Será" co seu texto, "Entre lusco e fusco".
Entre o lusco e o fusco
Déitase o fermoso sol,
Déixanme estas fermosas cores,
Neste maravilloso solpor,
Cores de lume,
Cores con perfume,
Cores como o ámbar
Que calman a alma
José Tercero Vidal
Laura Méndez gañou o suadoiro "As sete herbas" co poema, "Longo discorrer de frías augas":
Longo discorrer de frías augas
Viches pasar ao longo dos séculos,
Día tras día durante vidas,
Viches a primavera cos seus pétalos.
O verde bosque que che rodea
Escóndeche como un gran tesouro,
Semellas un doce manto de tea,
E o Sol alúmbrache como se foses ouro.
Laura Méndez Martínez
E por último, Ana Campaña obtivo o suadoiro "Quérote preto" co seu fermoso texto, "O home da Graña:
O HOME DA GRAÑA
Eu vivo na vila dos ventos
Chea dalgún que outro mito
Atendede, ben atentos
Que eu non volo repito
Trata dunha pedra viva
Que vos invito a coñecer
Semella que ten moita vida
E cos anos non a vai perder
Presumía dun gran sorriso
Que axiña tornou en enfado
Non quero nin lembrar iso
Trouxéronlle a fábrica para o lado
Os que fan tremer a terra
Penades que son os camións
É o pranto da dura pedra
Expresando as emocións
Ana Campaña Paz