Na materia de Cultura Clásica traballamos arreo para fomentar a creatividade do noso alumnado, polo que desta volta apostamos por unha actividade orixinal e divertida: o lapbook dos gladiadores. Descubrimos contidos fascinantes sobre estes combatentes e desbotamos falsos mitos do imaxinario colectivo que durante moito tempo se escargou Hollywood de alimentar e espallar.
Que é un lapbook? Poderiamos definilo como un caderno despregable interactivo ou un libro de pop-ups manipulativo. É unha ferramenta 100% visual con infinidade de deseños e posibilidades de acordo á creatividade e imaxinación d@ creador/a, permitindo, do mesmo xeito, crear situacións de aprendizaxe activa. É ademais unha opción fantástica para aquel alumnado con problemas para memorizar ou de atención.
Entre as múltiples vantaxes educativas que atopamos cando traballamos cun lapbook, podemos citar as seguintes:
1. Fomenta o desenvolvemento da imaxinación e da creatividade.
2. Pódense traballar unha cantidade ilimitada de temas e materias.
3. O alumnado convértese no centro da aparendizaxe.
4. Motiva e favorece as aprendizaxes; o alumnado divírtese mentres realiza algo diferente.
5. Fomenta as aprendizaxes significativas e a autoaprendizaxe.
6. Permite expresar a información de xeito interactivo.
7. É un recurso adaptable a todas as idades e cursos.
8. Desenvolve a organización previa mental e a psicomotricidade.
9. Alto grao de satisfacción. Xera autoestima.
10. Contribúe ás competencias de autonomía, iniciativa persoal e aprender a aprender.
Con todas as vantaxes que nos achega esta ferramenta, non dubidamos en dala a coñecer a toda a comunidade educativa, de aí a idea de facer unha exposición co resultado do noso traballo. Observade as fotos.
