Blog de Biblioteca

DÍAS DE SAMAÍN

No CEIP Vicente Otero Valcárcel celebramos o Samaín con merendas terroríficas, concursos de debuxos e contos arrepiantes en galego, lecturas sobre esta celebración e visionado de vídeos, música de "Uxía Lambona e a Banda Molona" e decoracións. Aquí vos deixamos algunhas imaxes. 

Merendas terroríficas en EI from CEIP VICENTE OTERO on Vimeo.

O noso cole en Samaín from CEIP VICENTE OTERO on Vimeo.

DÍA DAS BIBLIOTECAS

Etiquetas :

O día 24 de Outubro conmemórase o Día das Bibliotecas, dende o noso centro celebrámolo entregando premios aos dez nenos e nenas que máis libros levaron durante o curso pasado e presentando a mascota ao alumnado de Educación Infantil. O espazo está en obras pero seguimos traballando polo fomento da lectura. 

SEMANA AMI

Etiquetas :

A alfabetización mediática e informacional (AMI) inclúe un conxunto de competencias para buscar, avaliar criticamente, usar e contribuír de xeito intelixente con información e contido nos medios; coñecementos sobre os dereitos en liña; entender como combater o odio en liña e o acoso cibernético; comprensión dos problemas éticos que rodean o acceso e o uso da información; e compromiso cos medios e as TIC para promover a igualdade, a libre expresión, o diálogo intercultural / interrelixioso, a paz etc. A semana do 24 ao 31 de Outubro está considerada pola UNESCO como a semana AMI. Dende o Equipo de Boblioeca queremos facer a nosa humilde achega cuns pequenos trucos para buscar na rede.

PROGRAMA "ANACOS DE VIDA", TVG.

Probablemente estes días vístedes un autobús azul bastante chamativo pola vila era o do programa da TVG "Anacos de Vida" que se emitirá despois do verán e que conta as historias que se agochan nas fotos antigas. O programa contou coa participación do alumnado voluntario de 1º A e B do CEIP Vicente Otero Valcárcel, algunhas esceas graváronse dentro do centro para o que contamos coa colaboración de alumnado de 3º e 2º de EP que actuaron como extras. Aquí vos deixamos unhas imaxes. 

PINGÜIXORNAL

Etiquetas :

Este é o xornal elaborado polos nenos e nenas de 1º, 5º e 6º de EP nos grupos internivel dos venres. 

ENCONTROS INTERXENERACIONAIS

Etiquetas :

Hoxe foi un día especial, no cole fixemos uns encontros interxenaracionais unindo o presente, o pasado e o futuro de Carral. A partir de varias fotos antigas onde se mostraba a construción da carretera de Paleo, as escolas de nenos e nenas, as mulleres nos lavadoiros, o equipo de fútbol... (aportadas pola Concellaría de Cultura) o alumnado de 1º, 2º e 4º de EP puido desfrutar dunha entretida conversa cos membros da Coral "Aires de Carral" que ademais de contarnos un montón de cousas de como era a vila antes nos deleitaron con varias cantigas. Moitas grazas por todo! Con esta actividade damos por rematado o Proxecto Documental Integrado do centro deste ano: "Descubrindo Carral, temos moito que contar" e hoxe tamén que cantar!. Grazas a todos e todas as que colaborástedes dalgún modo para que todo esto fora posible. 

 Equipo de biblioteca. 

Para ver o resumo do proxecto podedes picar AQUÍ, este é o enlace á páxina web onde están recopiladas todas as actividades que se fixeron. Está en contrución, en breve poderedes vela completa.  

 

BO VERÁN A TODOS E TODAS!

 

ENCONTRO CON AUTORAS: SABELA FERNÁNDEZ TRELLES.

Etiquetas :

A autora Sabela Fernández Trelles visitou aos nenos e nenas de 2º  de EP e fixo con eles un obradoiro relacionado co libro que leron "O Ladrón de Soños" da Editorial Xerais. Aquí unhas imaxes da súa visita. 

 

VISITAS DE AUTORAS: MARÍA LADO.

Etiquetas :

A poeta María Lado visitou o noso centro e realizou co alumnado de 2º un obradoiro de poesía dadaísta. Os nenos e nenas díronlle unha nova vida aos versos da súa obra "5 MINUTOS" ilustrado por Nove-Noel e de Auga Editora. Ademais firmounos un montón de libros e deixou a súa pegada no de visitas da biblio. Grazas por todo, María!

 

DESPEDIDA MADRIÑAS E PADRIÑOS LECTORES

Despedimos aos nosos padriños e madriñas lectoras de 6º de EP con agasallos e biscoito. Moitas grazas por lernos!

DESCUBRINDO CARRAL EN EI

Etiquetas :

Estes son os produtos finais dos máis pequenos para o PDI do centro. Os de 3 anos recopilaron refráns, os de 4 localizaron lugares emblemáticos e as súas casas no mapa de Carral e os máis maiores fixeron o seu propio recetario. Grazas familias pola vosa colaboración! Podedes ver os seus traballos nos seguintes documentos e no vídeo resumo que se proxectou o día da Feira Cultural e que se mostra a continuación.

 

 

 
 

ESTEFANÍA PADULLÉS. ENCONTROS CON AUTORAS.

Etiquetas :

Dentro do PDI do centro: "Descubrindo Carral: temos moito que contar" o alumnado de 3ºB recibiu a visita da autora e ilustradora Estefanía Padullés. A idea xurdiu alá polo mes de febreiro cando a mascota da biblio, Pingüi, lles mandou unha carta para que lle axudaran a investigar sobre como vivían en Carral fai millóns de anos. Foi nese momento cando leron o libro "Max e Lea" de Hércules Edicións, unha bonita historia sobre como afrontar os medos e protagonizada por un Tyrannosauros Rex. 

Xuntos debuxaron un mural na aula no que tentaron expresar unha liña do tempo dende a preshistoria máis antiga pasando pola época dos castrexos en Carral intentando imaxinar como sería o noso "Castro das Travesas" por aqueles tempos. Estefanía tamén lles contou un montón de cousas sobre a súa vida e os nenos e nenas quérenlle facer unha biografía como agasallo pola súa visita. De momento aquí vos deixamos unhas imaxes do proceso de creación do seu mural de aula baseado nos castrexos de Carral e as súas casas de pallabarro.

Distribuir contenido


Feito con Drupal 6

 


Proxecto Webs dinámicas

Xunta de Galicia - Consellería de Educación, 2013
- Designed by EZwpthemes Drupalized by Azri Design