6º Curso

Un proxecto con moita arte

Lun, 27/10/2014 - 22:14 — salial

Comezamos este curso poñendo en marcha un novo proxecto: ESCOLA DE PINTORES.

A primeira actividade do proxecto foi pintar o noso autoretrato. Tratábase de resaltar o rasgo que máis nos caracteriza, que nos fai únic@s: a forma da cara, os ollos, a boca, as expresións...

Así nos viamos nós o primeiro día de clase:

DISECCIÓN DUN OLLO DE VACA

As capas do ollo, como ides ver, son moi fáciles de observar nunha disección rápida e simple.

OBXECTIVOS:

- Practicar as técnicas de disección

- Analizar a anatomía do ollo e identificar as súas partes.

MATERIAL NECESARIO:

- Ollo de vaca

- Tesoiras de punta fina

O DESENVOLVEMENTO podédelo seguir nesta presentación que fixo a profe María Gamallo

DISECCIÓN OLLO DE VACA on PhotoPeach

Exposición de Cogomelos

Ven, 08/11/2013 - 23:13 — salial

Teño que recoñecer que a micoloxía non é o meu, así que para achegarlle aos rapaces información veraz e segura, sempre recurro a Sara, a axudante de cociña do cole que é unha boa coñecedora do tema.

Nunha primeira fase, Sara formou aos guías, é dicir, transmitiulle información e curiosidades sobre os cogomelos aos rapaces que serían os encargados de mostrarlle a exposición ao resto de compañeiros do centro.

Todos os anos por estas datas, Sara énchese de paciencia e transmítenos un montón de coñecementos sobre os cogomelos, cales son apreciados, os que non, os que son tóxicos e incluso mortais. Rematou esta primeira semana de Santos, con esta preciosa exposición que nos trouxo de setas con cadanseu nome, nivel de perigosidade, cogomelos comestibles e cunha mostra da vexetación onde é máis probable atopalas.


Cada cogomelo con cadanseu nome e hábitat: En carballeiras, piñeirais, nos lameiros, ou debaixo dos érbedos...	Adrián e Cristian coñecen o nome de case todas as amanitas, é sorprendente!

Todo o cole pasou a ver a exposición que sempre tiña supervisión dalgún mestre, xa que había varias amanitas tóxicas e/ou perigosas. PROHIBIDO TOCAR!!!!	Os rapaces de 5º e 6º fan de guías durante a visita dos alumn@s de infantil de 4 e 5 anos.

Alex Gómez, xa todo un experto no reino dos fungos, foi o encargado de mostrarlles a exposición aos alumn@s de 2º EP.

Engadiu información científica:

Falou dos reino dos fungos.
Alimentación e reprodución.
Partes do cogomelo.
Normas básicas de comportamento no monte.
Dos perigos dalgunhas especies.
E por último respostou varias preguntas dos compañeir@s.

Trala exposición os alumn@s recolleron toda a información aportada coa que editamos este caderno.

COÑECENDO OS COGOMELOS DO CONCELLO DE TOÉN

Receita Arrepiante de Samaín

Xov, 31/10/2013 - 20:39 — salial

Que se celebra? O SAMAÍN, palabra de orixe gaélica que ven a significar FIN DO VERÁN. Chega o frío, caen as follas, as noites son moi longas... Pero aínda está por vir a noite máis arrepiante do ano, a noite do 31 de outubro ao 1 de novembro. Chega o mes de Santos e as ánimas dos defuntos saen e vagan polos camiños e por iso non está de máis tallar unha caveira de colondro ou cabaza e colocala no valo da túa casa, nas encrucilladas e... por que non?, no cemiterio. Este ritual manterá alonxadas ás ánimas... uhhhhhhh!

Para poder sobrelevar tanta troula preparamos este ponche morno de cabaza, unha bebida reconstituínte e arrepiante, perfecta para vivir sen sobresaltos estas datas.

Paso 1: Necesitarás os seguintes ingredientes

2 colondros medianos baleiros
3 l de zume de mazá
2 l de zume de piña
4 culleradiñas de zume de limón
2 paus de canela
3 mazás
2 culleradiñas de cravos enteiros.

Paso 2: Baleira as cabazas.

Paso 3: Fai boliñas de mazá. Forma pequenas bolas de mazá usando o mesmo utensilio que para facer as boliñas de melón

Coloca as boliñas de mazá nunha cunca

Dálles mais sabor ás mazás cravando en cada boliña un cravo no centro.

Paso 4: Mestura

Engade o zume de mazá, o zume de piña, o zume de limón, as bolas de mazá, e os pauciños de canela. Remove e quenta durante uns poucos minutos a lume medio (non ten que ferver). Retira a pota do lume e deixa arrefriar.