Presentación | Horarios | Oferta educativa | Secretaría | Contacto
6º Educación primaria
O alumnado de sexto salva a nave dos soños en ITI Robótica!
Esta semana, en ITI Robótica realizamos unha actividade titulada A nave dos Soños que resultou un éxito entre o alumnado.
Conteilles que recibín un email moi estraño de Diodi, unha personaxe de Digicraft, no que me dicía que estabamos no ano 2060 e a humanidade se mudaba de planeta nunha nave espacial e tamén moi especial, con capacidade para albergar unha gran cantidade de pasaxeiros e pasaxeiras que viaxarían durmidas ata o seu destino en Próxima Centauri, a estrela máis cercana cun planeta capaz de albergar vida. A nave está equipada cos máis avanzados sistemas informáticos, pero un virus estaba facendo das súas e os sistemas da nave non funcionaban correctamente, por iso precisaba da axuda dos rapaces e rapazas de sexto para eliminar o virus e salvar á humanidade!
Os nenos e nenas tiveron que resolver diversas probas, conseguir códigos e descifrar mensaxes en clave, para ir arranxando as distintas estancias da nave, seguindo todo o fío condutor da narración que eu lles ía facendo segundo avanzaban na aventura. Foi moi emocionante ver como ían resolvendo os enigmas e finalmente, conseguían borrar o virus e restablecer os controis da nave para que esta puidera emprender a súa viaxe. Bo traballo!
O alumnado de sexto crea o seu avatar en ITI Robótica
Os rapaces e rapazas de sexto crearon os seus avatares na materia de ITI Robótica. Gustoulles moito realizar esta actividade e ademais, mirade que fotos de clase tan chulas nos quedaron. Adiviñades quen é quen?
FOTO DE CLASE DE 6º A
FOTO DE CLASE DE 6º B
O alumnado de sexto crea a personaxe dun videoxogo en ITI Robótica
O alumnado de sexto creou a súa propia personaxe para xogar a un videoxogo na materia de ITI Robótica. Despois de deseñar as personaxes, trasladáronas ao videoxogo e puideron botar unhas partidas coas súas propias creacións. Mirade que ben o pasaron:
CRÓNICAS DE CENTIEIRAS
Onte, xoves 26 de maio, o alumnado de sexto de primaria e de sexto de infantil foi a Radio Fene gravar un novo programa de Crónicas de Centieiras.
Foi unha experiencia moi interesante e unha gran sorte poder realizar a tarefa de auténticas locutoras e locutores de radio.
Ademais, fixérono de marabilla! Teñen potencial como profesonais das ondas radiofónicas.
Mirade que ben acompañadas e acompañados estivemos nesta saída. O alumnado de sexto de infantil tamén veu gravar o programa de radio con nós.
Permanecede atentas e atentos á próxima emisión de Crónicas de Centieiras, merecerá a pena!
8M Día da muller 2022
O martes 8 de marzo conmemoramos na escola o Día da muller.
Para celebrar este día, cada aula investigou previamente sobre unha científica e decorou un paraugas con datos sobre a súa biografía e os seus achados para a ciencia. Con todos os paraugas creouse unha exposición na planta baixa da escola. Quedaron todos chulísimos!
A clase de 6º dedicamos o noso paraugas a Ángeles Alvariño, unha importante oceanógrafa natural de Ferrol que descubriu nada máis e nada menos que 22 novas especies de organismos mariños!
Como broche final, despois do recreo, todo o alumnado reuniuse na pista cuberta para bailar a canción Morra o Conto da Banda da Loba.
Encontro con Andrea Maceiras
O venres 4 de marzo tivemos a gran sorte de coñecer a Andrea Maceiras, autora do libro A Folla Azul, galardoado co premio Merlín de literatura infantil 2020.
Contounos moitas cousas interesantes sobre a Amazonia e a tribo dos Kayapó, nos que se inspirou para crear a tribo dos Tacaré, á que pertence Husu Aké, a protagonista do libro.
Puidemos facerlle moitas preguntas sobre as personaxes, os animais e as situacións que aparecen no libro e foi un auténtico pracer poder falar con ela. Moitas grazas, Andrea!
DIGICRAFT 6º
Digicraft 6º
Digicraft é un programa educativo que ten como obxetivo formar ao alumnado entre 6 e 12 anos nas Competencias Dixitais que lles permitirán desenvolver o seu máximo potencial. O programa desenvólvese a través da metodoloxía Digicraft. A metodoloxía Digicraft é unha proposta didáctica innovadora para desenvolver a Competencia Dixital a través do xogo e a experimentación
Aquí vos deixo unhas imaxes dalgunhas das actividades que xa levamos a cabo na nosa aula
PASAMOS DE CENTIEIRAS Á ESO
O alumnado de 6º está desfrutando do seu último trimestre no cole. O pasado venres 23 de abril tivemos unha xuntanza virtual organizada pola nosa orientadora Lorena e o orientador Benigno do CPI A Xunqueira.
Na videochamada Benigno explicoulles aos nenos e nenas como será a nova etapa educativa que comezan para o próximo curso.
A charla foi moi amena e participativa e Benigno resolveu todas as inquedanzas e preguntas dos noso alumnado. Temos que agradecer a Lorena e Benigno esta iniciativa para coñecer de antemán a nova etapa educativaque lles agarda.
EMOTICENTI: Ioga con Antía
Como sabedes este curso o noso proxecto EMOTICENTI trata sobre o benestar físico e emocional. O alumnado de 6º andaron a investigar sobre os beneficios e as vantaxes de practicar ioga, Antía, nai dunha das nosas alumnas e mestra de ioga, preparounos unha sesión especial na que nos resolveu unhas cantas dúbidas. A xornada foi un éxito, unha boa experiencia para todos e todas. Deixámosvos unhas fotos dos grupos e un anaquiño do comezo da sesión no enlace.
- « primeira
- ‹ anterior
- 1
- 2
- 3
- 4
- 5
- 6
- 7
- 8
- 9
- …
- seguinte ›
- última »
