A experimentación, a creatividade e o traballo en equipo rachou moitos tópicos que existen sobre a arte contemporánea grazas ao obradoiro que se desenvolveu o pasado mércores na Biblioteca.
O alumnado anticipou a visita ao Centro de Arte Georges Pompidou que terá lugar a finais de marzo e coñeceu, aprendeu e gozou coas propostas dos Jeff Koons, Duchamp, Joseph Beauys, Louise Bourgeois, Matisse, Delaunay, Yves Klein, a escola da Bauhaus..., e coas súas propias creacións, xa que por un día exprimentaron con materiais, formas, cores... como ben se pode ver na crónica da sesión e nas súas caras de curiosidade, paixón e felicidade.
Esta semana deu os seus primeiros pasos o Proxecto París, unha iniciativa na que colaboran diversas materias para dotar de contido didáctico a viaxe de fin de etapa de 4 ESO. E fíxoo cun Obradoiro de procura e tratamento de información guiado pola profesora de Lingua Castelá. Neste proxecto voluntario participan 23 alumnos e alumnas que realizarán, entre outros produtos, a Guía de viaxe da cidade visitada.
No blogue da Biblioteca tamén se dá conta das últimas sesións dos Clubes de Lectura. Así, no clube de Igualdade púxose en común a lectura da novela Cabeza de Medusa, de Marilar Aleixandre, mentres que no clube Historias de historia se partillou o cómic de Jaime Martín, Jamás tendré 20 años,
Esta mañá o alumnado de 1º de Bacharelato deu continuidade aos seus traballos sobre a figura de María Vinyals cunha visita ao Castelo de Soutomaior no marco do Proxecto Interdisciplinar de Centro Miña casiña, meu lar, que procura darlle a coñecer ao alumnado o patrimonio do municipio, establecendo vínculos cos bens patrimoniais e promovendo procesos para a súa protección.
Tras se achegaren nas aulas á vida desta precursora do feminismo coa lectura de María Vinyals, un talento rebelde, de Isabel Castro, e de comezar a traballar no xogo teatralizado que desenvolverán en maio, hoxe tocaba coñecer o castelo. Así, repartidos en dous grupos, os alumnos e as alumnas coñeceron, conducidos por Anxo, que realizou para nós unha completa e moi didáctica visita guiada, as épocas máis importantes da fortificación, os elementos arquitéctonicos representativos de cada momento, os usos do castelo e as figuras sobranceiras que o habitaron e lle dan relevancia histórica, como Pedro Madruga e María Vinyals, á que se lle dedica unha sala e que é obxecto nestes momentos dunha exposición sobre a súa traxectoria que reflicte o seu carácter pioneiro no campo da igualdade e da xustiza social.
Aproveitamos a ocasión para agradecer a atención prestada polo persoal do Castelo de Soutomaior así como as facilidades que nos están a dar para xestionar o desenvolvemento do noso proxecto neste espazo.
Ademais de aprender algo máis do noso contorno e destas figuras históricas grazas á visita guiada e á interesante e atractiva musealización do castelo, o alumnado tamén visitou os seus magníficos xardíns, onde coñeceron os espazos e visualizaron os espazos en que vai ter lugar o xogo teatralizado que representarán para os seus compañeiros e compañeiras do instituto.
Durante este curso académico 2019-2020, o IES de Soutomaior desenvolverá o proxecto sobre valoración do patrimonio natural, artístico, cultural e inmaterial da contorna que leva por título Miña casiña, meu lar. O proxecto vén de ser incluído no programa Plan Proxecta da Consellería de Educación e conta coa colaboración do Concello a través da área de Xuventude e a OMIX e doutras asociacións, colectivos e persoas a título individual que se irán sumando ao longo dos vindeiros meses.
A idea do proxecto é dar a coñecer ao alumnado o patrimonio de Soutomaior, establecendo vínculos cos bens patrimoniais e promovendo procesos para a súa protección. Se ben os eixos do proxecto Miña casiña, meu lar son o Camiño de Santiago portugués ao seu paso polo concello e o Castelo de Soutomaior como símbolo da vila, o alumnado traballará tamén outros puntos de interese turístico e, sobre todo, a valoración, coidado e respecto polo entorno.
Así, os obxectivos xerais do proxecto son:
Levar a cabo un proxecto a nivel de centro cun enfoque colaborativo e práctico.
Favorecer actitudes de respecto e valoración do patrimonio natural, cultural, artístico e inmaterial a través do seu coñecemento.
Concienciar ao alumnado do valor do patrimonio lingüístico, histórico, artístico e cultural do Camiño de Santiago.
Difundir o valor do patrimonio cultural existente na contorna do centro.
Potenciar o traballo en equipo e fomentar o uso da lingua galega.
Estará implicado no proxecto todo o alumnado e profesorado do centro e se traballará por niveis a partir de eixos temáticos concretos:
1º ESO: Contorna inmediata. O espazo do centro e o seu coidado.
2º ESO: Patrimonio natural do Concello de Soutomaior.
3º ESO: Patrimonio inmaterial do Concello de Soutomaior.
4º ESO: O Camiño de Santiago.
1º Bacharelato: O Castelo de Soutomaior e María Vinyals, pioneira do feminismo.
Miña casiña, meu lar xa deu comezo en 1º da ESO e 1º de Bacharelato e podedes seguir todas as novidades a través do blog do proxecto.
Este martes 14 tivo lugar a reunión informativa do Proxecto París, unha proposta que, seguindo a metodoloxía de traballo por proxectos que xa iniciamos nos cursos pasados con motivo da excursión de 4º ESO (París 2018: Guía de viaxe e vídeo; e Roma 2019), procura dotar de contido didáctico á saída de fin de etapa traballando dentro e fóra das aulas sobre os monumentos, a historia, a arte, a literatura e o cine como forma de achegamento á realidade.
O Proxecto París 2020 arranca coa implicación de 23 alumnos e alumnas que participarán nestas actividades que se realizarán no calendario que, en horario de tarde e fóra da xornada lectiva, se describe neste tríptico.
O equipo de docentes está coordinado por Cristina Méndez (Lingua Castelá) e está formado por Beatriz González e María Sánchez (Xeografía e Historia), Marta Mosquera (Linguas Clásicas), Román Cerqueiro (Lingua Galega) e Sandra Silva, coordinadora do Equipo de Normalización Lingüística.
Lembrámoslle a todo o alumnado participante que deberá entregar asinada a autorización de asistencia ás xornadas fóra do horario lectivo.
Mércores 5 de febreiro, de 15:00 a 17:00.
Mércores 12 de febreiro, de 15:00 a 17:00.
Mércores 19 de febreiro, de 15:00 a 17:00.
Martes 3 de marzo, 15:00 a 16:15.
Mércores 4 de marzo, de 15:00 a 17:00.
Martes 10 de marzo, de 15:00 a 16:15.
París agarda por nós entre o 27 de marzo e o 1 de abril, mais o alumnado do proxecto comeza dende xa a súa viaxe. Imos aló!
A Dirección Xeral de Educación, Formación Profesional e Innovación Educativa publicou hoxe aresolución provisional pola que se fai pública a relación de centros seleccionados para desenvolver plans orientados á mellora do éxito escolar no curso 2019/20. O noso centro aposta polas seguintes liñas de actuación:
REFÓRZA-T: ten como obxectivo mellorar o rendemento académico do alumnado con dificultades, por medio do traballo ou apoio organizado fóra do horario lectivo, para a adquisición das destrezas básicas que lle faciliten a incorporación plena ao ritmo de traballo ordinario e ás esixencias das diferentes áreas e materias. Reforzaranse as destrezas matemática, en ciencia e tecnoloxía e en comunicación lingüística.
IGUÁLA-T: desenvolveranse accións que interveñan no fomento da coeducación, promoción da igualdade de oportunidades entre mulleres e homes, prevención e tratamento da violencia de xénero, promoción do respecto pola diversidade afectivo-sexual, prevención e tratamento da LGBTIfobia e outras medidas semellantes.
Mellora do nivel de coñecementos para acadar a excelencia: que trata de dar resposta ao alumnado con maior motivación para aprender, á vez que supón unha medida de atención á diversidade na que se desenvolverán iniciativas de afondamento nos coñecementos do alumnado, co fin de incrementar a excelencia.
En rexeitamento de toda forma de violencia contra as mulleres. Por todas elas e por todas nós! O alumnado que forma parte do Comando Igualdade estreou hoxe durante o recreo o resultado do seu traballo ante o resto das compañeiras e compañeiros do centro. Ademais, o alumnado de Educación Plástica de 1º da ESO e de Debuxo Artístico de 1º de Bacharelato realizaron unha performance coa que escenificaron o control que exerce o patriarcado sobre as mulleres, mais que -xuntas- se poden liberar das cordas da dominación e a violencia.
O noso centro foi seleccionado en dous programas do Plan Proxecta para o Curso 2019-2020 segundo a resolución definitiva publicada pola Consellería de Educación, Universidade e Formación Profesional. Este Plan está orientado a fomentar a innovación educativa nos centros a través de programas educativos que desenvolvan as competencias clave como eixe do currículo e os elementos transversais, nos cales se inclúe a educación en valores.
En concreto, os programas aprobados son Educación Patrimonial e Escola Verde. No primeiro deles, baixo a Modalidade "Mirando polo Camiño", o alumnado (dende 1º da ESO a 1º de Bacharelato) pescudará sobre o patrimonio e os bens comúns do Camiño portugués desde o punto de vista antropolóxico, histórico, arqueolóxico, arquitectónico, xeográfico e lingüístico. Hai que de salientar que nesta modalidade só se admite un único centro en toda Galicia para cada un dos Camiños de Santiago e que, ademais, se enmarca dentro do desenvolvemento do Proxecto Interdisciplinar de Centro "Miña Casiña, meu lar".
No segundo dos programas, Escola Verde, foron seleccionados 10 centros escolares de todo o país, e pretende mellorar o comportamento ambiental do alumnado e o profesorado de todo o centro. Está coordinado polo Departamento de Bioloxía.
Onte foi día de festa grande en Pontevedra para o IES de Soutomaior. O proxecto Falemos de ti e min, desenvolvido durante o curso pasado, subiu ao escenario do Pazo da Cultura de Pontevedra para recoller o Premio Mil Primaveras ao Mellor Proxecto Novo xunto con outras cinco iniciativas que procuran poñer en valor e fomentar a lingua e incrementar o seu uso e prestixio na sociedade galega: o Modelo Burela do IES Perdouro; o Desafío 48 h do IES María Casares de Oleiros; Youtubeir@s dos SNL de 13 concellos, as tres universidades e a Deputación da Coruña; Eu presumo de galego do IES de Melide; e GCiencia, o portal da divulgación da ciencia en galego.
Dende o IES de Soutomaior agradecemos a acollida e o cariño da CTNL, colectivo convocante dos galardóns, e do Concello de Pontevedra, anfitrión do acto, e felicitamos aos outros centros de ensino e proxectos premiados por seren modelos de boas prácticas e referentes para nós no ámbito da normalización lingüística.
Mais, sobre todo, queremos destacar a implicación e o compromiso do alumnado do noso centro no desenvolvemento de Falemos de ti e min: sen eles/elas, verdadeiros artífices e destinatarios/as, o proxecto non sería posible. Moitos parabéns e mil grazas!
DISCURSO DE RECOLLIDA DO PREMIO MIL PRIMAVERAS
Eloi Gestido de la Torre (coordinador do proxecto)
En nome das persoas que formamos parte do Proxecto Falemos de ti e min, agradecemos o premio e felicitamos á Coordinadora de Traballadores e Traballadoras de Normalización da Lingua pola creación dos Mil Primaveras.
Sentimos moito orgullo por compartir este recoñecemento con cinco proxectos de tanta calidade, e que ademais son exemplo claro do bo facer a prol da nosa lingua e cultura.
Este acontecemento permítenos tamén agradecer publicamente o esforzo e apoio de todas as persoas e institucións que fixeron posible o Proxecto Falemos:
• Especialmente, ímonos referir ao profesorado colaborador polo seu traballo e tantas horas e horas de dedicación, • e grazas, sobre todo, ao alumnado do instituto de Soutomaior, único protagonista deste proxecto e a quen vai dirixido realmente o premio.
Recibimos con moita ilusión este recoñecemento polo seu significado. Pero estarán de acordo connosco en que o maior premio será, sen dúbida, que os obxectivos do proxecto callen realmente no alumnado e que esta xeración e as futuras sexan quen de:
• Valorar a nosa lingua e cultura • Acadar a Igualdade efectiva entre homes e mulleres • E, dunha vez por todas, expresar con normalidade a diversidade
Moitas grazas
PRENSA
"Seis proxectos reciben o premio "Mil Primaveras" pola posta en valor da lingua", Faro de Vigo (22-09-2019)
A revista do centro chegou puntual á fin do curso para ser a crónica viva do intenso labor desenvolvido no instituto no seu primeiro ano de vida, ademais de para ser canle da creatividade da comunidade educativa e potenciar o uso e a presenza da lingua galega entre nós.
Neste labor comunal acompañounos durante todo o curso o Blog da revista do IES de Soutomaior, unha plataforma dixital que complementou este proxecto no que colaboraron rapaces e rapazas, o profesorado e moitas máis persoas que fixeron connosco este camiño ilusionante que comezamos aló polo mes de setembro.
Como sinala a Dirección do IES no Editorial da revista este foi o "principio", termo que conxugamos en plural para falarmos dos "principios" do noso proxecto educativo, que se proxectan nas páxinas desta revista.
Agradecemos a colaboración de todas as persoas que fixeron posible estes proxectos e agardamos xa por futuras entregas.