Animación á lectura

A posta en común dun novo cómic e unha xincana detectivesca serviron de broche de ouro para a última sesión do Club de Lectura de 1º da ESO, que tivo lugar o pasado martes 14 de xuño na Biblioteca. A obra escollida foi A proba de auga, da escritora e debuxante viguesa Anémona de Río (Aldara Álvarez García).

Recomendámosvos repasar os títulos, coma a penúltima lectura deste grupo (La memoria del agua) que foron lendo os membros dos diferentes clubs de lectura do instituto, darlle os parabéns a tantos mozos e mozas por contaxiar e gozar a paixón da lectura e agradecer, especialmente á profesora Iria Cortegoso, a dinamización e o fomento da lectura e todo o traballo desenvolvido ao longo de todo o curso.

Que teñades boas e pracenteiras lecturas este verán!

Onte, martes 22 de abril, botou a andar o Clube de Lectura en Galego para Adultos do IES de Soutomaior con motivo da celebración da I Feira do Libro de Soutomaior e na véspera do Día do Libro. 

Máis imaxes do encontro aquí.

Para esta estrea, tivemos a sorte de contar coa presenza de María Rei Vilas, autora da primeira lectura escollida, Flores de ferro, coa que mantivemos unha agradable conversa sobre o proceso da escrita, sobre como se xestou a historia e aínda máis: o trasfondo histórico do golpe de estado franquista e a ditadura que abriron a porta de inferno da violencia e a represión, os silencios e os traumas que arrastramos sobre esa época nas familias e na sociedade, a evolución dun mundo rural en desaparición... e, sobre todo, dos personaxes nunha novela de marcado protagonismo feminino (Camila, Olga, Aurora, Helia, Lola, Matilde, Catarina, Esperanza, Nidia...) que nos arrastran cara á revelación dun segredo que vos convidamos a descubrir.

Horas antes, no acto de inauguración da I Feira do Libro de Soutomaior na Alameda Talo Río, algúns dos membros dos clubes de lectura do IES de Soutomaior improvisaron unha breve performance que incluíu unha solta de libros entre as persoas asistentes. Grazas Lucía, Sofía, Álvaro, Xiana e Clara por colaborar neste evento, no que tamén participaron tres alumnas do Colexio Santiago Apóstol que fixeron unha invitación á lectura a través dun texto de Xulio Verne e deron a coñecer o programa da feira acompañadas pola son excepcional do oboe.

A programación inclúe a presenza de dous profesores do centro, Irene Alonso, que estará presente cos libros A caca Cuca e As cicatrices do caranguexo, e Orlando Beares, con A historia do cómic en Galicia.  

Esta mañá o alumnado de 3º e 4º ESO e de 1º de Bacharelato dos clubes de lectura do instituto mantiveron un encontro con Manuel Lourenzo González, autor de Flor de area, novela que leron nas últimas semanas. 

Os rapaces e rapazas estiveron moi atentos e participativos e interesáronse tanto por diferentes aspectos da obra, como o labor de documentación necesario para plasmar o contexto cultural e social da historia (a cultura árabe, o Irak...) como por cuestións máis xerais da creación literaria. 

O noso convidado foi moi ameno e próximo, aprendemos moito con el e quedamos moi agradecidas e agradecidos pola súa visita.

A última xuntanza do clube de lectura que reúne alumnado de 3º, 4º de ESO e 1º de Bacharelato tivo lugar en dúas xornadas nas que compartimos impresións sobre a obra "Matar un ruiseñor" (1960), de Harper Lee, adaptada a novela gráfica por Fred Fordham en 2018.

Os mozos e mozas do clube de lectura interpretaron diversas escenas clave da obra poñéndose na pel de diferentes personaxes. Tras cada unha das representacións, analizaron cada personaxe e achegaron interesantes reflexións que os levaron a conectar os tempos en que sucede a historia coa actualidade.

A lectura que os reunirá na próxima xuntanza será a novela Flor de area, de Manuel Lourenzo.