O equipo de igualdade "Brigada Violeta" do IES de Chapela presenta o seu novo logotipo, que foi deseñado pola alumna Alejandra Andrés Domínguez, de 3ºESO-A, ao resultar o máis votado entre varias propostas achegadas por alumnado do propio equipo.

O logo reflicte os obxectivos e metas cos que naceu no curso 2020-21 "Brigada Violeta" e que perseguen, entre outras cuestións, fomentar a igualdade no centro, respectar e visibilizar a diversidade afectivo-sexual, así como mudar opinións e comportamentos no centro integrando unha mirada con perspectiva de xénero.

O equipo, conformado por alumnado e profesorado dende 1º da ESO ata ciclos de grao superior, fai encontros periódicos os martes ao mediodía co fin de crear un espazo onde compartir intereses e preocupacións relacionadas co feminismo, realizando entre outras cuestións: visibilizar a contribución das mulleres nas diferentes esferas da sociedade e a integración destes contidos nos currículos e libros de texto, obradoiros formativos, así como a conmemoración de datas reivindicativas e significativas como o 25-N (Día contra a eliminación das violencias machistas), o 8-M (Día internacional da muller), ou o 17 de maio (Día contra a LGBTIfobia).

O vindeiro mércores 3 de maio, O IES de Chapela, coa "Brigada Violeta" como anfitrioa, será o centro acolledor do II Encontro de Comandos de Igualdade da provincia de Pontevedra, coordinado polo equipo de igualdade "Rochas Violetas" do IES 1º de Marzo de Baiona e no que participarán ademais outros cinco centros como son o Comando de Igualdade do IES Ribeira de Louro (O Porriño), o Club Diversidade do IES de Valadares (Vigo), o Equipo Morgana do IES Álvaro Cunqueiro (Vigo), o Comando de Igualdade do IES Alexandre Bóveda (Vigo) e o Comando de Igualdade do IES Barral (Ponteareas).