Antolín Martínez

Un día para estar feliz! A felicidade debe converterse nunha meta para o ser humano, o benestar non será pleno se non somos felices. Hoxe é un bo día para ser feliz.

EDLG

O pasado martes 19 de marzo, o noso centro tivo a oportunidade de facer a proxección da película Julia, do director chairego Jacobo Lagüela,  que tanto recoñecemento do público e da crítica tivo e ten no mundo cinematográfico. A esta proxección acudiu todo o alumnado da ESO que tivo ocasión de desfrutar da emisión dun filme moi enraizado coa cultura popular galega.

O filme relata o día a día no rural galego de Julia, protagonista absoluta desta película. A través dos ollos desta muller, que hoxe ten 89 anos, o director fai unha denuncia do abandono e da extinción do rural, mentres a protagonista loita por poder salvar as súas raíces. Dende o centro agradecemos unha vez máis a colaboración do Concello de Friol nas facilidades para poder visionar esta película de gran valor educativo e etnográfico.

Dep. Ed. Física

Dous adestradores do Club Boxing Cidade de Lugo estiveron presentes no noso centro para desenrolar unha sesión de iniciación ao deporte do boxeo co alumnado de 5º e 6º de educación primaria, así como ao de 4º da ESO.

Nesta sesión, incluída dentro da programación do proxecto deportivo de centro, o alumnado tivo unha breve introdución teórica sobre a historia e a evolución dun deporte que é un dos máis antigos do calendario olímpico e que incluso estivo presente nos primeiros Xogos da Grecia clásica.

Posteriormente, xa no pavillón, tiveron a ocasión de coñecer os movementos básicos deste deporte de contacto, tanto do tren inferior como do superior para ir mecanizando ditos movementos. A actividade foi de grande interese para o noso alumnado e é unha oportunidade máis para coñecer o amplo abano de deportes que configura o programa olímpico.

5º-6º Primaria

O alumnado de 5º e 6º de educación primaria asistiu este luns 18 de marzo a unha charla sobre educación cívico-tributaria, impartida por Susana Casal, delegada territorial de ATRIGA en Lugo. O Programa de Educación Cívico-Tributaria ten por obxecto fomentar a conciencia fiscal entre a cidadanía máis nova e transmitir valores e actitudes favorables á responsabilidade fiscal

Nesta charla tamén se lles amosou un vídeo ao alumnado onde se lles explicaba cunha linguaxe axeitada a súa idade que son os impostos e para que serven, é dicir,  o valor educativo e cívico que vai parello aos valores que se ensinan en calquera centro educativo e que é de vital importancia que coñezan os nosos nenos e nenas.

Ed. Física

O pasado venres 15 de marzo tivo lugar a terceira proba clasificatoria para o Campionato Provincial de Bádminton e, como xa é habitual, contou cunha nutrida representación do noso alumnado da ESO, que fixo un grande papel neste evento, que ademais tivo un carácter de proba final e na premiación dos mellores tivo unha gran presencia dos nosos nenos e nenas, conquerindo un total de cinco pódiums.

Así na categoría infantil masculino, gran dominio dos nosos representantes, xa que a final a disputaron Yerai Fontela e Lucas Roca, que tivo moita emoción e se resolveu a favor do primeiro cunha escasa diferencia dun punto. Martín Díaz ocupaba a terceira posición da mesma categoría.

Pola súa parte, na proba cadete, Marcos Varela disputaba a final e alzábase co subcampionato da zona sur, mentres que Samuel Villar gañaba a final de consolación a Xan Ceide e, polo tanto, acadaba o tercer chanzo do pódium.

Unha vez feito o reconto de todas as zonas da provincia, comunicarásenos o número de deportistas clasificados para o Campionato Provincial, coa esperanza de que sexan os máximos posibles.

Ed. Primaria

No día de hoxe o alumnado de 4°, 5° e 6° de primaria visitaron a sede de SOGAMA en Cerceda, sociedade encargada da xestión e tratamento da meirande parte de residuos xerados no territorio galego. Alí, ademais de recibir unha charla explicativa sobre os diferentes colectores e uso dos mesmos, adentráronse no funcionamento da propia empresa a través dun vídeo inmersivo en 3D, co cal visualizáronse as distintas fases de reciclaxe. Tamén afianzaron o aprendido separando lixo en videoxogos e percorremos as súas instalacións en bus en compaña da nosa guía. Desta forma concienciámonos sobre a importancia das boas prácticas en reducción, separación e depósito de residuos en prol do coidado do medioambiente.

Ed. Primaria

O alumnado de 3º e 4º de educación primaria asistiu ao Auditorio Gustavo Freire de Lugo a representación da obra de teatro Hugo, que se enmarca dentro da programación de Abanca ofertada aos centros educativos.

Gañadora do Premio María Casares ao Mellor espectáculo para o público infantil e familiar no ano 2022, “Hugo” conta a historia dun neno que é diferente. Gústanlle moito os avións e tamén toca o piano. Laia visita a Hugo cada día. A Laia gústalle falar e gústanlle as plantas. Hugo ten TEA.

Esta é, polo tanto, unha peza teatral que aborda o tema do trastorno autista na infancia, chea de sensibilidade e empatía, que fala da diversidade, da convivencia e da beleza de sermos diferentes.

Completouse a visita cunha sesión lúdica no parque da Milagrosa, aproveitando o bo tempo que fixo neste día.

Mestres Gandeiros

O alumnado de 5º e 6º de educación primaria asistiu o pasado mércores 13 de marzo a unha charla sobre especies invasoras a través da asociación Galicia Ambiental, na procura dunha maior concienciación do perigo que supón para a flora autóctona a proliferación das especies invasoras

Trátase do perigro de uso destas especies invasoras en determinados eventos, coñecendo ben a súa facilidade expansiva e como freala. A cada alumno e alumna entregóuselle un exemplar de Os Bolechas con esa temática.

Ed. Infantil

O programa Hora Galega da Televisión de Galicia estivo presente no noso centro educativo con motivo de gravar unha pequena reportaxe para ser emitida o día 13 de marzo na canle autonómica.

O contido referido a dita reportaxe está referido co incremento de natalidade no noso pobo, unha singularidade no mundo rural con respecto a outros concellos de similar situación ao noso e a súa repercusión no eido educativo e, polo tanto, a súa influenza no noso centro educativo.

A reportaxe gravouse integramente na aula de 4º de educación infantil, e ademais da presenza tanto dos alumnos de dito nivel educativo, como da súa mestra Inés Otero, tamén tomaron parte no mesmo a coordinadora de educación infantil, Patricia Prieto e o director, Felipe Barata.

EDLG

O pasado 9 de febreiro, o noso centro celebrou o tradicional Festival do Entroido, no que tomaron parte todo o alumnado do centro. Debido ás inclemencias meteorolóxicas, o festival tivo que celebrarse no Pavillón deportivo, se ben ao final de dito festival mellorou o suficiente para levar a cabo a queima do Meco, que este ano era un carro, obra, como vén sendo habitual, do alumnado de Plástica de 4º de ESO, conducidos polo seu profesor Modesto Fernández.

Nesta edición a temática a tratar estaba relacionada co proxecto interdisciplinar que estamos levando a cabo no centro e que leva por nome Mestres Gandeiros, un proxecto que se atopa dentro do Plan Proxecta.  Aquí vos deixamos o vídeo de todas as actuacións do festival.