Viaxe en tren a Monforte de Lemos

Javier Sanjurjo

O pasado día 14 de xuño, os cursos de 3º e 4º de Primaria fomos de excursión a Monforte de Lemos.  Foi unha excursión moi especial xa que a viaxe de ida foi en tren.

Unha vez en Monforte, visitamos o planetario do IES A Pinguela. Alí explicáronnos  moitas cousas das estrelas, as constelacións, etc. Tamén os/as nenos/as fixeron moitas preguntas.

Pola tarde, despois de xantar e xogar un pouco no parque dos Escolapios, fomos ata o Museo do Ferrocarril. Alí vimos vagóns con moita historia e diferentes tipos de locomotoras, algunha bastante antiga. E por último, unha sorpresa: un pequeno percorrido nun tren en miniatura.

Graduación 6º de Ed. Infantil

Presentamos o vídeo no que se ofrece o resumo do acto de Graduación de 6º de Ed. Infantil, que tivo lugar o 14 de xuño na Biblioteca do Centro. Un acto cheo de emocións, no que tamén se despedía por xubilación a titora dos graduandos, Alcira Iglesias.

Viaxe fin curso de 3º e 4º de ESO

Galería de imaxes da viaxe fin de curso que o alumnado de 3º e 4º de ESO realizou dende o 12 ata o 19 de xuño polo Pirineo leridano, Salou e Barcelona. Estiveron acompañados polos profesores de Educación Física e de Plástica,  Marcos López Corredoira e Modesto Fernández Gómez, respectivamente.

Concurso de creación literaria 2019

Traballos premiados no Concurso de Creación Literaria 2019, organizado no CPI Dr. López Suárez de Friol, conincidindo coas datas das Letras Galegas.

Xornada de portas abertas ás familias do novo alumnado

O 18 de xuño tivo lugar unha xornada de portas abertas ás familias do novo alumnado que se incorporará á Educación Infantil para o vindeiro curso 2019-2020, na que a directora do centro, Asunción López, a xefa de estudos, Margarita Rodríguez, a orientadora, Beatriz Blanco e a titora, Mª Jesús Martínez, lles deron a benvida e lles explicaron o funcionamento básico do colexio, as características elementais do material de aula de cada alumno/a, así como a importancia nesta etapa do normal desenvolvemento no ámbito motor, de lenguaxe, cognitivo, afectivo e social.

Unha vez mostrada a que vai ser a súa aula e outras dependencias do centro, os/as novos/as alumnos/as e as súas familias foron invitados a uns pinchos no comedor escolar.

Visita á Ribeira Sacra

 Teresa Estévez

O día 31 de maio o alumnado de 1º, 2º e 3º de ESO desprazáronse ata o concello de Sober para facer unha das rutas fluviais que ofrece a Deputación de Lugo polo Canón do Sil dende o embarcadoiro de Doade. A paisaxe é indescritible!

Logo do paseo en catamarán xantamos nunha carballeira pretiño do Mosteiro de Cadeiras, un sinxelo exemplar do barroco galego do século  XVIII, e desfrutamos da vista que nos regala o Miradoiro de Cadeiras sobre o río e o seu canón. Incrible!

Para rematar dirixímonos á Reitoral de Gundivós, hoxe transformada nun centro de olería, onde se mantén vivo o ritual da cerámica de Gundivós. Alí, asistimos a creación dunha peza,  que nos regalaron como recordo. Preciosa!

Á volta, fixemos unha paradiña en Monforte. Na Estación de tren despedimos a Zara, que nos acompañou na viaxe.

Prácticas co Club de Piragüismo Cidade de Lugo

Teresa Estévez

O alumnado de 5º e 6º de Primaria e 1º e 2º de ESO realizaron a segunda parte da actividade de piragüismo que nos ofreceu a Federación Galega de Piragüismo a través do Club de Piragüismo Cidade de Lugo.

O 30 de abril, un monitor deste club, desprazouse ao noso centro para contarnos de que vai este deporte. O 14 de xuño, fomos nós os que nos achegamos á Escola de Piragüismo da Deputación Provincial para realizar a fase práctica, na contorna do río Miño, nunha mañá soleada pero fresca.

Distribuir contido