Este servizo de transporte baixo demanda é ás 16:55 (logo das actividades extraescolares) sen coidador/a acompañante e con custo para as familias, que deberedes solicitar con 24 horas de antelación no teléfono 988687800. (O centro non organiza dito transporte).
Nas últimas semanas de clase creamos un taboleiro para o noso robot DOC con imaxes relacionadas co vocabulario do Camiño de Santiago, e fixemos un xogo que leva por título “Adiviña a onde ten que ir o robot” o cal realizamos na biblioteca do colexio e consiste en que cada neno/a tiña que coller unha tarxeta na que está escrita unha pista sobre a onde ten que ir o robot, por exemplo: comeza pola B, pau que usaba o peregrino tradicional para facer o camiño de Santiago, buscamos a imaxe do bordón e vemos que indicacións lle temos que dar ao robot para que chegue alí. Esta actividade tamén nos serviu para avaliar o que foron aprendendo os nenos e nenas ó longo do proxecto, xa que as imaxes eran relacionados con contidos traballados durante todo o proxecto.
Para rematar o proxecto realizamos tres actividades. A primeira consiste na realización das mans da amizade, empregando plastilina para logo intercambialas entre os nenos/as das distintas clases igual que o fan os peregrinos que as intercambian entre si, polo que cada clase as fixo de distinta cor e logo as intercambiaron. A segunda actividade foi a entrega da COMPOSTELA a cada neno/a, na cal escribiron o seu nome (e apelidos, segundo a idade), cuñamos a credencial e a Compostela co selo do centro e por último experimentamos a través dun vídeo-xogo no ordenador a facer o camiño de Santiago con Tina Calixtinta o cal trata moitos aspectos xa traballados durante o curso, xa que temos que facer con Tina Calixtina a mochila, poñemos por orde os bastóns para comezar o camiño, seguimos as frechas amarelas, falamos dos cruceiros e a súa función, facemos distintos tramos do camiño e selamos a credencial no albergue entre outras.
Tamén cabe sinalar que durante todo o proxecto aprendemos sobre o camiño xogando con distintos xogos manipulativos a través dos cales contribuímos ó desenvolvemento da competencia matemática, competencia en comunicación lingüística, competencia para aprender a aprender e a de autonomía e iniciativa persoal e realizamos diversos contacontos nos que lemos libros como Santiago, Santiaguiño vai facer o camiño (Isabel Bugallo y Sarria), Marosa e Mariña camiñan a Compostela (Iago López) ou A Ruta da Prata (Toño Núñez e Xoan Carlos García Porral) entre outros.
Finalmente cada clase creou o seu propio libro sobre o Camiño de Santiago, no que se resume todo o aprendido durante o proxecto; e, na galería de educación Infantil creamos o recuncho do Noso Camiño, no que hai dous murais así como contos, folletos, fotografías e diversos obxectos relacionados co Camiño de Santiago e que son o resultado da posta en práctica das actividades deste proxecto levadas a cabo durante todo o curso e contando tamén coa colaboración das familias.
Nos seguintes vídeos resumimos de forma breve o aprendido con este fermoso proxecto, e só nos que dicir BO CAMIÑO!.
Co fin de seguir aprendendo sobre o Camiño de Santiago realizamos unha saída ao Albergue da Laxe, próximo ao noso colexio, onde puidemos descubrir que é un albergue en primeira persoa e alí tamén nos cuñaron a credencial, a cal fixemos con anterioridade, para acreditar a realización dese pequeno tramo do camiño, que transcorre dende o albergue ata o noso colexio, igual que os peregrinos/as que a van selando nos distintos lugares polos que pasan.
Despois de descubrir o que é un albergue volvemos ao colexio camiñando, transformándonos en peregrinas e peregrinos durante unhas horas, para o cal levamos a nosa propia cuncha, que constitúe en dos principais símbolos do Camiño de Santiago. Durante a andaina observamos os animais e árbores que atopamos ó noso paso, seguimos as frechas amarelasque nos indican a dirección que debíamos seguir para continuar o camiño e merendamos ao aire libre, gozando da riqueza natural e paisaxística do noso contorno. No seguinte vídeo resumimos brevemente esta saída.
Despois da saída reflexionamos sobre o que aprendemos sobre os albergues e o que descubrimos coa andaina. Tamén recordamos os animais que vimos durante a ruta e pensamos en que outros animais podemos atopar no camiño dende o albergue ata Santiago e plasmámolo a través do debuxo nun mural. Así mesmo, coa axuda de Tina Calixtina descubrimos que se realizamos o camiño á pé temos que facer 100 quilómetros para obter a Compostela, mentres que se o facemos en bicicleta hai que facer o dobre de quilómetros, é dicir 200. Logo disto cada neno/a elixiu como lle gustaría facer o camiño, á pé ou en bicicleta e simulamos un percorrido no pavillón. Así mesmo, introducímonos elementos que podemos atopar no camiño nunha caixa pechada, co fin de que cada nena/o a través do tacto e cos ollos pechados identifique o elemento e a súa utilidade durante o camiño, e o que debemos facer con el; por exemplo, unha bolsa de plástico tirámola no contedor amarelo, reflexionando á súa vez sobre a importancia de reciclar e coidar o planeta e de alimentarse de forma saudable.
Ademais, coa axuda das familias investigamos sobre as árbores propias do noso contorno e sobre as vilas nas que vive o noso alumnado, as cales están próximas ao camiño de Santiago, ´concretamente ao tramo coñecido como “RUTA DA PRATA” que é a que pasa ó carón do noso colexio; fomentando valores como o respecto e conservación do noso contorno.
Tamén descubrimos cales son os pobos e vilas que forman o itinerario da Ruta da Prata e marcamos no mapa de Galicia ese recorrido, con frechas amarelas, dende Bendoiro ata Santiago de Compostela. Finalmente descubrimos como é a Catedral de Santiago de Compostela a través dunha fotografía actual e facemos un crebacabezas da mesma, posto que esta é a meta de todos os peregrinos/as que fan o Camiño de Santiago.
O mércores 25 de maio de 2022 tivemos unha actividade de contacontos integrado dentro deste programa “Vexo, veo, Xacobeo”, na cal coñecemos a unha peregrina actual e a un peregrino tradicional cos cales recordamos cales son os símbolos do Camiño de Santiago, identificamos a vestimenta de cada un deles, escoitamos atentamente o conto das 3 irmás, fillas do leñador e a tartaruga Tina Calixtina e decoramos pegadas, tal e como resumimos no seguinte vídeo.
