Por fin chegou o tan agardado Centifest, a feira de xogos na que puidemos presentar o noso traballo relacionado co PDI e tamén desfrutar cos xogos do resto de cursos da escola. Foi unha xornada fantástica, na que xogamos xuntos e pasamos unha mañá fabulosa co resto de alumnado, profesorado e familias da escola.

A continuación presentámosvos un resumo fotográfico e as opinións das rapazas e rapaces de quinto sobre o Centifest:

DANIELA GÓMEZ: O Centifest estivo moi ben, foi unha feira moi divertida. Encantáronme todos os xogos e moito, moitísimo máis, o Quen é Quen, porque me chamou a atención que fora tan xigante e de profesores, ademais! Encantoume presentar o meu xogo, "Día das Cores", e presentar a canastra. Tamén me gustou dar unha volta pola feira e xogar a case todos os xogos, e, mentres xogaba aos xogos, ía gañando laciños e pislas para decorar o meu chaveiro.

SALVADOR: A feira foi bastante entretida. A xente xogaba a xogos divertidos e desfrutaba. Os distintos xogos parecéronme unha idea bastante orixinal. Estivemos esforzándonos para dar froito a marabillosos xogos. A xente era bastante amable e divertida, e, por último, pero non menos importante, cando a xente viña probar os nosos xogos, iso poñíame moi contento. O que máis me gustou foi cando chegou o meu pai, porque é a primeira vez que ven ao Centifest e iso foi bastante bonito da súa parte.

IREA: A feira estivo moi ben. Encantoume ensinarlles os xogos ás familias, xogar coa xente aos xogos que creamos e as atraccións que fixemos e programamos. O que máis me gustou foi ir visitar outros postos e o xogo que máis desfrutei foi o Quen é Quen.

MIGUEL: Opino que o Centifest foi divertido en xeral, me entretiven moito. Todo estaba ben elaborado e presentar os xogos era moi divertido.  O que máis me gustou foi presentar os xogos, porque a moita xente lle gustou xogar ao noso xogo “As Cartas Matemáticas”.

CARMELA: A feira foi moi divertida, porque coñecín moitos xogos que non coñecía. Gustoume ver ao meu irmán pequeno, Roque, explicándome como se xoga aos xogos que tiña no seu posto, que consistía nos xogos populares. O que máis me gustou foi xogar aos demais xogos, porque foi moi divertido ver que xogos quixeron facer os nenos das outras clases.

DANIELA GARROTE: Opino que facer unha feira de xogos é moi boa idea para que os nenos pequenos e maiores poidan pasar un bo rato coas súas familias coñecendo os traballos das outras aulas, e facelo no colexio está moi ben para pasar unha boa mañá. O que máis me gustou foi o traballo de primeiro e segundo, porque é moi divertido, e moitas familias se animaron a participar.

DARÍO: Gustoume moitísimo, pero o que máis me gustou foi ser encargado, porque puiden axudar á xente que viña ver o proxecto do meu equipo, e iso emocionoume moitísimo. Até llelo puiden explicar aos meus pais e ao meu avó. Ademais, o xogo de Laura gustoume moito. Un dos protagonistas do xogo era eu, mais non o sabía! Meu pai non mo dixera cando me fixo a fotografía diante do pavillón da Xunqueira! O que máis me gustou foron os xogos de 5º, o xogo de Laura da ANPA, o de Paula, tamén da ANPA e o Quen É Quen, que tamén era moi divertido.

SELENA: Opino que estivo moi ben, porque podiamos ensinarlle ás familias os xogos que creamos coas nosas propias mans e ver os xogos que crearon os outros cursos. O que máis me gustou foi a parte da música, porque puidemos bailar, e a parte na que me quedei eu soa explicándolles aos nenos e nenas e ás familias os xogos e as atraccións que nós creamos.

MARCOS: Creo que o Centifest estivo moi ben. A min gustoume moito, porque había moitos xogos divertidos. O que máis me gustou foi o Quen é Quen de mestres e mestras do colexio, porque xa coñecíamos todas as personaxes e as fotos estaban moi ben.

ESTELA: A feira foi moi divertida. Xoguei a todos os xogos e paseino moi ben. Tamén fixen un chaveiro moi grande con moitas cintas de cores e tíveno posto na camiseta moito tempo. O que máis me gustou foi presentar a noria e facer os xogos que fixemos todos os equipos da miña clase. Tamén me encantou a repichoca, e xogar ao noso xogo, o “Xeomemory”.

KAIKY: O Centifest é moi divertido e non te aburres, pasas tempo cos teus amigos e amigas e as estacións son moi guais. O que máis me gustou foron as atraccións de infantil, porque eran feitas por eles e eran moi entretidas.

LARA: O Centifest é mói divertido! E serve para aprender o que están a facer o resto de cursos. Gustoume porque estivemos todo o colexio xogando xuntos, bailando e desfrutando. O que máis me gustou foi estar coa xente, ir ver os postos dos demais cursos e atender e explicarlle á xente a nosa atracción e o noso xogo e ver o que estiveron a facer as demais clases.

XOEL: Gustoume moito porque estivemos explicando aos nenos os nosos xogos e, cando non nos tocaba explicar, xogabamos aos outros xogos dos demais cursos. Os xogos que había eran como xadrez humano, de multiplicar, de pescar osos, coller tapas de metal de botellas con imáns e temos un chaveiro onde había que colocar cordas e pislas. O que máis me gustou foi un xogo onde había que meter unhas pelotas de plástico nuns buratos pequenos e che daban puntos.

RUBÉN: Gustoume moito porque xoguei a xogos e paseimo ben. O que máis me gustou foi o xogo dos patos, porque había que cazar os patos na auga.

IRIA: A feira de xogos gustoume moito, é moi divertida! É un repaso do que fixemos na clase sobre o tema do ano e unha festa! Este ano fixemos xogos para unha aula hospitalaria e tamén fixemos atraccións na clase de Proxecto Competencial. O que máis me gustou foi axudar no parque de atraccións e xogar ao memory.

DIEGO: Me gustou moito, xoguei ao meu xogo e aos dos meus compañeiros e xoguei con moita xente. Tamén traballei moito e visitei outros postos de compañeiros. O que máis me gustou foi o Quen é Quen de infantil, o meu xogo, o dos patiños de infantil, o parchís de sexto e uns dos tapóns de facer tres en raia. 

ARIADNA: A verdade é que os xogos foron súper divertidos. A min encantoume explicarlles os nosos xogos ás familias. O que máis me gustou do Centifest foi explicar os nosos xogos e atraccións e xogar cos xogos dos demais, porque foi moi entretido e divertido.

SERGIO: Eu opino que estivo ben porque houbo moitos xogos para divertirse e houbo que ir polos postos xogando e che daban unhas cintas para coleccionalas. Estiveron divertidos os xogos. E tamén estiveron os outros cursos e cada equipo do cole tivo que crear un xogo. O que máis me gustou foi pescar os osiños, porque era difícil pescalos e había que facer parellas de debuxos e o parchís, que foi de sexto.

BRUNO: O Centifest é xenial! Encántame que o colexio teña o detalle de facer cousas tan divertidas como o Centifest. A feira está moi decorada e moi ben feita e hai moita diversión para os nenos e as familias. O que máis me gustou foron os xogos de 6º, porque molaban moito.

XANTAL: Gustoume moito o Centifest, porque os xogos foron moi divertidos e paseino moi ben. O que máis me gustou foi o xogo “Centi Vai En Tren” e as “Cartas Matemáticas”. 

HUGO: O Centifest está bastante ben, gustoume moito e foi divertido porque había bastantes xogos e tamén fixeron musica e bailamos. O que máis me gustou foi ir xogar nos postos dos demais, traballar no meu xogo e falar coas nenas.

GAEL: O Centifest está bastante ben e os xogos son moi chulos e guais. Os de infantil me gustaron moito. O que máis me gustou foi a mini piscina dos osos dos nenos de infantil, porque a min me gusta moito pescar. 

GABRIEL: A feira non me gustou moito porque era moi aburrida. O que máis me gustou foi o noso xogo, porque é moi divertido o noso xogo.

É unha mágoa que a Gabriel non lle gustara o Centifest, pero, polo que parece, foi un éxito entre o resto do alumnado de quinto.

Grazas polo voso esforzo e traballo, rapazas e rapaces, ben xogado!

Hoxe, 25 de maio, Daniela veu á escola cunha toalla. Iso é porque Daniela é unha rapaza moi lista e sabe que unha toalla é o obxecto de maior utilidade que existe. Como, que vós non sabedes de que estamos a falar?! Pois investigade, investigade, que as rapazas e rapaces de quinto xa saben de vai todo isto. Desexámosvos feliz Día da Toalla a todas e todos!

O día 16 de maio celebramos na escola a festa dos Maios e o Día das Letras Galegas.

Tivemos a sorte de contar coa axuda dunha chea de familias moi implicadas en todas as actividades que se propoñen desde a escola, así da gusto! Estiveron traballando arreo desde ben cedo para axudarnos a confeccionar os nosos tres maios. Mirade que ben acompañadas e acompañados estivemos nesa xornada:

Traballamos moito e tamén desfrutamos xuntas e xuntos. Ao final, entre todas e todos creamos tres maios preciosos e cheos de cor que levamos para a pista de area da escola para continuar alí coa celebración.

Tamén decoramos o patio con bandeiras de Galicia e cos carteis informativos sobre a vida e obra de Francisco Fernández del Riego, don Paco, o autor homenaxeado este ano nas Letras Galegas. Ademais, o equipo artístico da ANPA sorprendeunos unha vez máis co seu fantástico traballo creando un precioso mural de Fernández del Riego.

Xa na pista, o alumnado agasallou ás familias asistentes cuns bailes arredor dos maios. Primeiro foi a quenda do alumnado de infantil, que bailou "Indo Eu" e, a continuación, o alumnado de primaria bailou a Muiñeira de Lugo. Pechamos a festa coa canción "Seresín, Seresán", que cantaou todo o alumnado da escola xunto.

Foi unha xornada preciosa, festexando a primavera e a nosa literatura!

Desde o Equipo de Dinamización da Lingua Galega queremos dar as grazas a todas as familias que se implicaron e colaboraron con nós, facendo este día tan bonito e especial.

Que vivan os Maios e as Letras Galegas!!!

En 5º de primaria estamos a desenvolver un obradoiro de habilidades sociais desde o día 3 de maio.

Andrea, psicóloga de servizos sociais do Concello de Fene, impartirá un total de 3 sesións prácticas no nosa aula para facer consciento ao alumnado da importancia de ter unha boa autoestima e autoconcepto e de valores como a tolerancia e o respecto, necesarios para a vida en sociedade. Tamén lles ensinará técnicas para resolver conflitos de forma pacífica.

Moitas grazas pola túa axuda, Andrea, e tamén a Lorena por organizar estas actividades desde o Departamento de Orientación da escola.