Hoxe, mércores 29 de marzo, tivemos a sorte de desfrutar dunha sesión de xogos de mesa de Brazolinda na escola e puidemos estar acompañadas e acompañados de Paula, Juana, Rebeca e Mariana, nais de alumnado da aula, que quixeron vir xogar con nós.

Brazolinda é un proxecto de deseño e fabricación de xogos de mesa en galego. Están deseñados para o xogo conxunto de grandes e pequenos e axudan a desenvolver a capacidade de observación, comunicación, razoamento... a través das adiviñas, as matemáticas ou xogos de agudeza visual, entre outros.

Pasámolo xenial probando todos os xogos e, os que máis e os que menos, xa anotamos algún que outro xogo na nosa lista de desexos.

Moitas grazas ás rapazas de Brazolinda por compartir os seus xogos con nós e a Paula, Juana, Rebeca e Mariana por vir desfrutar desta xornada lúdica connosco.

Para conmemorar o Día da Poesía o alumnado de quinto creou os seus propios poemas sobre o xogo e escribiunos en papeis con forma de prendas de roupa que finalmente decoraron ao seu gusto.

O día 21 de marzo, entre toda a escola, enchemos Fene de versos cos nosos tendais e coa iniciativa Poemas de Cordel. Que idea tan marabillosa e que sorpresa levaban os veciños e veciñas de Fene cando atopaban os poemas colgados nos tendais por todo o pobo.

O día 8 de marzo conmemórase o Día da Muller e na escola fixemos unhas gafas violetas para que, a través dos seus lentes, poidamos ver un mundo no que existe unha igualdade real entre homes e mulleres. Isto é o que se transmite ao alumnado e no que se incide nas nosas aulas cada día.

As rapazas e rapaces de quinto fixeron debuxos e traballos sobre esta data e houbo un acto conmemorativo no que se fixo fincapé na importancia de mirar o mundo todos os días a través dos lentes violetas.

O venres 24 de febreiro celebramos o Día de Rosalía lendo poemas desta autora fundamental na nosa literatura, cuxa obra mestura o costumismo e intimismo coa reivindicación da nosa identidade.

A publicación da súa obra Cantares Gallegos en 1863 marca o inicio do Rexurdimento, un proceso de recuperación da lingua e cultura galega despois dos Séculos Escuros, nos que a nosa lingua quedou relegada ao ámbito oral.

Dada a importancia de Cantares Gallegos na nosa literatura, decidimos homenaxear a Rosalía no seu día recitando o poema Adiós Ríos, Adiós Fontes. A 5º de primaria tocounos ir á Praza do Concello, mentres que outros cursos foron a outras prazas, para espallar os poemas de Rosalía por todo Fene.

Ademais, en días previos, o Equipo de Dinamización da Lingua Galega con moita axuda por parte do resto do profesorado do centro, preparou un fotomosaico coas fotos do alumnado, profesorado e persoal de servizos da escola. Mirade que cousa máis fermosa saiu! Moitas grazas por toda a axuda que recibimos para sacar as fotos e crear o mosaico!