PAZ EN CANADÁ

A principio deste curso, a nosa compañeira e vicedirectora, Paz Prieto, tivo a oportunidade de vivir unha fermosa experiencia en Canadá.

Deixámosvos aquí unha pequena presentación que resume a súa estancia.

 

Felicitación do Xograr a Xabier Quiroga polo premio á sua novela.

Os rapaces levan razón! E galardoan a IZAN O DA SACA  co  PREMIO SAN CLEMENTE de narrativa. PARABÉNS ao seu autor, XABIER QUIROGA !

 Máis de trinta rapaces pertencentes a distintos centros de ensino de Galicia, Inglaterra, Francia, Alemaña ou Moscova foron quen de recoñecer a valía dunha grande obra da literatura galega  publicada  na editorial Xerais.

 Izan o da saca é un verdadeiro xogo literario, dende o seu  palindrómico título ata a engaiolante historia  que percorre os espazos da Ribeira Sacra, onde se fabula co presente ,  se retrata o pasado e se recrea  a idiosincrasia galega.

Xabier Quiroga tivo a ben  agasallarnos coa súa presenza  esta fin de semana no Roteiro literario de Izan , xeira de actividade intensa,  onde os participantes tivemos ocasión de recoller as palabras de Xabier acompasadas polo  zoar do vento en Marce,  pescudar na fervenza de Augacaída  agardando a aparición das xacias , e enmeigarnos  nos camiños reviravoltos da Cova.  Soubemos de contos,  soubemos dos trafegos nas viñas,  e quixemos escoitar o canto dos peixes  ….

Soou o canto, as nosas voces baixaron pòlo Miño e espalláronse polos mares , as xacias  trouxeron o seu tesouro …..porque o merecías  Xabier! PARABÉNS DESDE O XOGRAR!

 

“ O  mestre proseguiu con voz melosa:

-Non te preocupes, un día iremos xuntos dando un paseo e verás o castro e outros lugares fermosos que hai río abaixo. Tamén río arriba, eh, porque onde nós vivimos está cheo de tesouros. Iso  si, hai que facer por velos”

                                                                                                              Izan o da saca, páx 99 

Novembro,. tebro, noitebro..

Os seres humanos sentimos medo ante un montón de situacións, algunhas reais e outras imaxinarias. Ante o medo , a cadaquén lle pasan cousas distintas: sentimos a necesidade de fuxir, de enfrontalo, de tapármolos ollos  e os oídos , de metérmonos baixo das sabas ou de buscar a alguén que nos protexa. Outro xeito de enfrontar os nosos medos é expresalos con palabras e imaxes. Quizais por iso, os homes e  mulleres contan lendas, escriben contos e novelas, filman películas e pintan cadros nos que o medo ten  o seu lugar.

 Unha morea de historias de terror suceden en  lugares que asociamos co medo, como un cemiterio ou un castelo escuro. Tamén soe facer frío, o que nos fai sentir máis fráxiles . E por suposto, transcorren na noite, cando os nosos ollos non distinguen ben as formas e a lúa nos envolve coa súa luz esmorecida.

SAMAÍN 2016 NO XOGRAR

O Samaín é unha festa asociada ao ciclo anual do sol que xa forma parte do Patrimonio Inmaterial de Galicia e o Norte de Portugal. A recuperación da tradición involucra a varias escolas que promoven actividades que á súa vez son inseridas na promoción da candidatura a Patrimonio Inmaterial. (UNESCO)

En Sarria escoitamos UN DITO popular (*3) referente ao costume de baleirar cabazas e meterlles unha candea acendida dentro na noite de Difuntos, que di:
“DE DÍA ANDAN POLOS HORTOS E DE NOITE ESTÁN COS MORTOS”

Continuar lendo........

Visita á Facultade de Ciencias do Deporte e Educación Física e Castelo de Santa Cruz

Nada mellor que comezar un ano con bo pé, e para iso os alumnos de 1º de bacharelato visitaron a Facultade de Ciencias do Deporte e Educación Física, onde foron recibidos no Salón de Actos pola vicedecana  María Castillo, quen lles explicou  explicitamente o currículum destes estudos. Asemade  tivo a amabilidade de guiarnos polas  múltiples instalacións, e amosarnos  a pluridade de beneficios  que conleva a práctica continuada da actividade física, para finalmente agasallarnos coa impagable  visión que puidemos observar  desde o Torreón da Facultade

Completamos esta visita ao concello de Oleiros  achegándonos ao Castelo de Santa Cruz,  onde da man dos educadores ambientais do CEIDA, puidemos descubrir o rico patrimonio natural e histórico agochado nesta illa.

 

 

Inicio do curso

Xoves 15:

12:45 hs. - Presentación de todos os cursos nas aulas respectivas cos seus titores/as.

Os pais e nais do alumnado que se incorpora por primeira vez ao Centro que o desexen serán recibidos polo Director no Salón de Actos ás 13:00hs.

 

Haberá servizo de transporte e comedor escolar.

 

Venres 16:

Comezo das actividades lectivas e horario:

·         ESO e BAC

De Luns a Xoves: 8:40 a 14:30 hs.

Venres: 8:40 a 14:15 hs.

·         CICLO

Luns e Martes: 8:30 a 15:10 hs.

Mércores, Xoves e Venres: 8:30 a 14:45 hs.

SETEMBRO 2017

  • Entrega de notas de setembro: Luns, día 5 ás 17:00hs nas aulas respectivas.
  • Devolución dos libros adquiridos coas axudas da Xunta: Luns, día 5, xunto coa entrega de notas. En todo caso deberán ser devoltos antes do día 7 senón perderase o dereito ás axudas do curso 16/17.
  • Matrícula: o alumnado que non se matriculou en xuño-xullo deberá facelo os días 6, 7 e 9 de setembro de 8:30 a 14:30hs. Prégase que eviten as horas centrais da mañá para evitar colas.
  • Mercadiño de libros de 1º de BAC: 12 de setembro ás 17:00hs. (compra-venda de libros de texto entre alumnos entrantes e saíntes en 1º de BAC).
  • Fondo Solidario de Libros de Texto: o 15 de setembro publícase a lista definitiva  de admitidos e excluídos, cos libros adxudicados a cada alumno (1º e 3º da ESO).
  • Vales para a adquisición de libros de texto e material escolar: o alumnado que tiña exames de setembro poderá recollelos a partir do día 12 na conserxería do centro.
  • Comezo das clases: xoves, 15 de setembro, ás 12:50hs. Haberá servizo de transporte e comedor escolar.
  • Reunión informativa: Os pais cuxos fillos se incorporen por primeira vez ao centro (1ºESO e 1ºBAC) serán recibidos polo director no salón de actos ás 13:00hs.

Xa está no Xograr: Aquí e Agora 16

AeA 16 chegou  impresa en   dúas caixas de cartón, apenas medio metro de espazo e pouco menos de 10 Kg de peso. Que pouquiña cousa!,  pensaredes. Abofé que non!

Tras desa liviandade están trinta alumnos, que acoden  con presteza ás reunións  nos escasos minutos que teñen de lecer, entre clase e clase,  ao longo das semanas de todo o curso.

Tras desa brevidade agóchase unha escolma de intres previos , unha posta en común de ideas, de escollas, de seleccións feitas ao chou, ou  por sortes e resortes. Aí están fins de semana adicadas a adubar as pezas, a arranxar textos e formas;  aí están noites de reflexión e desacougos,  días  de preguiza e xornadas  de divagación ou clarividencia. Corre o tempo, cadaquén cociña o traballo de seu e cando  os desatinos  xa semellan correxidos chega o ensarillado maio, e xorden novos retos de milimetraxe no ordenador, de adaptación para a presentación , de arranxos  de imaxe  …de demoras e  dúbidas , e sobretodo de decisións: cómpre servir o prato.

Resultado final: velaí o tedes.

AeA 16,  produto de consumo rápido, de consumo inmediato endexamais perecedeiro, sen residuos prexudiciais e con nutrintes para todos nós:

  • Ofértase no noso propio local, o Xograr, e tamén en web www.revistaaquieagora.blogspot.com
  • Adáptase ao horario laboral e ao de lecer
  • Lese a modiño, a chimpos, ás carreiras, do limiar ao fin , de diante para tras ou de atrás para adiante…
  • Agasalla un menú equilibrado  ( ciencias, humanidades, deportes, música, opinión, enquisas,  pasa e repasatempos…..)

Alguén dá máis? Bo proveito !... Nós recuncaremos, seguro!

 

Equipo redacción AeA

 

O noso agradecemento ao Concello de Sarria por subvencionar a impresión da revista

Terceira reunión do Club Lector "O Xograr Lector"

Xa coas cabezas pensando nos exames de xuño, os habituais do Club Lector do IES Xograr Afonso Gómez reuníronse por terceira vez no curso actual, desta volta á correspondente ao derradeiro trimestre do ano.

A obra escollida foi "Muerte a los coches" do escritor Blake Nelson. Para reflexionar sobre esta novela reuníronse un total de doce alumnos e seis docentes, que aproveitaron igualmente para aportar suxerencias lectoras ben dirixidas a este Clube Lector como a versíón "ON-LIne-Adultos".

Desta volta, a reunión tivo lugar no patio do instituto, convertido para a ocasión nun pequeno foro de discusión. E para ser consecuente co título do relato nos coches dos profesores colocáronse sendas esquelas funerarias indicado o R.I.P. do modelo ( Golf, 306, Altea, Xsara..)

 

 

 

 

 

 

 

 

 

 

 

 

 

 

 

 

 

 

 

 

 

 

 

Graduación do alumnado de bacharelato 2014-2016

O venres, día 27 de maio, celebrouse o acto de graduación dos alumnos de bacharelato da promoción 2014-2016 no IES Xograr Afonso Gómez de Sarria.

O evento, moi concorrido por todos os membros da comunidade educativa, foi de gran emotividade. Nel, falaron un representante do alumnado, outro do profesorado, outro de nais e pais e por último o director do centro, que destacou que dez alumnos do Xograr poderán concorrer aos premios extraordinarios de bacharelato, ao acadar máis dun 8,75 de media na etapa. Lembrou tamén que a alumna deste centro, Carmela Cela, acadou o curso pasado a mellor nota de Galicia nestes premios, animando así aos presentes a seguir os seus pasos.

Unha fantástica actuación musical dos propios alumnos puxo o broche final a esta xornada.

 

Podedes ver as fotos da graduación aquí

Poema de despedida de Ana Belén Durán Pernas

Distribuir contido