PROCESO DE ADXUDICACIÓN DA CAFETERÍA DO CENTRO

Para dar cumprimento á instrución 4/2016 de 30 de Maio de 2016 para a contratación do servizo de xestión e explotación de cafeterías en centros docentes non universitarios dependentes da Consellería de Cultura, Educación e Ordenación Universitaria, ábrese un prazo para que calquera persoa física ou xurídica, con capacidade de obrar, poida presentar as ofertas oportunas.

O procedemento a seguir, as condicións esixidas e os criterios para a valoración das ofertas recibidas veñen reguladas na citada orde.

Prazo de presentación das ofertas:       DO 22 DE XUÑO AO 10 DE XULLO DE 2016

Lugar de presentación das ofertas:      OFICINA ADMINISTRATIVA DO IES GONZALO TORRENTE BALLESTER

Datos de contacto:

IES GONZALO TORRENTE BALLESTER. Rúa Herminia Fariña, s/n.- 36003. Pontevedra

Teléfono:   886159156

Correo electrónico:   ies.torrente.ballester@edu.xunta.es

Páxina web:   www.edu.xunta.gal/centros/iestorrenteballester

 

Para máis INFORMACIÓN, consultar os documentos que se xuntan a continuación:

LISTAXES DEFINITIVAS DE ADMITIDOS E NON ADMITIDOS. CURSO 2016-17

Premendo nos 2 adxuntos, pódense consultar e descargar os seguintes documentos:

-O documento coa data de publicación das listaxes e o recurso a interpor no seu caso, firmado e selado.

- As listaxes definitivas do proceso de admisión para o curso 2016-17. Nas listaxes figuran tanto os admitidos coma os non admitidos.

 

RESOLUCIÓN BOLSAS DE CONVOCATORIA XERAL

 

Onte publicáronse na páxina  web do Ministerio os listados definitivos de bolseiros da convocatoria xeral do actual curso 2015/16. Pódese acceder dende o seguinte enlace: http://www.mecd.gob.es/servicios-al-ciudadano-mecd/catalogo/educacion/becas-ayudas-subvenciones/para-estudiar/bachillerato/becas-generales-no-universitarias.html

 

O  prazo para a presentación de recurso de reposición por parte do alumnado comeza o 10 de maio e finaliza o 9 de xunio de 2016.

 

Un PDF coas listaxes por centros pódese consultar e descargar premendo no adxunto

CUALIFICACIÓNS FINAIS DE 2º DE BACHARELATO. PROCEDEMENTO PARA AS RECLAMACIÓNS

A Dirección Xeral de Educación, Formación Profesional e Inovación Educativa, ven de ditar unha circular pola que se establece o procedemento que compre seguir nas reclamacións das cualificacións outorgadas no segundo curso do bacharelato.

Esta circular pódese consultar e descargar premendo abaixo no adxunto.

 

ACTUALIZACIÓN LISTAXES PROVISIONAIS PROCESO DE ADMISIÓN 2016-17

Premendo nos arquivos adxuntos accédese aos Listaxes Provisionais do Proceso de Admisión para o curso 2016 -17

PROCESO DE ADMISIÓN ALUMNADO 2016-17

Solicitudes de admisión para 1º de E.S.O, 2º de E.S.O e para 1º de Bacharelato de Humanidades e Ciencias Sociais

Xa que o número de solicitudes é superior ao de prazas ofertadas, faise necesario presentar a documentació  que xustifique os criterios do baremo.

O prazo de presentación é do 1 ao 12 de abril, ámbos os dous inclusive

Solicitudes de admisión para 3º de E.S.O, 1º de Bacharelato de Ciencias e 2º de Bacharelato

Nestes casos, xa que o número de solicitudes é inferior ao de prazas ofertadas, todas as solicitudes están admitidas e non é necesaria a presentación da documentación acreditativa dos criterios do baremo

 

                                                     Pontevedra a 29 de marzo de 2016 

                                                                   O secretario

                                                             Francisco Pacios Álvarez

 

 

 

 

8 de Marzo. Día Internacional da Muller

DIA INTERNACIONAL DA MULLER TRABALLADORA
É frecuente relacionar á celebración do 8 de marzo, con cuestións ligadas á festividade e á reivindicación de igualdade. Con todo, aínda que ano tras ano esta 
data tende a facerse cada vez máis popular, a súa orixe non resulta tan coñecido.

A Carta das Nacións Unidas, asinada en San Francisco en 1945, foi o primeiro acordo internacional que proclamou que a igualdade dos sexos era un dereito humano fundamental.

A Organización de Nacións Unidas, no ano 1975, estableceu o 8 de marzo como o Día Internacional da Muller, en honra aos sucesos acaecidos o 8 de marzo de 1857, e dos que xorden dúas versións.

A primeira delas xira ao redor dun tráxico episodio desenvolvido na cidade de Nova York e que terminase coa vida de 129 traballadoras téxtiles.

 

 De acordo a esta versión, durante o transcurso dunha folga convocada como resposta ao despedimento masivo aplicado pola patronal fronte ás denuncias relacionadas coas deplorables condicións de traballo, as traballadoras decidiron encerrarse no establecemento fabril. "Súbitamente" produciuse un voraz incendio que terminou coa vida daquelas mulleres que só reclamaban polos seus dereitos. Ao enterro asistiron máis de 100.000 persoas.

A segunda versión, ligada a investigacións como as da historiadora canadense Renée Côté, o 8 de marzo vincúlase coa realización dunha mobilización de protesta organizada polo gremio de costureras da compañía téxtil de Lower East Side, de Nova York, na que se bregaba por unha xornada laboral de ¡10! horas.

Pero máis aló destas versións, o certo é que a historia do 8 de marzo atópase asociada directamente a cuestións propias da historia do século XX como a Primeira Guerra Mundial, a Revolución Rusa, a loita polo sufraxio feminino, as pugnas entre socialistas e sufraxistas, e o crecente auxe do sindicalismo feminino durante as primeiras décadas, tanto en Europa, como Estados Unidos e Latinoamérica. 

A cor lila con que se identifica este día é porque dese ton era o tecido que estaban facendo as obreiras o día que morreron.

Obradoiro de prensa - A voz do Quinto

O pasado venres día 19 tivemos a ocasión de presentar no Salón de Actos do instituto "A voz do Quinto", o xornal solidario resultante do obradoiro de prensa que este curso organizamos no centro. A el asistiron sete alumnos/as, aínda que inicialmente eran trece, e tiveron a ocasión de aprender cuestións relacionadas co xénero xornalístico e coa educación en valores e para o desenvolvemento. Como monitora desta actividade actuou Carmen Novas, responsable de comunicación para o desenvolvemento de AGARESO (Asociación Galega de Reporteiros Solidarios), organización que xunto con Asemblea de Cooperación pola Paz leva xa varios cursos colaborando co noso centro. "A voz do Quinto" é un pequeno xornal cuxa intención é a de promover valores solidarios e concienciar fronte ás inxustizas. Esta edición inclúe artigos sobre igualdade entre homes e mulleres, a protección animal e ambiental, o comercio xusto, o desenvolvemento dos países do Sur... Os que queirades ler a versión completa do xornal, podedes facelo a través desta ligazón.

 

A memoria das mulleres

Os alumnos de 3º de ESO participaron este curso, baixo a coordinación da profesora Cristina Corral do Departamento de Lingua Castelá, no programa A memoria das mulleres. É esta unha iniciativa promovida polo Concello de Pontevedra, en concreto pola área de Patrimonio Cultural, coa que se pretende crear un fondo documental, gráfico e audiovisual da historia das mulleres en Pontevedra. Os nosos alumnos recolleron información e fotografías das mulleres de maior idade da súa familia e da súa contorna, material co cal elaboraron unha exposición no centro e que foi remitido posteriormente ás persoas responsables do proxecto no Concello de Pontevedra. Facendo clic neste enlace poderase ver un vídeo sobre o traballo realizado. Ademais, incluímos nesta publicación o blog onde están colgadas todas as entrevistas realizadas (http://mulleresmatriarcas.blogspot.com.es/) e
o enderezo da páxina de Facebook do programa A memoria das mulleres (https://www.facebook.com/amemoriadasmulleres).
 

Representacións teatrais

Dentro da mostra de teatro organizada con motivo do "Ben veñas, maio", dous grupos de teatro do noso instituto van representar cadansúa obra. As actuacións terán lugar o vindeiro xoves 7 de maio. Por unha banda, ás 12.30 horas todos os alumnos de 1º C de ESO, dirixidos pola súa titora Sara Valenzuela, representarán a obra O Entroido, unha adaptación dun texto de Manuel Lourenzo. Por outra banda, ás 18.00 horas o grupo "Os autorizados", formado por alumnos de diferentes cursos, representará a obra Comedia bífida, de Manuel Núñez Singala. "Os autorizados" son: Adrián López, Alexandre Balea, Celia Martínez, Cristina Rodríguez, Daniel Veiga, Esteban Carballude, Joaquín Méndez, Lucía González, Nara Mahou, Noemia Veiga e Julien F. Courcier (director do grupo). As funcións serán no Teatro Principal de Pontevedra e dende o equipo directivo convidamos a todos os membros da nosa comunidade educativa a asistir a estas actividades.

           

II Certame de fotografía matemática - Premio popular

O pasado 15 de abril rematou o prazo de entrega de fotografías para participar no "II Certame de fotografía matemática" do noso instituto, organizado polo Departamento de Matemáticas. Máis abaixo deixamos un vídeo no que se recollen todas as imaxes presentadas ó concurso xunto co seu título.
Tal e como establecían as bases do certame, este ano haberá un premio popular, que será escollido por todos os membros da comunidade educativa (alumnos, profesores, persoal non docente e familias). Para participar na súa elección, será preciso encher un cuestionario online, ó que se poderá acceder facendo clic neste enlace. Cada persoa poderá votar soamente unha vez e o último día para facelo será o vindeiro 1 de maio. Animámosvos a todos a participar na votación.
 
 
 
 
 

Probas PISA (abril-maio de 2015)

O IES Gonzalo Torrente Ballester, xunto con outros cincuenta e oito centros públicos e privados de toda Galicia, foi seleccionado para participar nas probas PISA do ano 2015, que se desenvolverán en máis de setenta países de todo o mundo. Estas probas de carácter trianual, que avalían a capacidade do alumnado para aplicar os seus coñecementos a cuestións relacionadas coa vida cotiá, terán lugar entre o 20 de abril e o 30 de maio. A data exacta de realización no centro está aínda por determinar.
PISA avaliará nesta convocatoria de 2015 o alumnado que naceu no ano 1999, o que no noso centro afecta un total de setenta e un alumnos/as; entre estes serán seleccionados finalmente corenta e dous para a realización da proba. Esta selección non será feita polo centro.
Nesta edición de 2015 a competencia avaliada prioritariamente será a de "ciencias", pero tamén se incluirán nas probas cuestións referentes a "matemáticas", "lectura" e "resolución de problemas en grupo". Unha das características máis destacadas neste ano consiste en que o alumnado realizará as probas cun ordenador portátil. Ademais, as familias do alumnado seleccionado para a participación nas probas cubrirán (en papel) un cuestionario de contexto.
As familias e o alumnado directamente afectados recibirán información máis detallada nos vindeiros días nunha reunión que se convocará no centro para estes efectos.
 
O director
 
 
 

PROCESO DE ADMISIÓN DE ALUMNADO (curso 2015-2016)

O luns 2 de marzo comezará o prazo de solicitude de prazas para o curso 2015-2016. Este proceso estará regulado pola Orde do 12 de marzo de 2013 (DOG do 15 de marzo de 2013). A través deste artigo poderanse seguir todas as novidades relacionadas co proceso de admisión e tamén se terá acceso a toda a información relativa a esta convocatoria. En todo caso, lémbrase a todos os interesados que o PRAZO DE PRESENTACIÓN DE SOLICITUDES ESTARÁ ABERTO DO 2 Ó 23 DE MARZO, ambos os dous días incluídos.

 

Encontro literario no IES G. Torrente Ballester

O noso instituto está a organizar un encontro literario con tres dos escritores máis recoñecidos actualmente no eido da novela negra e policial. Estes son:

  • Dolores Redondo, autora da Triloxía de Baztán, da que se levan vendidos máis de medio millón de exemplares;
  • Domingo Villar, creador do carismático policía vigués Leo Caldas, protagonista das súas novelas Ollos de auga e A praia dos afogados;
  • Pedro Feijoo, autor da intrigante Os fillos do mar e da desasosegante A memoria da choiva.

Ademais, contaremos coa presenza como moderador de Ramón Rozas, periodista e comentarista cultural do Diario de Pontevedra.

O encontro terá lugar no Salón de Actos do instituto o vindeiro mércores dezaoito de febreiro ás sete da tarde; no seu transcurso os convidados debaterán sobre a novela negra e policial, sobre a creación literaria e sobre as preguntas que o auditorio lles dirixa, e farannos partícipes dalgunhas das súas anécdotas, coas que sen dúbida gozaremos... ou sufriremos. O evento estará aberto a toda a cidadanía, xa que así o aconsellaban a relevancia dos tres escritores que nos acompañarán e a ocasión especial que para o noso centro representa organizar un evento destas características.

Dende o equipo directivo e o equipo de bilbioteca do centro convidamos a participar nesta actividade a todas as persoas que poidan estar interesadas nela. Xuntamos a esta pubicación o cartel do encontro.

Presentación do libro "Corazóns e coitelos"

Onte na Casa das Campás a comunidade educativa do noso instituto puido asistir á presentación pública do libro Corazóns e coitelos, unha recompilacón dos mellores relatos presentados polos alumnos do noso centro ós certames literarios que convocamos nos últimos cursos. Foi para nós todo un orgullo poder celebrar este acto, xa que supuxo un chanzo máis na carreira literaria dunha nova fornada de escritores do IES Gonzalo Torrente Ballester. No acto tivemos a oportunidade de contar coa presenza do escritor Pedro Feijoo e do crítico literario Ramón Rozas, a quen lles agradecemos enormemente que nos acompañasen nunha ocasión tan especial para nós. Aquí vos deixamos unha foto do evento. Ademais, seguindo este enlace poderedes ver un vídeo do acto: http://vimeo.com/111724984.
 
 

Celebración do Samaín

Para celebrar o Samaín o día 29 de outubro organizamos un concurso de decoración de aulas con motivos relacionados con esta tradición popular. A través do seguinte enlace poderedes ver o vídeo que resume o que foi esta festa no noso centro: http://vimeo.com/110640960

 

Día da Biblioteca Escolar

Na semana do 27 ó 30 de outubro conmemoramos no instituto o Día da Biblioteca Escolar (24 de outubro), que este ano estaba dedicado á relación entre a literatura e as matemáticas. Con tal ocasión organizamos as seguintes actividades:

.- unha exposición con libros cuxo título e contido se relacionaban coas matemáticas e unha mostra de fragmentos de obras de escritores famosos de temática numérica;

.- un concurso de busca de libros cuxo título incluíse números do 0 ó 9;

.- un concurso de decoración de cabazas con elementos matemáticos.

Deixámosvos aquí o enlace a un vídeo que resume estas actividades: http://vimeo.com/110642595

 

Asemblea Xeral Ordinaria da ANPA El Pino

Infórmase a todas as familias ás que poida resultar de interese que o vindeiro mércores 29 de outubro ás 20.30 horas terá lugar no Salón de Actos do instituto a reunión da Asemblea Xeral Ordinaria da ANPA El Pino. Dende a súa Xunta Directiva pídennos que lles deamos publicidade á convocatoria e a orde do día, que será a seguinte:

          1.- Lectura e aprobación, se procede, da acta anterior.

          2.- Balance económico.

          3.- Renovación de cargos.

          4.- Rogos e preguntas.

 

Distribuir contido