COMPOSICIÓN E FUNCIÓNS DO CONSELLO ESCOLAR

Versión para impresora

Artigo 37°

O Consello Escolar dos institutos de educación secundaria que teñan oito, ou máis, unidades estará composto polos seguintes membros:

1. O director ou directora, que será o seu presidente.
2. O xefe ou xefa de estudios, e, de se-lo caso, xefe ou xefa de estudios de nocturno.
3. Un concelleiro ou representante do concello do municipio no que estea situado o instituto.
4. Sete profesores elixidos polo claustro.
5. Tres representantes dos pais ou nais de alumnos.
6. Catro representantes do alumnado.
7. Un representante do persoal de administración e servicios.
8. O secretario ou secretaria ou, se é o caso, o administrador ou administradora do instituto, que actuará como secretario do consello, con voz, pero sen voto.

Artigo 44°

O Consello Escolar do instituto terá as seguintes atribucións:

1. Establece-las directrices e elaborar propostas para a elaboración do proxecto educativo do instituto, aprobalo, avalialo e, se é o caso, introducir modificacións, sen prexuízo das competencias que o claustro de profesores ten atribuídas en relación coa planificación e organización docente.
2. Elixi-lo director ou directora do centro.
3. Propoñe-la revogación do nomeamento do director ou directora, logo do acordo dos seus membros, adoptado por maioría de dous tercios.
4. Decidir sobre a admisión de alumnado, con suxeición ó establecido na lexislación vixente.
5. Aprobar e modifica-lo regulamento de réxime interior do instituto.
6. Resolve-los conflictos e impoñe-las correccións con finalidade pedagóxica que correspondan a aquelas conductas do alumnado que prexudiquen gravemente a convivencia no centro, de acordo coas normas que estableza a Consellería de Educación e Ordenación Universitaria.
7. Aproba-lo proxecto de orzamento do instituto e a execución do mesmo.
8. Aprobar e avalia-la programación xeral anual do instituto, respectando, en todo caso, os aspectos docentes que lle competen ó claustro.
9. Aproba-la programación das actividades escolares complementarias e avalia-lo seu desenvolvemento.
10. Establece-las directrices para a participación do instituto en actividades culturais, deportivas e recreativas naquelas accións asistenciais nas que o instituto puidese aporta-la súa axuda.
11. Establece-los criterios de colaboración con outros centros, entidades ou organismos.
12. Promove-la renovación das instalacións e equipamento do instituto, e vixia-la súa conservación.
13. Analizar e valora-lo funcionamento xeral do instituto, a evolución do rendemento escolar e os resultados da avaliación que do centro realice a
14. Administración educativa.
15. Colaborar coa inspección educativa nos planos de avaliación de centro, nos termos que a Consellería de Educación e Ordenación Universitaria estableza.
16. Regula-lo procedemento de autorización das saídas voluntarias entre clases ou en período de lecer do alumnado do centro.